Read Konyak Naga ISAIA 21 Bible Online

ISAIA 21 - Konyak Naga bible

ISAIA 21

¹Hatüowa yengching wanwüng jengme ju-itwanshem ngaolan. Yipnyeih leiye pheih kahtok kaiye jaosheye moiye teipu kih-e, mahtamlakpa-a nyam nyam shepu kahmük mepu peiküki.

²Yemeipe ngailak himang, lowelamme tamlak hüyange menge shonlak himang taowe ngeyangki. O Elam nyahpong, shümtüoh! O Media nyahpong, chingnyulan yahne shottüoh! Iye hanghepa ngaiye tam tüopa shanghah shaoshi Taowe üküm ngoine tamlak.

³Tüokhei ü-shienga shaoshipuwe maateki; Sheko moipaiwante shaoshipu kih-e üte shaoshi yateangpu ngoiteki. Taowe yejai oklakpa ne tao mongshih ngai ne tam nang.

⁴Ü-kenmong nüngnei nang, hüyange nyampu phei tao ninnang. Wangnyak ngoikülakte taowe yoonge tan, hüpoi hatüowe üte nyamlakpa tokte kaiye hango yah yepei.

⁵Iman-e khao tümyange ang; iman-e tüopa me aam nyam. Iman-e hah hüyange ying! Woipalan yayongtüoh! Numan ree me minnga shit tümtüoh!

⁶Hüwante Youngwanpawe üte i: “Taitüoh hüyange weyompa ja angtüoh, hüyange Iye hanghe nge tüopa ngaolan phalak jingne itüoh.

⁷Aope Iye ni ni phinne koipong tokme kahtalan peipu ngelakeih, hüyange gado hüyange udh tangme kahtalan shotyange ngema-a, tüolante Iye meimeiye leilak wongpong.”

⁸Hüyange weyompawe üngwünne i: “O Youngwanpa, taowa yomjing ken me wangnyak wangngai yongyange ngohyangki.

⁹Leihuyah mokhshe, hatüome iman peinang! Koipong tokme kahtalan, kahtalan, ni ni!” Weyompawe ngaolan pha, “Babilon toitateki! Iman-e yoppekhümpu peshaolan khongküm kahtokte toitawe khoih paiteki.”

¹⁰Ü-kahta Israellan, wheat tah kih-e numante noiyangki; hüpoi sha-a Ütahpa Youngwanpa, Israel Kahwang mepu taowe jaipu ngaolan taowe jaine tamnang.

¹¹Hatüowa Edom jeng ju-itwanshem ngaolan. Seir mepu ütam-e üte nyik, “Weyompa, hatüo wangnyak-a hangshin shonge linlak shi? Üte ipha hangshin shonge hatüo üküm ngoilak.”

¹²Weyompawe jan, “Napning peiküki, hüpoi wangnyak üne-o peikülak. Nange üne-o tonghuma-a, leih yekei hüyange tongtüoh.”

¹³Hatüowa Arabia jengme ju-itwanshem ngaolan. Numan Dedan kahtalan, Arabia pheih kahtok me aoyin toinyu sheihpalan lak,

¹⁴aoyin nang tangte pei tüolan yenglepu kahtalante yeng pha tüoh. Numan, Tema kahmük me ngohpu kahtalan, chingtaipalante hahying phatüoh.

¹⁵Kahtalan-e iman toine tümpu yanglow mepu, imante kepne tümpu wenglah mepu, wehok ütuh khongkümpu mepu yinlak jingne phette yannang.

¹⁶Hüwante Youngwanpawe üte i, “Khakshuwe wangpeng ja me Kedar jat kheyongpuwa üküm ngoiye peilak.

¹⁷Wenglah jonpalan-a Kedar mongyongpu kahtalan ngohnang; hüpoi iman üjingha hei towe tüohlak. Tao, Israel Kahwang Youngwanpawe ngaoyangki.”