Read Konyak Naga ISAIA 26 Bible Online

ISAIA 26 - Konyak Naga bible

ISAIA 26

¹Tüopa nyih me Judah kahtok me tüopa hem loklak: “Toman chingnyuwa wongnang nang! Kahwang Iye tüopa tepu jantpenyu yinnang!

²Chingnyu petenlan eptüoh, hüyange ngaotingpa jat ongne tamtüoh; ao jing kahtalan-e hanghepa shunang hatüo lingpu jat.

³Nang Youngwanpa, aoyinne iman wongpong mongjüonge ang hüyange iman ütinglakpu nang me ang tüolante ütingpa chingmei phatüoh.

⁴Youngwanpate jin jintepu jingne ütinglak tüoh; hangjingne Youngwanpa Kahwang me numan-e üküm yenangpu longnyu ngohnang.

⁵Aoyin otayangki tüolan Iye khaine tam; iman nyoipu wongnangpu chingnyu Iye mengetam, hüyange tüopa mepu jantpenyulan kahmak ne khoih tam.

⁶Aoyinte shaoshi yateng ne tamyangki sha-a tüopa tangme kemnang, hüyange iman yaphang me lokke tamnang.”

⁷Youngwanpa, khakshupu lan jingne nange lam-a nyeleh lingnang; iman kempu lamnyuwa shinsheh ngohnang.

⁸Toman-e nange mongpu me woi hüyange toman monghümpu nangme ang; toman-e lahnyik mongkopu khongkümpu-a nang.

⁹Wangnyak me ü-mongjang khongkümpuwe nangjingne yoongnang; aope nange kahtoknyu hüyange tüotepu kahtalante ngaophün lakei, hanghe khakshupupa iman khongkümpuwe shinge peilak.

¹⁰Nange kahta ümenglante yayeng yahpoi, hanghe khakshupupa linglak iman-e aope-o yeshing. Khakshupu kahtalan kahtok hatüo me nehoi iman-e üne-o yeshupu lingnang; nang kheyongpute iman-e yeleihu.

¹¹Nang wepalan-e nange imante shaoshi phakülak she yeshing. Youngwanpa, iman wüotüone tamtüoh hüyange iman shangne tamtüoh; nange tümme tampu shaoshi yateng pume shangne tamtüoh. Hangshin nange nang kahtalante ken imante hüotamtüoh.

¹²Youngwanpa, nange tomante jalunpu phalak; toman-e okpu ngepu khongkümpuwa nange hanghe ling tüopa ütahte ngaipu ngohnang.

¹³Youngwanpa toman Kahwang, tomante ülaolan-e wanglam lamne ngohyangki, hüpoi nang jashing toman Kahwang ngohnang.

¹⁴Sha-a iman ümang hüyange nishe yange yeyelak; iman mieng-a yange yeyelak; hangjingne nange imante shangne tam hüyange iman mahtam; aowe-o shaaji iman yeteihtüolak.

¹⁵Youngwanpa, nange toman jat jongne tamnang, tüopa tepu yikeng üken phe me paone tam, hüyange tüo kaiye nangte yihnoonpu yah peinang.

¹⁶Youngwanpa, nange nang kahtalante shaoshi ne tam, hüyange loishe shangpu me iman-e nangte yop.

¹⁷Nang, Youngwanpawe tomante, sheko jawe moipai eipe dak teiye üngwünpu kih-e üngwünne tam.

¹⁸Toman dakpu phei hüyange loishe shangpu phei ngoh, hüpoi toman-e hango puh-e yetam. Toman-e toman kahmük jingne hango okpu ye-nge; toman-e hango tümme showe ye-ok.

¹⁹Hüpoi toman kahtalan aoyin liyangki nishe üyin ngohlak! Iman püm üyin ne menge leih yelak. Mangjong me shipulan khongkümpu lüolak hüyange mongmeipuwe hem loklak. Phihlangpu nyaiye kahtok menghawe tampu kih-e, aoyin üshongwante liyangki Youngwanpawe nishe linge yelak.

²⁰Ü-kahtalan, numan yoi yoi nokte ongtüoh, hüyange numan tokphei me taküp küptüoh. Kahwangpa mongshih ngaipu manlin manlin ütenjapu jingne numan nying nyingke lotüoh.

²¹Leihuyah Youngwanpa-a yoi toiling jing wangdang nyoi mepu iman ünu jingne kahtoknyu kahtalante shaoshi phalak jingne peiküki. Kahta toipalan-e kahtoknyu me lowe ünu omyangpu ütahte ngailak, hüyange aoyin toiyangki tüopa kahmükke shaaji lowe ye-anglak.