Read Konyak Naga KONNYÜONGAOLAI 6 Bible Online

KONNYÜONGAOLAI 6 - Konyak Naga bible

KONNYÜONGAOLAI 6

¹Wanghenyu phang me kahta ühalante ngaoting ye-i-pe yemeipe lingpu taowe leiye ok.

²Kahwange ütamte moth, minyong ngampai, hüyange toinyunanha phalak, hüke Iye lengpu khongkümpu, hüpoi tüopa tangme I mongmei ne yetam. I nanleiye yinpa ütam-e tüopa tangme hoongli mongonglak. Hatüowa jajang japu, hüyange tüolan khongkümpu yeshu.

³Kahta ja me hayim gho ja ngohne ok, hüyange jinlaowe nyoi, hüpoi I hangshin jinlao hangne-o yeje, Iye I jing meitam mongmei yetüoma-a hüyange mangmulak nyoimei yetüoma-a, hüma-a taowe hatüo inang, nao mang me puh taipupa shemeipu.

⁴Hangjingne hatüowe inang, wangnyak me hatüo ye-ngepe mahnang, ümeken me tüopa pemah nang.

⁵Hatüowe wanghe wangngai aope-o ye-nge yejema-a üyin-a hangkihpu yeshing, tüoyangpoi Iye toloi meipupa-a tüonang,

⁶I wangpeng haja ni ngohyahpoi kahta jawe I üyin mongmei aope-o yetüo. Tüopheima-a, moini nyoijing jate muh tainang.

⁷Kahta jawe Iye lingpu toishao lili-a ju me hahlak jingne lingnang, hüpoi I me aope-o heeimei-e yengoh.

⁸Hangke iye kahta kentamongtingpa ja-a üngapa phei shemeipupa ne mengpu? Üyin me hüopu phei hangke hüolak shinglak jingne toiha kahta jate hanghe toimei lingpu?

⁹Hatüo-o jajang japu; hatüowa wangyangte jangpu kih hei ngohnang. Hipak phe me ünyei ülamja yahhuwe ngohpu phei-a nang me hanghe ngoh tüo phei monghah-e ngohpupa shemeipu.

¹⁰Sheminlam phe hanghe yin ngaiyangki tüolan-a üshong wantemuh monge tümyangki, hüyange teman üsheiye shingnang kahta jawe Iphei wong shenangpupa phei tokteipu ye-oklak.

¹¹Nange hangshin laowe ngao, teshinne jajang japu, hüyange nangme meipu hango yenanglak.

¹²Hangke kahta jawe shohkünohpu I jajang japu üyin me yashüm ja leye linne taipu üyin ja me, hanghe shemeipupa shinge oklak? I liphei me hanghe ngailak hangke üyin jawe shinge oklak?