Read Konyak Naga ISAIA 14 Bible Online

ISAIA 14 - Konyak Naga bible

ISAIA 14

¹Youngwanpawe nishe yoi kahta Jacobte yayeng shüpshelak hüyange yoi jingne Israel lelak. Iye imante yoi kahtok me nishe nyoine tamlak, hüyange kahhenglan peilak hüyange tüoken me Jacob nokphong phei ngohlak.

²Jatlan maapuwe imante Youngwanpawe phapu kahtokte leih yepu oklak jingne Israel kahtalante jamlak, hüyange tüoken me jatlan-e Israel lan rha ne shaoshanlak. Aoyin hipak ja me Israellan phowe yahyangki shaapa-a Israellan-e iman pholak, hüyange Israel kahtalante aoyinne hipak ja me imante shaoshi yatengne tam iman tangme wanglam lamlak.

³Aope Youngwanpawe Israel kahtalante iman shangpu hüyange shaoshipu mepu, hüyange imante kange jonne tampu toinyu mepu toloimei phalakeih,

⁴iman-e Babilonia ahngpate phoilak hüyange hüke ilak: “Mengshipu ahngpa yeiteki! Iye shaaji ao te-o nishe shangne tampu ye-oklak!

⁵Youngwanpawe ünu wanglam lampa wong hüyange shengshaoh üküm ngoine tam nang,

⁶aowe mongshih ngaipu phei kahtalante shangne tam, hüyange iman-e omme yahpu jatlante shangne tampu aope-o yelak.

⁷Sha-a kahtoknyu nopu chingmei phei toloi meinang, hüyange mongmeipuwe moilan-e hemlok nang.

⁸Yeitepu ahngpa tangme cypress pee hüyange Lebanon mepu cedarlan-e mongmei nang, ‘Hangjingne ima-a iman akke tailak jingne ao-o yenang, sha-a I-a yenang!’

⁹Lipu yimchinge nang aope peilakeih yahlak jingne tümnang. Kahtoknyu me aoyin wongnange ngoh tüolan mieng-a lüngleiye ponang. Ahngpalan mieng-a iman ahngpa shotjing mepu yongnang.

¹⁰Iman khongkümpuwe Ite nyiknang, ‘Sha-a nanga toman shinne wong yenangpe no! Nango toman yo me ja!’

¹¹Kongki ümtük hem wüng phei nangte yihnoonpu ngohyangki; hüpoi sha-a nang tüo me lipu yimching me ngohnang. Yong kaipu (yong pahpu) shinleng tangme nang lamnang hüyange yongyat-e nangte yüohyange ngoh nang.

¹²“Wangdang mepu nang hangke yeipu! O napning shanha , wangngai ju üha! Nanga kahtoknyute yeine tamyangki, nang aowe hipak ja me jatlante naowe lei!

¹³Nange nang mongjang me hüke i: ‘Tao wangdang te onglak; Taowe ü-ahngpa shotjinga Kahwangpa shanhalan tangme nowe inlak; Tao apyekao üjao kahtang ümeken me bangha jemnang tüopa kahtang me ahngpa shotjing linglak.

¹⁴Tao shedaopupa wangphom tangme onglak; Taowe ü-nying nyingte ütahpa ne linglak.’

¹⁵Hüpoi nang yimching shelupupa ükong ngoi-e yeitaiteki.

¹⁶Liye ngohpalan-e nangte ange leilak hüyange nangte ju kalak. Iman-e tonglak, ‘Aowe kahtoknyu powe tam hüyange ahngchinglan ninne tam hatüo kahta a?

¹⁷Aowe chingnyulan mahtam hüyange wanwüng jengne kahtoknyu leihkheih tam, hatüo kahta a? Aowe Iye küpnok me angpu aope-o taine yetam yejema-a iman nokte ye ne yetam tüopa kahta a?’

¹⁸Kahtoknyu mepu ahngpalan lili yoi yoi jingne okkeshange lingpu mangkoksa me lamnang,

¹⁹hüpoi nang mang jingne mangkoksa yenang, hüyange nang lipu manga seanamteiye winnang. Nang nyoi-a shapju me toipu wetaipalan mange shüngyange, iman phei jamme longkoksa me shüpyange, hüyange yamaiye lokke tamnang.

²⁰Hangjingne nange nang kahmük mengewin hüyange nang kahtalan muh toi, tüokhei nanga ülao ahngpalan kih-e yemulak. Nenok ünu noksa sheja nehoi yeyinlak.

²¹Toilanglaklan ükhong wangne tamtüoh! Iman pajeiyonglan ünu jingne tüopa ahngpa hayimlan lilak. Iman sheja nehoi kahmük me wanglam yelamlak yejema-a chingnyulan ne mengpu ye-oklak.”

²²Ütahpa Youngwanpawe inang, “Taowe Babilon chinghahlak hüyange tüopa heamme tamlak. Taowe hango yetüohlak, nahalan yetüohlak, towe tüohpu ao-o yenanglak. Tao Youngwanpawe ngaoyangki.

²³Taowe kahsho ja ne linge tamlak, hüyange awkhuhlan tüoken me nyoilak. Hangheye khongkümpu moiye winnang tüopa makmoilak phei Taowe tüopate moilak. Tao, Ütahpa Youngwanpawe ngaoyangki.”

²⁴Ütahpa Youngwanpawe jiengjeppu yah-e i: “Taowe hanghe tümyangki, ngailak. Taowe hanghe linglak jingne monge tümyangki, linglak.

²⁵Taowe ü-kahtok Israel me Assyrialan mahtamlak, hüyange ü-kahtang me iman tangte yawe shoplak. Assyrialan sheam mepu Taowe ü-kahtalan, hüyange iman phaktang hangkiyih mepu lantamlak.”

²⁶Hatüowa kahtoknyu jingne Taowe tümpu, hüyange jatlante shaoshi phalak jingne ü-yak nonang.

²⁷Ütahpa Youngwanpawe hatüo linglak jingne monge tümteki; shaoshi phalak jingne Iye yoi yak noteki, hüyange aowe-o Ite tienne ye-ok.

²⁸Ahngpa Ahaz lipu wang ju-itwanshem ngaolan hatüo peiyangki.

²⁹Philistia kahtalan, nangte shetpu shengshaoh phakteki, hüpoi numan mongmeilak ne hango yenang. Aope pu ja liyapeih, tüopa nyoi me üne-o shemengpupa ja ngainang. Pu ükekke üyang pheipu pu tuwe ngainang.

³⁰Toiha yo me shetoipulan-e heeijong tüolak; hüyange wongpong ne mengpalan ütuh yenangpe nyailüm meilak. Hüpoi numan yalah seanyaowe lilakne taowe lingtamlak, hüyange numan yome jetohapulan taowe toitamlak.

³¹Shapyoong tüoh hüyange jamlak jingne üngwüntüoh, numan Philistia chingnyulan üshei! Numan khongküm nyamyah! Wangphom kahmak ja apyekao mepu peiküki, hatüowa nyahponglan hanghe te-o nyampu yenangpu iman ükhonglan.

³²Teman tangte Philistia mepu peipu ngaolan kipalante hangke janne yelak? Teman-e imante hüke iye tamlak, hüke “Youngwanpawe Zion lingteki hüyange shangepongpu I jing kahtalan-e tüoken me yinpu tüolak.”