Read Konyak Naga KONNYÜONGAOLAI 8 Bible Online

KONNYÜONGAOLAI 8 - Konyak Naga bible

KONNYÜONGAOLAI 8

¹Kentamongtingpu kahta ja leye ao ngohnang shi? Hüyange ülam ja ngao lüppe ilaka aowe shingnang shi? Kahta ja me ngohpu konjonge I sheta wangngai tamnang, hüyange I wanwongpu mepu jeileine tamnang.

²Ahngpawe hanghe ilakei lingtüoh, taowe inang, hangjingne nange Kahwang sheshao me jiengjep.

³Ahngpawe Iye hanghe leng lingkülak, tüokhei I shong mepu yantüoh; hükihpu ütuh nyoi me tahngoh.

⁴Hangjingne Ahngpawe wong phei toi lingnang, hüyange Iye hanghe ling aowe-o Iphei tokteine ye-ok.

⁵Nange I ngaokenglan jaiye ngohma-a, nanga yinne ngohnang, hüyange kentamongtingpawe hangke hüyange aope tüopa linglak shingnang.

⁶Shemin lamphe linglak jingne khakshupu hipak ja hüyange ütingpa lamnyu ja ngoh nang, hüpoi kahtawe üjingha hei shingnang!

⁷Hanghe ngaikülakei kahta aowe-o yeshing, hüyange Ite ngaowe tamlak jingne ao-o yenang.

⁸Aowe-o wangyang tien oklak ne wangyang tangme ünganwong yenang, yejema-a aowe-o yoi nying nyingke lilak mepu tükke ye-ang oklak yejema-a I lilak nyih yah teipu ye-oklak. Hatüowa shapju ja kahtawe yinpu ye-oklak; kahtawe lowelam-e teine tampu ye-oklak.

⁹Aope hatüo wanghenyu phang me lingpu toishaolan jeng taowe teih, kahtoknyu ja ümeken me kahtalan ütam-e wong tüowe ngoh hüyange ülaolan-a iman phang me shaoshilak taowe tüolan khongkümpu nge.

¹⁰Üting, ümeng kahtalan iman mangjong me mang mupu taowe ngeyangki, iman üjao nyoijing lante onge pei-e linglei, chingnyu me ümeken me iman-e ünu ling, kahtalan-e imante minyong pha. Hatüo-o jajang japu.

¹¹Hangne kahtalan-e tümyange shaha ünu ompu? Hangjingne ima-a ümeng lingpute mam mamshe shaoshine yetam.

¹²Ünu kahta jawe ghoja me ünu omne ok hüyange üyin memuh ngohnang. Oh üting, iman-e hanghe i taowe shingnang. “Nange Kahwang ngao jaima-a, sheminlam phe hei meilak,

¹³hüpoi ümengpa jingne hatüo meiye yetailak. Iman üyin-a yashüm ja leye hüyange iman shela wantemuh lilak, hangjingne ima-a iman-e Kahwang ngao yejai.”

¹⁴Hüpoi hatüo-o jajang japu. Kahtoknyu me hanghe ngainang leihuyah: hipak ja ja me ümenglan jing shaoshi khakshupu kahtalan-e tüonang, hüyange ümeng kahtalan-e khakshupu kahtalan hünghao tüonang. Taowe inang hatüo-o jajang japu.

¹⁵Tüokhei kahta jawe I nying nyingke mongmeilak wongpong she taowe monghah-e teih nang, hangjingne hatüo üyin jin me I mongmeilak-a hahlak hüyange yinglak hüyange I nying nyingke mongmeiye ngohlak hei ngohnang. Hatüolanpa-a hüke hatüo wanghenyu phang me Kahwange Ite phapu üyin hipak me shange lingyangpu jingne Iye-o lingpu oklak.

¹⁶Hangkih tingme tao kentamongtingpa ne menglak jingne ngang hüyange hatüo kahtoknyu me hanghe ngai shinglak jingne ngang, taowe teihtüowe okpuwa wangnyak wangngai nang mengha-e ngohlak me ngainang;

¹⁷hüwante Kahwangpa toishao lili taowe nge, hüke wanghenyu phangme hanghe ngaihüm nang, aohe-o yamtüopu ye-ok. Tüoyangpoi, jaja shinne wanne nang ngangyapoi, nange aope-o yetüo oklak. Kentamongtingpu kahtalan-e shinge oklak jingne iman-e ngangne ok, hüpoi iman-e ye-oklak.