Read Konyak Naga ISAIA 2 Bible Online

ISAIA 2 - Konyak Naga bible

ISAIA 2

¹Hatüowa Amoz üha Isaiate Judah hüyange Jerusalem jeng ngepu ngaolan ngohnang.

²Ngoikülak nyih hipak me ümeken me Youngwanpa Khümjing yongyange ngoh nang; tüopa-a üshei phei ütahpa ne, kahtang üshei phei shedaopupa ne ngohlak. Jatlan maapu ninpu phei tüopa nyoite jemlak.

³Kahtalan maapu peilak hüyange ilak, “Kei Youngwanpa kahtangte teman onghah, Jacob Kahwang nokte onghah. Iye temante hanghe lingne tamhu Iye nyüopha lak. Iye lepu lamnyu me teman kemlak.” Ngaokhüm-a Zion mepu ngailak, Youngwanpawe nyüopuwa Jerusalem mepu peinang. Iye yoi kahtalante Zion mepu ngao nang.

⁴Iye jatlan pa me ngaophünpu phalak hüyange kahta maapu moppu linge tamlak. Iman-e imanjing yanglow-a kho ne joplak; hüyange imanjing ngou-a ünah pheipu nyit-ha ne linglak. Jatlan shaaji aope-o wehok ne yetailak, shapju jingne shaaji nishe yetümlak.

⁵Sha-a, Jacob huhayimlan, Youngwanpawe temante hanghe wangngai pha tüopa wangngai me kemhah!

⁶Nange Jacob huhayim, nang kahtalan winne tüohteki! Kahmük-a heongye hüyange Philistia mepu yepahipalan-e maateki. Kahtalan-e hengching lan phei yakshüm monge tükteki.

⁷Imanjing kahmük-a hon hei khüm-e maateki, hüyange iman-e moth yopu üküm yenang. Iman kahmük-a koiponglan-e maa ngohnang, hüyange iman pongtongtoilan jingne üküm ngoipu yenang.

⁸Iman kahmük-a mienge maawe ngohnang, hüyange iman-e yoi yak lan linge ngaipu toishaolante yoppe khüm nang.

⁹Kahta lilite shüngenam-e hüyange mongmengne tamnang. Imante ümeng tahwintam.

¹⁰Iman longwak nyoilan mepu longsa me lolak yejema-a Youngwanpa mongshih ngaipu mepu lolak jingne kahtok me kahsa shaolak, hüyange I ünganwong hüyange müktishiwa mepu lolak!

¹¹Nyih ja peiküki aope kahtanyuha otapu lakke mahlak hüyange jamloipu kahta wanglam menge winlak. Tüophei me Youngwanpa shingha nowe inlak.

¹²Tüopa nyih me Ütahpa Youngwanpawe ao wongnange ngoh moilan, otapu hüyange yoi hei ütahpa she teihpu lili innenyaine tamlak.

¹³Iye Lebanon mepu cedar üdaolan hüyange Bashan kahmük mepu longkhampee khongküm menge winlak.

¹⁴Iye shedaopu kahmüoh hüyange kahtanglan lili,

¹⁵daonok lili, hüyange chingtuk penyu daolehpu lili üjee ne linglak.

¹⁶Iye shekhaopupa hüyange shemeipupa yenglinlan-o nyüpne tamlak.

¹⁷Kahtanyuha otapu üküm innyai tamlak, hüyange kahtanyuha jamloipu-a menge winlak. Youngwanpa shingha nowe inlak.

¹⁸Mienglan khongküm ye-ngepe mahlak.

¹⁹Aope kahtoknyute polak jingne I peilakeih, Youngwanpa mongshih ngaipu hüyange I ünganwong hei müktishiwa mepu lolak jingne longwak mepu longsa me yejema-a kahtok me shaopu kahsa me kahtalan lolak.

²⁰Tüopa nyih me, iman-e hon hüyange khüm phei khümne lingpu peshaolan winlak, hüyange tüolan-a hoom hüyange aopak lante tüohlak.

²¹Aope kahtoknyute polak jingne Youngwanpa peilakeih, I mongshih ngaipute nyamme hüyange I ünganwong müktishiwapute nyamme lowe kahtalan kahsa me hüyange longwak longsa yinme lolak.

²²Nateang me lüohepu hei ngohpu kahta lihhate monghümpu laktüoh; Ime-a hanghe shangpu?