Read Konyak Naga KONNYÜONGAOLAI 7 Bible Online

KONNYÜONGAOLAI 7 - Konyak Naga bible

KONNYÜONGAOLAI 7

¹Minmei tüopuwa pheei-wanne shakpu pholak minnga phei shemeipupa; hüyange lipu nyih-a puhpu nyih phei shemei pupa.

²Ümeken me motappu ngoh tüoken te taileima ümeken nok me mangshappu ngoh tüokente taipu shemei; hangjingne üyin ngohpu üsheiye hipak phe me teman üshei jingne lipuwe tannang she iman nying nyingke teihne tamnang.

³Mongmenga nyiyaipu phei shemeipupa; hatüowe nang sheta mengne tamne ok, hüpoi hatüowe nang kenmong nah tamnang.

⁴Kentamongting mongjanga mangshappu nok me ngoh nang; hüpoi ngayounpu mongjanga hoonglimongongpu nok me ngohnang.

⁵Kahta üngapalan-e nangte minyong hem lokke tampu phei-a kentamongtingpalan-e menge teetampu nang jingne shemei.

⁶Hangjingne tükte huh-e kinpu wüng kih-e ngayounpa nyiyaipu-a ngohnang; tüopa-o jajangjapu.

⁷Ütingme shaoshiyateng ne tampuwe kentamongtingpa üngapa ne linge tamnang; hüyange yakjai-e mongjang püohpin tam nang.

⁸Ülam ja ükong wangpu phei-a showe peipupa shemeipu. Nünne okpuwa otapu phei shemei.

⁹Mongshih ngaine tah mam; hangjingne mongshih ngaipuwa juteih yenangpu yashong me lojing yahnang.

¹⁰Sha-apu phei-a hangne üshongwanpa shemeipu? she nange tahtong. Hangjingne tüopa jeng-a nange juteih ngohpu jingne tongpu ne yeje.

¹¹Konjonga mothlei meipu shin-e meinang; Eihyang, wanghe ngepulan jingne tüopa-a shemeipu ngohnang.

¹²Konjonge shaoyin nang, hüke muh ngin-e shaoyin nang; hüpoi shinge okpupa küo-a hatüo ngohnang: hüke juteih ümei-e üyin-a tükke angnang.

¹³Kahwange hanghe lingyangki tüopa jeng teih leihu. Iye hanghe komküyak lingyangki aowe hangke tinge linge oklak?

¹⁴Jalunpu hipak me mongmei tüoh, hüpoi aope juwan menglakeih teih tüotüoh. Kahwange ja-o ja-o lingngai, tüone menge kahtawe ngoikülak hipak me hanghe peikülakeih shinge yenang.

¹⁵Tüolan khongküm taowe ü-jajang japu üyin me ngeteki: Khakshupu kahta ja yoi khakshupu me mahnang, hüyange ümeng kahta ja yoi toishao ümengpa linge yoi üyin jin laonang.

¹⁶Tüokhei jamloi khakshupa ne-o tahmeng, yejema-a jamloi kentamongtingpa ne-o tahmeng; hangne nange nang nying nyingke toilak shi?

¹⁷Hüpoi jamloi ümengpa ne yejema-a jamloi üngapa ne-o jaja he ne-o tah meng, hipak manngoi pute hangjingne nang lilak?

¹⁸Nange tüopa tükke angpu-a meinang; tüopa mepu-o nang yak tahlan; aowe Kahwangte nyamnang tüolan khongkümpu mepu I yinpu oklak.

¹⁹Chingnyu ja me wanglam lampa pen ne lingpu phei-a konjonge kentamongtingpu kahta jate wong phapu shenyeipu.

²⁰Kahtoknyu me hipak üshei me ütingpa shaha lingpu hüyange aope-o yepüoh yepinpu khakshupu kahta ao-o yenang.

²¹Kahtalan-e ngaopu ngao lilite mong tah pha, hüleima nang shaoshanpawe nangte teetampu nange jaitüoh;

²²hangjingne nange ülao kahtalante hipak phe me teetamyangki she nange nang nying nyingke shing.

²³Tüolan khongkümpute taowe konjong jonyange tokke leiyangki; taowa kentamongtingpa yangma she mongeteih, hüpoi hatüowa ü-phei ye-o-pe ngohyangki.

²⁴Üyinte leppuwa hanghe, hangke aowe tüowe oklak? Hatüowa teman jingne jamloi lu, shinge yahlak jingne jamloi wan.

²⁵Taowe ü-nying nyingke manlam yamlakte, konjong yamlak jingne taowe mongeteih hüyange taowe tongyangpulante janlaklan hüyange ümongpa-a hangke hüyange ngayounpa-a hangkihpu she shinglak jingne mong phünne pha.

²⁶Taowe lilak phei-o shekhahpu ne sheko ja tüo, yhawe nangte phapu nyakkenpuwe nanga hankhak me yejema-a shaan me phopu kih phophalak; hüyange yha yakke nangte künpuwa yankeileiye phünpu kih künphalak. Kahta aowe Kahwang monghah ne tamnang yanne taipu oklak, hüpoi ünulan-a yhawe pholak.

²⁷Üting, konheingaopawe inang, aope taowe janne yelak jingne yamme ngoh, taowe hatüolan üjing jingha tüonang;

²⁸Taowe ülao janne yelak lam jingne lei hüpoi ja nehoi yetüo. Taowe yihnoon-e oklak ne haja yo me netan ja taowe tüo, hüpoi sheko ja nehoi yetüo.

²⁹Tüolan khongkümpu taowe shinge okpu ngoh nang. Kahwange kahta-a lanta-akke hüyange tingkhakke ling, hüpoi kahtawe yoi nying nyingke shangmu ne ling.