Read Konyak Naga ISAIA 1 Bible Online

ISAIA 1 - Konyak Naga bible

ISAIA 1

¹Hatüo laitep me Judah kahtok me aope Uzziah, Jotham, Ahaz, hüyange Hezekia iman ahngne ngoh, hüwante Kahwangpawe Judah hei Jerusalem jingne Amoz üha Isaiate ütahte ngaipu ngaolan ngohnang.

²Youngwanpawe i, “Kahtok hüyange wangdang, Taowe hanghe i, tüopate jaipha! Taowe paowe tükke yah ngaipu ühalan-e ü-phei tüi-e hokke yongnang.

³Mahu üponge yoi nokpu shingnang, hüyange gadowe yoi nokpuwe imante ümeken me uhying shingnang. Hüpoi ü-kahta, Israel-e ünyei shinghah shepu nanleiye, iman-e hango yeshing hüyange yeteih tüo.”

⁴Numan ünupa jat, numan kuhleih hüyange ünu lingpu kahtalan, numan mahnang! Numan ünuwe numan shui-e yeitainang! Numan-e Youngwanpa, Israel Kahwang Üjaopa winne tüoh, hüyange Ite numan-e tokshong.

⁵Hangne numan-e hokke yongpu? Numan-e tüophei shenyei she shaoshipu tüohu pu a? Israel, nang shang me-a maakowe maateki, hüyange nang mongjang hei kenmongme dak ngaiteki.

⁶Shang mepu yashong ngoiye, nang pümme meipuken ja nehoi yenang. Nangme maa hei ütu hüyange üko maateki. Nang tepu maako yepoitam hüyange nyeih yetam. Tüolan meilak jingne muli hango yepho tam.

⁷Numan jing kahmük-a wüngmakke linge tamteki, hüyange numan jing chingnyulan-a kahtok ne menge jakteki. Aope numan-e tüopate lei, kahhenglan-e numan kahmük-a yahyange shemin lamphe heamme mengnetam.

⁸Monghümlakpa yenangpu wuwüngkah mepu yomtep kih-e yejema-a, maikoh kahtepu pemsheam kih-e, Zion yhala shaha tüoh.

⁹Ütahpa Youngwanpawe kahta ütam yinne ye-ang shihma-a, Sodom hei Gomorrah kih-e Jerusalem lanshe mahne tamyange ngohhah shepu.

¹⁰Numan Sodom wanglam lampalan, Youngwanpa ngao jaitüoh; numan Gomorrahlan, Youngwanpawe nyüoleipu ngaote na shongtüoh.

¹¹Iye inang, “Nange üte toidopu tüolan khongkümpu Taowe yahhuwe ngoh nang she teih nangkü a? Nange jakke dopu nyee hüyange shemeipupa yinmoklan üyao wangyange-o nyeiye taowe tüoteki. Mahu üpong iy hei nyee hüyange younlan iy me Tao eangteki.

¹²“Aope üte yoppekhümlak jingne nang peilakeih, tüolan khongkümpu üte yah peikei she nangte aowe tongpu? Aowe ü-khümjing me yalokke peiye linglak nangte tongpu?

¹³Numan-e dopu yah peilak-a jajang japu. Nange jakpu sünyet üpe te Taowe nuwe teihnang. Nange lingpu Lela mopulan, nange jonpu Sabbath, hüyange mengpu wanglamme shüppe jempu sheshao me Tao ngoh ne ye-ok; tüolan khongkümpuwa numan ünu kaiye mengkümteki.

¹⁴Numan-e Lela Mopu hei Ülao nyüonyapute taowe nunang; tüolan jingne taowe nün okpuwe eangteki hüyange hangki yih ne mengteki.

¹⁵Aope numan-e yoplak jingne yak honglakei, taowe numante yeleilak. Numan-e hangshin yonge phünne phawe yoplakei yopyapoi, taowe yejailak; hangjingne ima-a numan yak me iy lüpyange ngohnang.

¹⁶Numan nying nyingke jaosheye poitüoh. Taowe ngeye numan-e linghümpu ünu lingpu üshei mepu lak tüoh. Üting, ünu lingpu mepu laktüoh;

¹⁷hüyange ütingpa linglak shinge yah tüoh. Ngaotingpa me phünlak teihtüoh, aoyin yemeipu yafün me ang tüolante jamtüoh. Khah-ha lante iman tingtampu hüotüoh, hüyange wümnyulan yintam tüoh.”

¹⁸Youngwanpawe inang, “Sha-a tüopa jeng ngaowe shohah. Nang ünu ta-akke phoyange ngohpoi, hüpoi Taowe nang ünuwa yi kih-e henge jaowe tamlak. Iy ünyak shinne jeiye phoyange ngohpoi, nanga mat hengpu shinne henge jaowe tamlak.

¹⁹Nangehi ü-ngao jaima-a, kahmükke ngaitampu shemeipupa-a nange hahlak.

²⁰Hüpoi nange Tao nushakke tamma-a, nanga mahtailak jingne lilak. Tao, Youngwanpawe ngaoyang ki.”

²¹Hipak ja me monghümme ngohyangpu chingnyuwa phwngngamnyu kih-e nyoingoh hüo nang! Hipak ja me khakshupu kahtalan shaha ngoh, hüpoi shaapa-a toilangpalan hei to nang.

²²Nangjing khüm-a angsa ne mengteki, nangjing wuwüngti-a yeng phei nyüt teki.

²³Numan jing woipalan-a ümeng ngaipalan-e hüyange kahphünpalan shümpa ne. Hipak phe me iman-e hünghao hüyange yakjai yah nang. Iman-e ngaophün jingme aope-o khah-halan yinne yetam yejema-a wamnyulan-e aope iman ngao yah peilakeih mong yepha.

²⁴Tüokhei sha-a, wongnangpu Israel Kahwang, Ütahpa Youngwanpawe hanghe inang jaitüoh: “Taowe üwepane mengpu nang tangme phuh hahlak, hümme nakshih shaaji üte shangpu yepeitamlak.

²⁵Taowe nang phei tüi-e yak hünglak. Yan hangke howe jaoyapeih hüke Taowe nang jaowe shinlak, hüyange nang mepu yejao yeshapu üshei winlak.

²⁶Taowe nangte üshongwante numan-e ngohyangpu kih-e wanglam lampalan hüyange paowetükpalan phalak. Tüophei me Jerusalemte Üjaopa hüyange ütinglakpu chingnyu she nyiklak.”

²⁷Ngaotingpawe Zion shakshinlak, hüyange yha mepu monglüppalan khakshupuwe yintamlak.

²⁸Hüpoi aoyinne ünu ling hüyange I phei hokkewe tüolili Iye mahtamlak; aoyinne I yeyahlakei moilan Iye mahtamlak.

²⁹Numan-e longkham pephaolante yoppe khümyangpu jingne wüolak; hüyange khümme wümlak peshalan angyangpu jingne numan mongmenglak.

³⁰Numan wanne mahpu longkhampee kih-e, yeng yenangpu pesha kih-e numan kuimahlak.

³¹Tahjan angpu nyoite, vünloonge pah-e wangpu kih-e; wongnangpu kahtalan-o iman-e lingyangpu ünu toiye mahtamlak, hüyange mahpu mepu tükpu ye-oklak.