Read Konyak Naga SOLOMON HEM 4 Bible Online

SOLOMON HEM 4 - Konyak Naga bible

SOLOMON HEM 4

¹Ü-mongkennyu, nanga hangshin naoyha meipu! Nang shanglüm khek phang me nang mük-a awshu kih-e ngohnang. Gilead kahtang me youn ükhong teishunge tapukih, nang shangmin lan-e polok nang.

²Nang fa-a sha-a meimei ümin khüppe hüyange poiye shopu nyee kih-e henge; ja nehoi yeyeitaipe, iman khongkümpu khakshuwe meiye ngoh nang.

³Nang jupenlan-a jaoshepu nye phinha kih-e, aope nange ngaolakei hangshin shemeiyao mapu! Nang omtüowa nangjing shanglüm khek phangme chamuk khünglengpu kih-e teehenang.

⁴Nang üngshüm-a David daonok kih-e, toiküloi hüyange neneckke, naomeilan ree haja neikonne jhotyang pu yük kih-e ngoh nang.

⁵Nang düam ni-a khrina kih-e, shengshap jupeng yome hahyingpu meishi nipet kih-e.

⁶Shom wangyang manlei manlei hüyange wangnyak linne mantai mantai, tao yingwangti kahtang, üpe ümei pepu kahtangme ngohlak.

⁷Ü-mongkennyu, nang hangshin wangngoi, nang hangke naoyha meipu!

⁸Lebanon kahtanglan mepu ü-phei yukei, ü-nyemnya nyu; Lebanon mepu ü-phei yukei. Amana kahtang ütang mepu yukei, Senir kahtang hüyange Hermon kahtang, ümeken me yengkong mailang hüyange shahhalan nyoi, tüomepu yukei.

⁹Nang mükte ja me leipuwe, yhamei hüyange ü-nyemnyanyu, hüyange nange yükpu yükke ü-mongjang phoh yahteki.

¹⁰Nange kenpuwe üte mük eppetam, yhamei hüyange nyemnyanyu. Nange kenpuwa wuwüngti phei shemei. Nang pepuwa üpeameipu üshei phei shemei she penang.

¹¹Nang jupen me zahtai jelo üwüng ngohnang, Ü-nyemnya nyu; nang yi-a üjingne düamyeng hüyange zahtai jelo. Nangjing nyemo me Lebanon üpe ümei üshei ngohnang.

¹²Ü-yhamei, ü-nyemnyanyuwa lowe angpu pesha, meimei-e pepeyangpu pesha, yoijingne tünne, angpu yengpeiwo;

¹³tüoken me deihaliha jalun nang. Iman-a chamuk pelickjong kih-e jongnang, hüyange shemeipupa ülick licknang. Henna hei nard üpe ümeiye,

¹⁴saffron, calamus, hüyange longkhok, yejema-a üpeameipu ülam liliye toinanne yenang. Shemeipupa üpe ümei ngaine tamme tüoken me yingwangti hei khahkoipe ngai nang.

¹⁵Yengpeiwo mepu yeng ngaipu pesha, yeng yünne ngohpu yengyin, shaohalan Lebanon kahtang mepu wongnang puphei yünne ta-nang.

¹⁶Apye wangyang, lüotüoh. Heye wangyango. Ü-peshate leitam tüoh, üpeameipu wangyange maatam pha. I jing peshate ümai peine tamtüoh hüyange tüomepu shemei pupa pelick hahne tamtüoh.