Read Konyak Naga SOLOMON HEM 8 Bible Online

SOLOMON HEM 8 - Konyak Naga bible

SOLOMON HEM 8

¹O nanga ü-nyuwe yoi düam uhyinge jongne tampu ü-nao ne taowe menge tamhunang. Hüma-a, taowe nang chingyang me hüoma-a, taowe omhüp pu oklak hüyange aowe-o üte hangke-o yeteihlak.

²Taowe nanga ünyu nokte woi peihah peih, ümeken me yhawe üte kenpu jeng nyüowetam. Taowe nangte nyütyang phei wuwüngti pha ha peih; ü-mepu chamuk wümyeng yingne tamhapeih.

³O ü-üngphang me I yaknya ye, hüyange Ijing yakjah ye-e üte paowe tüknang.

⁴Jerusalem shekolan, toman teikenpute numan-e yepok yenolak she üte janpha.

⁵Yhawe kenpupa phei üng me teikünyange wanwüngjeng mepu ngaiküpu hatüo ao shi? Shangfai pee phangme taowe nangte loitam. Tüoken me nangnyuwe nangphei shaoshi pong, tüokenme yhawe nang shaoshipu phei puhtam.

⁶Üte hei japa nang mongjange aote-o tahken, üte hei künlak japa aowe-o nang phaktang me tahpai. Kenpuwa lipupa shinne wongnang nang, loishe nyakkenpuwa li ne tampu wongnangpu shinne wongnang nang. Hatüowe vün ne menge phüpnang hüyange jamloipu vün kih-e hatüo hahtam nang.

⁷Yeng üngange tüopa meiwinne ye-ok, yejema-a muleampuwe-o tüopa omme winne ye-ok. Hüpoi ütamjawe yoi moth khongkümpu phei kenpu shak ne ngangma-a, yaowelepu khongküm Iye tüolak.

⁸Toman ünao yhamei ja ngohnang, hüyange yhajing düam-a üne-o manpook shoinang. Aope nyih yhawe tüopa jingne ngaolakeih, toman-e yha te hang ilak?

⁹Yha jantpe ja ne mengshihma-a, toman-e yhate khüm phei daonok ne wetamlak. Hüpoi yha taküp ja ne mengshihma-a, toman-e yha-a cedar pephatlan phei jongwanhah shepu.

¹⁰Taowa jantpenyu ja, hüyange ü-düamlan-a tüopatepu daonoklan. Ü-mongkenpawe I phei taowe monghahpu hüyange chingmei tüonang she shingnang.

¹¹Baal Hamon she nyikpu nyoi me Solomon-e wuwüngkah ja ngoh. Tüoken me kahhampalan ngoh aoyinne I mepu peng; moilan-e khüm ngin haja japong phawe ngohyangki.

¹²Taowe ü-yoijing wuwüngkah ja ngohnang! Solomon-e Ijing ngin haja te mongmei, hüyange kahhampalan-e iman meitam ne gho nite mongmei.

¹³Pesha mepu nang ngaowüng taowe jaihu nang, O nang; Ü-eihalan-e nange ngaopu jailak jingne tanne ngoh nang.

¹⁴Ü-tangte ngoikei, ü-mongkenpa, ümeken me üpe ümei jongnang tüopa kahtang mepu, khrina ja kih-e, meishi üpongha ja kih-e ngohtüoh.