Read Konyak Naga SOLOMON HEM 7 Bible Online

SOLOMON HEM 7 - Konyak Naga bible

SOLOMON HEM 7

¹O ahngyha lepu naoyha, yashom shomyange nang ya-a hangshin shemei yaomapu! Nangjing yungkeng üpong hüojinga toinyu long kih-e, manyangpa yak aijonpa toishao kih-e ngohnang.

²Nangjing hoongpoka nyütyang phei wuwüngtiye toinanne yengohlak; Nangjing seanyu wheat tah shünge angpu, shengshap jupenge neikonyange ngohpuke.

³Nangjing düam ni-a meishi nipet kih-e, khrina nipet kih-e ngohnang.

⁴Nangjing üngshüm-a meinyufa daonok kih-e. Nangjing müklan-a tüopa chingnyu üyong peten shong mepu Heshbon chingnyu yengnung kih-e. Nangjing nateang-a Damascus yomme yongpu Lebanon daonok kih-e lahnyiklakpa ne.

⁵Nangjing shanga Carmel kahtang shinne daowe ongyange. Nangjing shangmin-a mongjüonge takyang phei shemeipupa khek kih-e phihlange shangwüo shayange; ahngpa ja-o tüopa shemei yaomapuwe phopu okke ngohnang.

⁶Nanga hangshin naoyha mei hüyange shemei yaomapu! O kenpunyu, nange kenpu hangshin wangngoipu.

⁷Nanga logpee hangshin meima teshinne meiye, hüyange nangjing düam-a loglick ütüp kih-e.

⁸Tao logpeete onglak hüyange tüopa ülick khailak. Üjingne nangjing düam-a wuwünglick ütüp kihwe, nangjing lüowa shangfai üpe ümei kih-e;

⁹hüyange nangjing ju-a shemeipupa wuwüngti kih-e ngohnang. Tüokhei wuwüngti-a tingkhakke ü-mongkenpa tangte yünne tashih, I jupen hüyange fa tangme yünne tashih.

¹⁰Taowa ü-mongkenpa jing, hüyange Iye üte lahnyik nang.

¹¹Kei, ü-mongkenpa, chingshao kahmük yekaote taihah, hüyange chingshaolan me nyak linne ngoh hah.

¹²Teman shonge laolak hüyange wuwüngwute leilak, iman jongne ükong wangman shi leilak. Üpenglan-a üju eppe wangmanshi hüyange chamuk lan-a pengman shi leilak. Tüoken me taowe nangte taowe kenpuwa phalak.

¹³Nange moipe üpe pepu oklak, hüyange yahhukeipu pelickwenglick üshei teman taten shongme ngoh nang, Ümongkenpa, taowe nangjingne ülang hüyange üla tümme angyange ngohnang.