Read Konyak Naga ISAIA 11 Bible Online

ISAIA 11 - Konyak Naga bible

ISAIA 11

¹Jesse pejüng mepu üphao ja nien-e ngailak, hüyange I yalah mepu üqui ja jonge ngailak.

²I me Youngwanpa yaha, konjong hei shing okpu yaha, nyüoleiokpu hei wongnangpu yaha, manlam hüyange Youngwanpate nyampu yaha ngohlak.

³Hüyange Youngwanpate ngaojaipuwe I hoongli mongongpu ngohlak. I mük-e hanghe nge tüophei Iye ngao yephünlak; yejema-a nawe hanghe jai tüophei yesholak.

⁴Hüpoi Iye toihalante khakshuwe ngao phünlak hüyange wong yenangpalan ütingpa tükke anglak. I ju mepu ngaokenge kahtalante shaoshi phalak, hüyange I jupen ülüowe ümeng kahtalan toilak.

⁵Khakshupu-a I shieng me shienghit ne menglak, hüyange ütingpa-a shiengshüm me shienghit ne menglak.

⁶Sho hei nyee chingmei me jam-e ngohlak, hüyange shahnyu-a younha phei jam-e lamme ngohlak. Mahu üha hei yengkongmailang ühalan jam-e hahyinglak, hüyange hashih nahalan-e imante namnolak.

⁷Mahu hei shapnyulan jam-e hahyinglak, hüyange mahu üha hei shapnyu ühalan chingmei me lamyange ngohlak. Mahu-we hahpu kih-e yengkong mailange tahjan hahlak.

⁸Düam hahpu naotak ha lan-e pu üshate phohlak, hüyange hashih nahalan-e pu ülüp phei wonlak.

⁹Kahwang jing jaoshe ipu kahtang, Zion me, mayahlakpa yejema-a ümengpa hango yenanglak. Yengchinga yenge maawe ngohpu kih-e, kahmük-a Youngwanpa konheingaowe maayange ngohlak.

¹⁰Tüopa nyih me, Jesse yalah mepu ahngpa üla ja jatlante leppu ja ne yonglak. Iman yoijing ahngjong chingnyu me jemlak hüyange Ite yihnoonpu phalak.

¹¹Aope tüopa nyih peilakeih, Youngwanpawe üne-o yoi ünganwong jonlak hüyange aoyin kahtalan Assyria hei Egypt me; Pathros, Sudan, Elam, Babilonia, hüyange Hamath kahmüklan me, hüyange yengnah hüyange yengching dikhot yinme ngohyapeih, nokte yah yelak.

¹²Jatlante Iye Israel hei Judah kahtalan yanne ngohpu üne-o Iye jamshe shaijemlak; hüyange kahtoknyu ünuk peli me ngohpu iman leihyelak hüolak jingne Youngwanpawe füojai hüopu keiphong nolak.

¹³Ephraim müktakpu yantailak, Judah-e we ne mengpu halan ne menglak; Ephraim-e Judah te mük yetaklak, hüyange Ephraim phei shaaji Judah-e wepa ne yemenglak.

¹⁴Hüpoi iman-e jamshe henyip yekao me Philistialan chinghahlak hüyange aoyin heong yeme nyoi tüolan kahta phowe yahlak. Iman-e Edom hei Moab kahtalan omlak, hüyange Ammon kahtalan-e iman ngao jailak.

¹⁵Youngwanpawe Egypt yengching yengtung ea ne tamlak, hüyange Iye üjing jinghapu shaoyin nyit ne hei towe tüohyange; Euphrates ea tamlak jingne wangyang üshem peitamlak, tüokaiye kahta lili tüopa kaiye taipu oklak.

¹⁶Iman pajeiyonglan Egypt tüohyange yayongwante ngohpu meimei kih-e, I kahta Israellan jetohapulan jingne Assyria kaiye chingkeng lamnyu ngohlak.