Read Konyak Naga KONNYÜONGAOLAI 9 Bible Online

KONNYÜONGAOLAI 9 - Konyak Naga bible

KONNYÜONGAOLAI 9

¹Tüolan jeng khongkümpu taowe laowe hüyange wanne teihnyüo, hüyange kentamongtingpalan hei khakshupu kahtalan toishao, iman-e kenpu hüyange iman-e nupu nehoi Kahwange woinang she nge. I sheshao me hanghe tümyange ngoh aowe-o hanghe-o yeshing.

²Hatüowe hanghe yoi yoi ne-o yengai tam. Jakihpu yatuhshao muh khakshupu hüyange ünupa tangte, ümeipalante hüyange ümengpa tangte, aoyin ütinglakpute wongnang hüyange aoyin wong yenang tüolan tangte, aoyinne toidopu pha, hüyange aoyinne yepha tüolan tangte peinang. Kahta ümei ja-a ünu kahta ja phei hanghe shemeipupa ne-o yeje; jiengjeppu yahpu kahta ja yeyahpupa kahta ja phei shemeipupa ne-o yeje.

³Hatüowa moilante jakihpu yatuhshao peinang, hüyange hatüowa wanghenyu phang me ngaipu yeshupu yo me ja ngohnang. Kahtalan üyin ngohpu hipak mongme, iman kenmonga ünu hüyange ngayounpuwe maawe ngohnang, hüyange mokhshe iman li nang.

⁴Hüpoi üyin ngohpu kahtoknyu me ao ne menglakei mengyapoi üyin me ngohpu ne mengma-a monghümlak ütam ngoh nang; hangjingne üyin me ngohpu kuiha ja-a yengkong mailang ümang phei shemeipupa.

⁵Üting, üyin me ngohpalan-e iman lilak she shingnang, hüpoi ümange hango yeshing. Iman jingne hünghao tüolak hango yenang; iman-a lanshe pemahteki.

⁶Iman-e kenpu, iman-e nupu, iman-e loishe shangnyakke teihpu, khongkümpu iman phei liteki. Tüopa wanghenyu phang me hangheyin ngailakei iman-e nishe aope-o meitam yahne ye-ok.

⁷Taitüoh, nang hahying hahtüoh hüyange mongmeitüoh, nangjing wuwüngti yingtüoh hüyange hoongli mongonge ngohtüoh, hangjingne nange hanghe ling Kahwange meiteki she inang.

⁸Nang oleng-a hipak phe me he-eange ngohne tamtüoh hüyange hipak phe me nang shang me minnga photüoh.

⁹Hatüo wanghenyu phang me Kahwange nangte phapu jajang japu üyin ngohpu hipak mongme, nange kenpu shekonyu phei üyin mongmeiye ngohtüoh. Tüopa tepu jajang japu nyihlan me mongmei tüoh, hangjingne wanghenyu phangme nang shangyangpu khongkümpu jingne nange tüolaka tüolan hei ngohnang.

¹⁰Nange hangheyin ling ngange toi lingtüoh, hangjingne lipu yimching me toilingpu yengohlak, juteihpu yenanglak, manlam yenanglak, konjong yenanglak, hüyange tüopa nyoite nang tainang.

¹¹Taowe wanghenyu phang me ülao ja nge, hatüo kahtoknyu me phette okpalan-e hipak phe me üshüo ngoiye okpu ye-nge, hüyange mongyongpalan-e hipak phe me shapju okpu ne yeje. Kentamongtingpu kahtalan-e hipak phe me hahying tüopu ne yeje, jelo pheipu kahtalan hipak phe me hakpu ne yeje, hüyange okkeshangpu kahtalan hipak phe me ütahpa shotjing tüopu ne yeje. Moilan phei yatuhshao ümeng hüonang.

¹²Nang hipak aope peikülak nange aope-o yeshing. Tün me mokhshe phopu awhalan kih-e, shaan me ompu nyah kih-e, kahta üha-a ünupa ülam jawe tüntünyange kahta tangte aope ngoikülak yeshingpe ngohnang.

¹³Taowe üne-o wanghenyu phang me hatüo konjong hangshin yihnoon, leppu ümei ja nge, hüyange hatüo üjingne toi nyu ja she lei ok.

¹⁴Meiyange kahta-o yenangpu chingha ja ngoh. Wongnangpu ahngpa jawe tüopa chinghah. Iye tüopa ching neikon hüyange jantpenyu menge onge welak jingne tüm.

¹⁵Tüopa me toiha kahta ja ngoh hüpoi I konjong ngohpu kaiye tüopa ching yinnetam. Hüpoi phei me I jeng aowe-o teih-e yetüo.

¹⁶Taowe hipak phe me ngaoyangki konjonga wong phei shemeipu, hüpoi aowe-o toiha kahta konjong phei ngohnang she yeteih tüo yejema-a Iye hanghe i, tüote mong yepha.

¹⁷Woowapu bangha yome wanglam lampa jawe üngwünpu phei-a konjong pheipu kentamongtingpu jawe jünge ngaopu ngao jaipupa shemei.

¹⁸Konjonge yonglah phei ünyei shemei she lingnang, hüpoi ünu kahta jawe toimei maawe mahtam nang.