Read Konyak Naga ISAIA 13 Bible Online

ISAIA 13 - Konyak Naga bible

ISAIA 13

¹Hatüowa Amoz üha Isaiawe Babilon jingne ju-itwanshempu ngaolan.

²Kahtang üko kahtüo me shapju khüokam yongtüoh! Üngwüntüoh; hüyange otapu chingnyu petenlan shümlak iman jingne füojai hüowe numan yak notüoh.

³Taowe üjao wehok hoklak jingne hüyange aoyinte Taowe mongshih ngai tüolante shaoshi phalak jingne taowe monghahpu hüyange otapu wetaipalante nyik-e ngaiteki.

⁴Kahtanglan me moppu ngaowüng, kahtalan üngang jempu wüng, jatlan hüyange ahngchinglan jempu wüng jaitüoh. Youngwanpa nyahponglan-e shapju jingne yoi ükhong tümnangki.

⁵Iman wangdanglan ükümye mepu kahmük üjailan mepu peiküki. Kahmük nopu mengwinlak jingne I mongshih ngaipu phei Youngwanpa peiküki.

⁶Jeihdak teiye shappe yoongtüoh! Youngwanpa nyih owe peinang; tüopa nyih Ütahpawe mahlakpa yahpei nang.

⁷Tüokaiye kahta lili yak mangteiye jhotlak, hüyange kahta lili mongjang khai mahlak.

⁸Iman khongküm nyamme mokhlak hüyange ütuhnap sheko shangpu kih-e shangpuwe iman tangme okpu ngelak. Iman nyampu sheta phei shejawe shejate teileilak, hüyange wüopuwe iman sheta sheamlak.

⁹Leihuyah Youngwanpa nyih peinang, I nyam nyamshe mongshih ngaipu hüyange yakphei lükke mongshihpu hüke mengshipu nyih peinang; kahtoknyuwa yenangpu ne linge tamlak, hüyange ünupa lili mahtamlak.

¹⁰Shanha lili hüyange shanha üphüoh liliye ütee yephalak. Aope I onglakeih wanghe nyakke mahlak, hüyange linnyuwe ütee yephalak.

¹¹Taowe kahtoknyute mahlakpa peitamlak hüyange iman ünu jingne ümeng kahta lilite shaoshi phalak. Aoyin otayapeih moilan taowe khaiye tamlak hüyange aoyin jamloinang moilante shaoshi phalak.

¹²Taowe shemeipupa hon toinanpu phei shetoi she kahtalan lingtamlak, hüyange Ophir hon phei nehoi shetoilak.

¹³Tüokhei Taowe wangdanglan ninne hüyange kahtok yoi nyoi mepu polak, hüyange aope Tao, Ütahpa Youngwanpawe ümongshihpu hüolakei, tüonyihpe kahtoknyu yoi yoi nyoi mepu polak.

¹⁴Tüome nyoi ngohpu kahhenglan yoi yoi kahmükte, meitoipalan sheshao mepu yinne phette taipu meishi kih-e, nyeeyompa yenangpu nyeelan kih phette yanlak.

¹⁵Aoyin phoyalakeih shunge tailak; hüyange aoyin pho khongküm yanglow me yeikümlak.

¹⁶Iman naotak halan-a iman sheshao me khoihnyaiye li ne tamlak, iman noklan-a nyieyah kümlak, hüyange iman shekolan-a kange toimeng jonne tamlak.

¹⁷Leihuyah, taowe Medealan henge tamnang. Iman khümngin jingne mongshange hango yeteih hüyange honne lowelam ne yetam.

¹⁸Iman jing wenglah hei lahhan phei iman-e jinlalan toilak. Iman-e naotak halante shüpshe yenanglak hüyange nahalante yayenge yeteihlak.

¹⁹Babilon üyong üshei phei müktishiwapu ahngching; tüopa mepu kahtalan jingne tüopa-a otapuphei ngoh okpu. Hüpoi, Sodom hei Gomorrahte Kahwange lingpu kih-e Babilon yeitamlak!

²⁰Tüoken me ao-o nishe yenyoi oklak. Waakempu Arab aowe-o tüoken me yoi nyenok yelinglak, hüyange nyeeyompa aowe-o tüoken me I nyeelan heei uhne yetam oklak.

²¹Hatüo nyoi-a wanwüng jengme nyoipu yinmoklan nyoine menglak hüyange ümeken me awkhuhlan-e iman ülüp ling, tüopa nyoi ne menglak. Yengmom awnyu tüoken me ngohlak, hüyange heamtepu nyoilan me meiyahlan-e hommetüklak.

²²Iman longwak hüyange ahngnok yinme sho hei hiyanlan-e lüngjan ngaiye wao ealak. Yakme tükke hipak peiteki! Yha jing hipak-a shaaji taine wongnangki.