Read Konyak Naga ISAIA 10 Bible Online

ISAIA 10 - Konyak Naga bible

ISAIA 10

¹Numan mahnang! Numan-e yeshupu ngaokhüm ling, tüowe ü-kahtalante shaoshi pha;

²Tüokih-e numan-e toihalan iman ütingpa mepu hüyange ütingpa ngaophün phalak mepu tien. Tüokih-e numan-e wamnyulan hei khahhalan mepu toinyunanha yah.

³Aope Kahwange nangte shaoshi phalakei nange hang linglak? Aope Iye kahmük üjai mepu nang tangte mahlilakpa peine tamlakei nange hang linglak? Jampu yamlak jingne nang ümekente phetlak? Nange nang moth-a ümeken me lolak?

⁴Numan-e shapju me toilak yejema-a phowe teipu ükhongne shayange yahlak. Tüoyangpoi I mongshih ngaipuwa üküm ne yejelak; shaoshi phalak jingne I yak yelakpe nolak.

⁵Onyukei, Assyria! Aoyin kahtalan phei Tao mongshih ngainang tüolante shaoshi phane Taowe shengshaoh ja leye Assyria jonnang.

⁶Kahwang yeshingpu jat aoyin kahtalan-e ü-phei tüi-e Tao mongshih ngaine tam, tüolan chinghah tamlak jingne Taowe Assyria shon. Nyieyahlak jingne hüyange kuhlak hüyange chingkeng lamnyu mepu mak kih-e kahtalante yalokke tamlak jingne Taowe iman shon.

⁷Hüyangpoi Assyria ahngpawe yoi mongme yemeipe yakphei lüklak jingne yoiye tümpu ja ngohnang. Jatlan üngang mahtamlak jingne Iye monge tümpu ngohnang.

⁸“Ü-woipalan lili ahngpa japong yeje a? she I ota-nang!

⁹Iye Calno hüyange Carchemish chingnyulan, Hamath hüyange Arpad chingnyulan ommeyah. Taowe Samaria hei Damascus ommeyah.

¹⁰Aoyin ahngchinglan-e peshaolan, Jerusalem hei Samaria me ngohpu peshaolan phei shephongpu te khüm tüolante shaoshi phalak jingne taowe ü-yak noyangki.

¹¹Taowe Samaria hüyange tüopa mepu peshaolan menge winyangki, hüyange taowe hükemuh Jerusalem hüyange tüoken me yoppekhümpu mienglante linglak.”

¹²Youngwanpawe i, “Aope Taowe Zion Kahtang hüyange Jerusalem me Taowe hanghe lingnang, shoyang phei me, Taowe Assyria ahngpate Iye kheyongyangpu hüyange otayangpu lili jingne shaoshi phalak.”

¹³Hangjingne Iye i, “Tüolan khongkümpu ü-nying nyingke ling. Tao wongnang nang hüyange konheingao phei deitah nang. Jatlan pa mepu yikenglan taowe khokke win hüyange iman-e yowe angpu toinyunanha yah. Aoyin tüome nyoi tüolan kahtalante mahu üpong kih-e shuwe yeitam.

¹⁴Kahtoknyu jatlan-a awha ülüp kih-e, hüyange iman moth-a awkeklan yahpu kih-e taowe poih yah. Tüokhei kahtoknyu khongküm taowe shaijem; Tao nyamme tamlak jingne üyang nehoi yejo. Üte jotlak jingne ümin nehoi yeboong!”

¹⁵“Wa jawe I jonpupa kahta phei sheyongpupa she ipu oklak a? Aowe tüopa jonyange pee wetnang tüopa kahta phei pewetlak sheyongpupa a? Shengshaoh jawe kahta ja nowe jonpune yeje; kahtawe shengshaoh nowe jonnang.”

¹⁶Ütahpa Youngwanpawe aoyin sha-a wangman-e hahyinge ngohnang, tüolante shaoshi tamlak jingne daktin shonlak. Iman püm me hah shaha hah-e ngohlak vün ngohlak.

¹⁷Kahwang, Israel wangngai, vün ne menglak. Israel jing üjao Kahwang-a vünloong ne menglak; hangheye nyih ja mongme huh hüyange hüng jupenglan nehoi khongkümpu hah shulak.

¹⁸Shemeiyaomapu phao hüyange kahne hampu kahmüklan lanshe, lilak dak-e kahta ja menge tampu kih-e menge winlak.

¹⁹Naha jawe nehoi iman-a ipu oklak ne pephaolan-a jamloi üjingha hei tolak.

²⁰Tüopa nyih me, jetohapu Israel kahtalan-e iman paküm she mahtampu jatte shaaji mong yenyenglak. Iman-e ütingpa me iman Youngwanpa, Israel jing Üjao Kahwangte ütinglakpu anglak.

²¹Jetohapulan leih yelak, Jacob jetohapulan wongnangpu Kahwang tangte leihyelak.

²²Sha-a iman Israel kahtalan yengching pheih pangpu shinne üngang ngohyapoi; jetohapu ja hei leihyelak. Kahtalan jingne mahlakpa-a yowe angnang, hüyange hatüowa khakshuwe tüolak wangnang.

²³Üting, kahmük nopu me Okkeshangpupa Ütahpa Youngwanpawe mahlakpa yahpeilak, Iye ngaoyangpu kih-e Iye linglak.

²⁴Tüokhei, Okkeshangpu Ütahpa Youngwanpa ao Zion me ngoh Iye yoi kahtalante inang, “Egypt lan-e numante shaoshiyateng ne tampu kih-e iman-e lingyapeyoi Assyrialante tahnyam.

²⁵Ütenjapu mongme Taowe numante shaoshi phapu küm-e peilak, hüyange tüophei me Taowe iman mahtamlak.

²⁶Tao, Ütahpa Youngwanpawe Oreb longnyu me Midian kahtalante Taowe shetpu kih-e ü-shetwu phei imante shetlak. Taowe Egypt te shaoshi ne tampu kih-e Taowe Assyria shaoshi ne tamlak.

²⁷Aope tüopa hipak peilakeih, Taowe Assyria wong mepu lanne tamlak, hüyange iman sheam shaaji numan phaktang me yengohlak.”

²⁸Iman Aiath te ong; Iman Migron kaiye tai! Iman-e iman jingne sheihshinpu Michmash me tüoh!

²⁹Iman-e lamkeng kai hüyange Geba me phapüm nang! Ramah jila mepu kahtalan nyamne tam, hüyange ahngpa Saul jila Gibeah kahtalan yanne tainang.

³⁰Üngwüntüoh, Gallim kahtalan! Jaiyah, Laishah kahtalan! Jantüoh, Anathoth kahtalan!

³¹Madmenath hüyange Gebim kahtalan iman üyin yinlak jingne phette tainang.

³²Tenyih wepalan-a Nob jila me, hüyange tüome iman-e Jerusalem chingnyu mepu Zion Kahtangte iman yaktüm hüonang.

³³Leihuyah, Ütahpa Youngwanpawe peequi ünne taipu wüng kih-e iman yeitailak. O shetahpupa hüyange iman yome shedaopupa lange tailak hüyange üphangme yeitamlak.

³⁴Phao ümongpa mepu peelan wa phei akke taipu kih, tüokaiye Lebanon pee shemeipupa nehoi toiye taipu kih-e Youngwanpawe iman akke winlak!