Read Konyak Naga ISAIA 17 Bible Online

ISAIA 17 - Konyak Naga bible

ISAIA 17

¹Damascus jengme ju-itwanshem ngao: Leihuyah, Damascus shaaji chingnyu ja ne yengohlak, hatüowa heamtepu noknyu nokjing nehei menglak.

²Aroer chingnyulan jinjintepu jingne wüngmakke tüohlak. Iman-a nyee hei mahulan heeijong ne menglak, hüyange aowe-o iman jange yeteilak.

³Ephraim yinpu yenanglak, hüyange Damascuswe yoi ta-ngai mahlak. Aramlan aoyin yinyangki Israellan kih-e müktishiwapu ngohlak. Tao, Ütahpa Youngwanpawe ngaoyangki.

⁴Tüopa nyih me Jacob yongelüopu üküm ngoiye peilak; hüyange tüopa mepu moth-e toinanpuwe nanleilak.

⁵Hüwante ümeken me tahlick yahyange tümme sho, aope tüopa yahshoyange hango yetüoh, Rephaim kahjee me kah ükengne menge tampu kah kih-e ngohlak.

⁶Kahtalan üjingha hei yinlak, hüyange Israel-a olive pee- hanghe mepu ülick khongküm khaiyange peshaoh ye me ni yejema-a lüm, yejema-a kuinai ye me peli yejema-a nga towe tüoh tüopa leye ngohlak. Tao, Israel Kahwang Youngwanpawe ngaoyangki.

⁷Tüopa nyih peiwante, kahtalan iman lingengaipa Israel Üjao Kahwang tangte jamlak yamme leih yelak.

⁸Iman-e shaaji iman yoi yakke lingpu wümjonglante mong yehümlak, yejema-a iman yoi yaktoilan Asherah kahyaklan ne lingpu hüyange üpe meipu jaklak jingne lingpu wümjonglante üting yelaklak.

⁹Aope tüopa nyih peilakeih, chingtuk pepeyangpu chingnyulan-a wüngmakke tüohlak hüyange Hivitlan hüyange Amorlan-e iman chingnyulan Israel kahtalan sheshao mepu yanwante tüohpu kih-e heamteiye tüohlak.

¹⁰Israel, aowe nang yinnetam hüyange aowe wongnangpu longnyu kih-e nang jongwanne ang, tüopa Kahwang nange pemei. Ümei nanleiye nange kahhenglan kahwangte yoppe khümlak jingne nange khümme wümlak pesha ling.

¹¹Hüpoi nange shomme tampu napmuh iman jongne wangyapoi hüyange üpeng pengyapoi; tüoyangpoi tüopa me tahyahpu yenanglak shaoshipu hüyange yemei okpe aapu hei ngohlak.

¹²Oh wongnangpu jatlan yengching yengmokh wüng phei! Oh, kahtalan yengching ya yungpu kih-e, yelakpe poteki.

¹³Yengching ya yunge hunge ongpu kih-e jatlan shaoyekaote ngangnang, hüpoi Kahwange imante mengetee hüyange iman shungeye, kahtang yemepu kahmak kih-e, yipnyeih leiwantepu tahjan kih-e iman jange tei.

¹⁴Ünpong me iman yeonge yoonge nyamne tam hüpoi napningpa-a iman-a yenang. Teman kahtok yakphei lükke yahne ngangpalan moilan yatuhshao-a hatüo üja.