Read Konyak Naga ISAIA 24 Bible Online

ISAIA 24 - Konyak Naga bible

ISAIA 24

¹Leihuyah, Youngwanpawe kahtoknyuwa jajang jawe ükengme hüyange wüngmakke tüohlak. Iye kahtoknyu lüppeshüppe tamlak hüyange tüopa mepu kahtalan yanne tamlak.

²Hüyange hatüo kahtalante hangke hüke ngengpate; rhate hangke hüke nokpute; rhanyute hangke hüke nokpunyute; shakpate hangke hüke yüopate; yeyahpate hangke hüke üsea phapate; yahpupate hangke hüke phapate; tüopa hüke ngohlak.

³Kahtoknyuwa paikhoihteiye hüyange heamme mahteiye ngohlak. Youngwanpawe ngaoyangki hüyange hatüowa lingkülak.

⁴Kahtoknyu shapyoong nang hüyange kuimah nang; kahtoknyu nopu wong yenangpe tainang; kahtoknyu hüyange wangdang moini seanam nang.

⁵Kahwang ngaokhüm mengyange hüyange jinjinte anglak jingne, Iye linge tampu jiengjeppu pienne jonpuwe kahtalan-e kahtoknyuwa nuwe shakke tam.

⁶Tüokhei Kahwange kahtoknyute phoiwümpu phateki. Iman-e hanghe lingyangki tüopa jingne kahtalante phawe leihyenang. Ükhong sheshoi sheshoi she üyin ngohlak.

⁷Wuwünglickwu kuinang, hüyange wuwüngti-a yenangpe ta-nang. Aoyin hipak ja me mongmei sha-a pa-a moilan mongmeng;

⁸hüyange hoongli mongongpu iman kongki-ümtük hüyange pheam hemwünga lakteki.

⁹Wuwüngti yingyange mongmei hem lokpu shaaji yenang; tüopa meipu me shaaji aowe-o mong yemei.

¹⁰Chingnyu me sheminlamphe üyin üshin ok, hüyange kahtalan-e iman nying nyingke yinlak jingne iman noklan-a taküp lat.

¹¹Shaaji wuwüngti yenangpu jingne kahtalan-e lam-ang me üngwün. Mongmei-a jin jintepu jingne taimah; kahmük mepu tailak jingne ngaopha yange ngoh.

¹²Chingnyu-a heamteiye, hüyange tüopa tepu peten-a menge mah.

¹³Jatlan lilite kahtoknyu nopu me hatüowa ngaikülak. Aope pee lili mepu olive khaiye sho, hüyange wuwüngwu mepu ükümpa wulick khai, hatüowa ükümpa tah yahpu kih-e ngohlak.

¹⁴Aoyin yinne ngohlakei mongmei puwe hem loklak. Aoyin henyip yekao me ngoh, Youngwanpa hangshin yongpu she ilak,

¹⁵hüyange aoyin heong yeme ngoh Ite yihlupu phalak. Aoyin kahta yengching nah me nyoi Israel Kahwang, Youngwanpate yihlulak.

¹⁶Kahtoknyu üjai nyoijinglan mepu, Israel khakshupu jatte yihlupu hem lokpu teman-e jailak. Hüpoi üjingne monghümlak hango yenang! Taowa jajang jawe wintam nang! Lowelampawe lowetampu yelak, hüyange iman-e ümeng linge tampu shemeng shemeng she jaalunnang.

¹⁷O kahtok me nyoipu kahtalan, yeonge nyamlak üyong, kahsa, hüyange tünlan numan jingne tanne ngohnang!

¹⁸Aoyin nyamlak üyong mepu yinlak jingne nganglakei kahsa te yütlak; hüyange aoyin kahsa mepu yinlakei tün me pholak. Wangdang tawolan eplak, hüyange kahtoknyu nokjing polak.

¹⁹Kahtoknyu phüppe ümee ngailak hüyange paikhoihlak hüyange tange eplak.

²⁰Kahtoknyu I nying nyingke yujokpa kahta kih-e palalak hüyange waishih wangkhah tepu tep kih-e leihkheihlak. Kahtoknyuwa Itepu ünuwe tok ongteki; hatüo toitalak hüyange nishe aope-o yelao lak.

²¹Tüopa nyih me ütang mepu ünganlan hüyange kahtoknyu wanglam lampalante Youngwanpawe shaoshi phalak.

²²Kahwange ahngpalan jamme phowe teipalan kih-e kahsa ja me phüohtamlak. Imante shaoshitamlak hipak manngoi manngoi Iye iman-a küpnok me küppe anglak.

²³Linnyu nyakke mahlak, hüyange wangheye shaaji ütee yephalak; hangjingne Ütahpa Youngwanpa-a ahngpa ne menglak. Iye Zion kahtang Jerusalem me wanglam lamlak, hüyange kahtalan woipalan-e I müktishiwapu ngelak.