Read Konyak Naga ISAIA 22 Bible Online

ISAIA 22 - Konyak Naga bible

ISAIA 22

¹Hatüowa himang kahjee ju-itwanshem jeng ngaolan. Hanghe ngaipu shi? Hangne chingnyu kahtalan khongkümpuwe noktok me hipak yahpu shi?

²Chingnyu nopuwa langman moppu phei, ngaowüng hüyange loipoipuwe maayange. Numan kahta aoyin tüopa wehok me liyangki, teelawe yejema-a hok we-e lipu ne yeje.

³Numan wanglam lampalan khongküm jam-e phet-e tai; Iman weanglah jonpalan-e pho. Iman shejai she phette taiyapoi ülao khongküm jamshe pho.

⁴Tüokhei sha-a ü-kahtalan aoyin liteki; tüolan üshei tangme khah-e shaplak jingne ü-shaha tüoh pha. Tao toloimeiye tamlak jingne tah ngang.

⁵Hatüowa himang kahjee me üpong yetüopu, yenaopu, hüyange mokhshe mokhpu hipak ja, hüyange Ütahpa Okkeshangpu Youngwanpawe teman tangte tüopa shontam. Teman chingnyu jantpe-a shünge taine tam, hüyange jamlak jingne üngwünpuwe kahtanglan me lüngjan ngaitam.

⁶Elam kahmük mepu wetaipalan, wenglah hüyange lahhan tümyange koipong tokme ongyange pei. Kir kahmük mepu wetaipalan-e iman ree tümteki.

⁷Kahyao pheipu Judah kahjee-a pongtongtoi lan-e maa; Koipong tok mepu wetaipalan Jerusalem peten sheshao me yong.

⁸Judah jingne tienpu lili khoihtam. Aope tüopa ngaiyapeih, numan-e yonglah angpu nyoi mepu yonglah yah ngai.

⁹Ümeken nyoilan me Jerusalem jantpenyu linge yelak wongpong ne ngai tüolan nyoi numan-e tüo hüyange numan-e ümaiye yengnung mepu yeng shaijem.

¹⁰Jerusalem mepu noksalan lilite numan-e leiye pong hüyange chingnyu jantpe linge yelak jingne nok ütam lüoh-e yah:

¹¹Yengnung ülangpa mepu yünne tapu tienlak jingne chingnyu ümongye me numan-e yeng yolak ling. Hüpoi aowe üshongwante muh tüolan khongkümpu tüm hüyange aowe tüopa ngaine tam, Ite numan-e mong yepha.

¹²Ütahpa Okkeshangpupa Youngwanpawe numan shappe yoonglak jingne, numan shang linlak jingne hüyange monnye inlak jingne nyikyangki.

¹³Hüpoi hüke linghah shepu nanleiye, numan-e wonwang hüyange motap. Numan-e hahlak jingne nyee hüyange mahulan toi, hüyange numan-e wuwüngti ying. Numan-e i, “Teman-e hah-o hah ying-o yinghah! Hangjingne ngainyih-a teman liphalak.”

¹⁴Ütahpa Okkeshangpupa Youngwanpawe yoi nying nyingke üte ngao hüyange i, “Iman üyin me ngohpu mongme tüopa ünu aope-o imante ümeng yewinlak.” Tao, Ütahpa Okkeshangpupa Youngwanpa ngaoyangki.

¹⁵Ütahpa Okkeshangpupa Youngwanpawe ahngnok yompa Shebnate wenne Ite ilak jingne üte i.

¹⁶“Nanga ao she nange teihnangki? Nange nang nying nyingke longnyu wak yekao me mangkoksa watte hüyange nok we-e lingpu me hanghe ngohnangki?

¹⁷Nanga üyongne ngohne ok, hüpoi Youngwanpawe nanga shuwe yahlak hüyange nanga üjaite shüppe winlak.

¹⁸Iye nanga nyeitüm kih-e shuwe yahlak hüyange loishe yongekhaopu kahmükte shüppe tamlak. Tüopa jingne nang jamloi otayangpu pongtongtoi phinme tüoken me nang lilak. Nang nokpupa noksalan jingne nang mongshang mongmenglak.

¹⁹Youngwanpawe nanga toishao mepu shenge tamlak hüyange nang ütahpa shotjing mepu nang yeitamlak.

²⁰Aope tüopa nyih ngailakei, taowe ü-shaoshanpa Hilkiah üha Eliakim jingne shonlak.

²¹Taowe numan woipa nyemo yahtamlak hüyange Ite shienghit hitlak hüyange numan me ngohpu wong khongkümpu Ite phalak. I-a Jerusalem hüyange Judah kahtalante payong ja leye ngohlak.

²²Taowe David nokli sapi I phaktang me angne tamlak. Iye hanghe eplakei, aowe-o yeküp oklak, hüyange Iye hanghe küppe tüoh, aowe-o ye-ep oklak.

²³Hanlag ja leye Taowe nyoijing me I mongjüonge monge tamlak, hüyange I-a yoinoksa khongkümpu jingne yihnoonpu ngoipu nyoine menglak.

²⁴Hüyange Inok noksa müktishiwa khongküm; puhpaipu hei jalunpulan hüyange wanha shengha khongküm, kümha yengsheng me linne I me kinlak.

²⁵Tüopa nyih me, Okkeshangpu Youngwanpawe inang, mongjüonge monge ngohpu hanlag polak hüyange yeilak. Hüyange tüopa-a tüopa me kinyange ngohpu khongkümpu jingne ükümpa ne menglak. “Youngwanpawe ngaoyangki.”