Read Konyak Naga ISAIA 23 Bible Online

ISAIA 23 - Konyak Naga bible

ISAIA 23

¹Tyre jengme ju-itwanshem ngaolan. Shapyoongtüoh, O Tarshish yenglinlan, hangjingne numan noknyoi mengetam teki; tüopa mepu noklan hüyange tüopa khat hemteki. Saipras mepu numan yenglin leihyepu me, numan-e ngaolan shinglak.

²Yengchingnah me nyoipalan jünge ngohtüoh, Sidon pheeinyuleihpalan numan shappe yoongtüoh!

³Numan-e yengching üyong kaiye Shihor me ngaipu tah hüyange Nile me ngaipu yüolak jingne hüyange shaklak jingne hüyange jatlan üshei phei pheeileihlak jingne kahtalan shon.

⁴Sidon chingnyu, wüotüoh, hangjingne yengnyu hüyange shelupu yengching üyonge nanga yeyah hüyange inang; “Taowe hayimlan aope-o yengoh. Taowe aope-o shela yejema-a yhalalan jongne yetam.”

⁵Aope iman-e Tyre mahtamteki she jailakei, Egypt lan nehoi mokhlak hüyange yashanlak.

⁶Tarshish yete taitüoh; üngwünne shapyoongtüoh, numan yengchingnah kahmük me ngohpalan!

⁷Hatüowa üshongwante muh akpu Tyre me mongmei chingnyu ne menglak a? Hatüowa yengching kaiye taiye chingtaipalan-e chingtüp linge nyoilak jingne shonpu chingnyu a?

⁸Tüopa ahngjong chingnyu ao jing pheeinyu leihpa ahnghalan kahtoknyu me, sheyih shenoon shepu kahtalan Tyre tangme tüolan khongkümpu yah peilak aowe tümyangpu?

⁹Ütahpa Youngwanpawe tüopa tüm; iman-e otapuwe hanghe lingyangki tüopa lakke tamlak jingne hüyange iman üyih üyong kahtalan kahta ne menge tamlak jingne Iye tüopa tüm.

¹⁰Tarshish me chingtüp linge nyoipu numan kahtalan, taitüoh hüyange kahmük-a kahne hamtüoh! Numante jongwanlak jingne shaaji ao-o yenang.

¹¹Youngwanpawe yengching tangme I yak noteki hüyange ahngchinglan shokke winteki. Iye Phoenicialan pheeileihpu jongnyoi mahtamlak jingne ngaokeng phateki.

¹²Iye i, “Sidon chingnyu nang mongmeipuwa üküm ngoiteki, hüyange nang kahtalante shaoshi yateng phateki. Iman Saipras te yinne taiyapoi, iman üne-o yinpu ye-okpe ngohlak.”

¹³Chaldealan kahmük te leitüoh, shaaji tüopa jat yengohlak; phao me phao yinmoklan nyoi ne menglak; tüopa tepu chingnyu-a Assyrialan-e heam ne tam; iman-e yomteplan lingngai, tüopa tang me ahngpa jatlan iman-e winlak hüyange Iye hatüowa heam ne tam.

¹⁴Tarshish yenglinlan, shappe yoongtüoh! Numan mong nyengpu chingnyuwa mengteki.

¹⁵Tüo hipak me, ahngpa ja jin hipak shinne Tyre-a wangpeng denyit jingne pemahlak. Aope tüolan wangpenglan linlakei, Tyre-a hemme phwngngampu kih-e ngohlak:

¹⁶“Nang jing kongki ümtük yayah, jila neikonne kemtüoh, nang ye-ok-yeshang pemeiyangpu nuweshaknyu! Kahtalan üne-o ja me yahyelak jingne, nang hem nishe wonne loktüoh.”

¹⁷Wangpeng denyit phei me, Youngwanpawe Tyre-a yhawe pheeileih-e ngohpu phwngngampu ülangte yene tamlak, hüyange yhawe yha nying nyingke kahtoknyu ahngchinglan khongkümpu te nanne tamlak.

¹⁸Pheeileih-e yhawe tüopu ngin-a Youngwanpate phünne phalak. Yhawe hatüowa yowe ye-anglak, hüpoi aoyinne Youngwanpate yoppekhüm iman-e hahying shaklak jingne hüyange iman wongpong nyemo shaklak jingne yhawe ngin jonlak.