Read Konyak Naga ISAIA 25 Bible Online

ISAIA 25 - Konyak Naga bible

ISAIA 25

¹O Youngwanpa, nanga ü-Kahwang; taowe nangte yihnoonlak hüyange nang min yihlulak. Nange yashan yalipu toi lingyangki; nange üshongwante muh tümyange angpu nange okpu ngeye lingteki.

²Hangjingne Nange chingnyulan heamne tamteki hüyange iman-e meipe latyangpu menge tamteki. Toman wepalan-e weyangpu nyoijinglan jin jintepu jingne mahteki.

³Tüokhei wongnangpu jatlan mepu kahtalan-e nangte yihlulak; mengshipu jatlan chingnyulan-e nangte nyamlak.

⁴Hangjingne toinanpalan hüyange wong yenangpalan nang tangte phette pei hüyange nange shangshih hipak me yinne tam. Nange imante waishihwangkhah mepu lojing; hüyange jamloi sheampute yashüm pha. Mengshipu kahtalan-e eanyu mepu waishihwangkhah kih-e shümme pei;

⁵Kahwan kahtok me heeleipu kih-e; hüpoi Youngwanpa, nange toman jing wepalan wüngmakke lakne tam; wanglümpu nyih wangphomme wünge tampu kih-e, nange mengshipu kahtalan üngwünpu lakne tam.

⁶Hatüo Zion kahtang me Ütahpa Youngwanpawe kahtoknyu nopu jatlan jingne mongmeimo tümlak, shemeipupa hahying hüyange shemeipupa wuwüngti phei mongmei mo tümlak.

⁷Tüoken me Iye jatlan tangme yüohyange ngohpu mongmeng wangphom mokhshe yahteilak.

⁸Okkeshangpupa Youngwanpawe lipuwa jin jintepu jingne mahtamlak! Iye kahta lili mük mepu mükphi phutte winlak hüyange kahtoknyu nopu me I kahtalan-e wüotüowe shaoshipu yah teilak. Youngwanpa Iye ngaoyangki!

⁹Aope tüopa ngailakei, moilan-e ilak, “I-a teman Kahwang! Teman-e Ite teman monghümpu angyangki, hüyange Iye teman yintam nang. I-a Youngwanpa! Teman-e Ite teman monghümpu angyangki, hüyange sha-a teman mongmeinang hüyange Iye teman yintam yangki.”

¹⁰Youngwanpawe Zion kahtanga jongwanne anglak, hüpoi Moab kahtalan kahyao me tahjan tangme yashoppe tampu kih-e yawe shoppe tamlak.

¹¹Iman-e yengwo ne ngangpu kih-e iman yak nolak, hüpoi Kahwange iman-a khaiye tamlak, hüyange jamlak yenangpe iman yak-a yeilak.

¹²Jantpe üdaolan phei ngohpu Moab daonoklan Iye menge tamlak hüyange iman kahmak ne menge yeitai tamlak.