Read Konyak Naga ISAIA 16 Bible Online

ISAIA 16 - Konyak Naga bible

ISAIA 16

¹Wanwüng jengme ngohpu Sela chingnyu mepu Moab kahtalan-e Jerusalem me wanglam lampa ne ao ngoh Ite poon ne nyeeha ja shon.

²Iman Arnon yengyin nah me tan, hüyange iman-a ülüp mepu jange yanpu awhalan kih-e hang juteih-o yenangpe taitai yeye she linglei.

³“Tomante nyüoleipu yahkei, ngaophün tampu phakei. Nyihning hekola üsheam nang wangshüm-e wangnyak kih-e lingpha. Toman chingtaipalan, aowe-o toman yetüo oklak ken me toman lo tampha.

⁴Numan kahmük me Moablan ngohküning. Aoyinne toman mahtam hunang, tüolan mepu toman jongwanpha. Shaoshiyateng ne tampu hüyange mengetampu üküm ngoilak, hüyange aoyinne kahmük wüngmakke linge tamnang, linne tailak.

⁵Tüophei me David huhayimlan yo mepu sheja ahngne menglak, hüyange Iye kahtalante ütinglakpu phei hüyange kenpu phei wanglam lamlak. Hüyange khakshupupa linglak jingne I mamlak; hüyange ütingpa-a lingteki she Iye ngelak.”

⁶Moab kahtalan hangshin ota-nang toman-e jaiteki. Toman-e shingnang iman-a jamloinang; hüyange iman shaha ütahpa she teihnang, hüpoi iman kheyongpu ükeng ngohnang.

⁷Tüokhei iman shanghah shaoshipu jingne, Moab kahtalan shaplak. Aope iman-e Kir-heres chingnyu me hahyingpu hahying ümei teihtüolakei iman khongkümpu shaplak. Iman monghümlakpa yenangpe jange winlak.

⁸Heshbon shongmepu kah hüyange Sibmah mepu wuwüngkahlan. Hanghepa wuwüngtiye jatlan wanglam lampalan jokne tam, tüolan wuwüngkah mengteki. Hipak ja me tüopa ükuilan Jazer chingnyu ngoiye hüyange heongye me wanwüng jeng ngoiye, hüyange henyip yeme lipu yengching (yengmang) jayekao ngoiye jaiye tai.

⁹Tüokhei sha-a tao Jazer jingne tao shappu kih-e Sibmah wuwüngwu jingne tao shapnang. Ü-mükphei Heshbon hüyange Elealeh jingne yünnang, hangjingne kahtalan mongmeiye tamlak jingne tahyahpu yenang.

¹⁰Üyao pheipu kahlan me sha-a ao-o mong yemei. Wuwüngkah me aowe-o yewün yejema-a yelok. Wuwüngti ne lingne aowe-o wuwünglick yengüt; mongmeiye üngwün pulan-a üküm ngoiteki.

¹¹Tüokhei Tao mongshangpu phei Moab jingne, mongmeng puphei Kir-heres jingne wao ea-nang.

¹²Aope Moab kahtalan-e iman nying nyingke üjao wümjong kahtangte hüyange yoplak jingne iman khümjingte ongpu yelaklakeih, hüpoi hatüowe imante hang ümei-o yelinglak.

¹³Youngwanpawe üwangne muh Moab jingne phapu ngaolan-a tüolan ne ngohyangki.

¹⁴Hüpoi sha-a Youngwanpawe inang, “Khakshuwe wangpeng lüm me Moab jing moth üyonga yenangpe mahlak. Kahtalan üngang ngohpu mongmepu üjingha hei yinlak, hüyange iman-a wong yenanglak.”