Read Konyak Naga ISAIA 27 Bible Online

ISAIA 27 - Konyak Naga bible

ISAIA 27

¹Tüopa nyih me Youngwanpawe yoi wong üyong hüyange nyam nyamshepu yanglow yengching yinmok, lüppe shüppe linglei hümpu üyang pheipu pu (dragon) te shangne tamlak jingne, hüyange yengching me ngohpu yengching yinmok toilak jingne jonlak.

²Tüopa nyih me: “Yahhukeipu wuwüng peshawe tüopa loklak,

³Tao, Youngwanpawe tüopa tangme yelakpe yom hüyange yelakpe yeng shokke tam. Aowe-o tüopa yemengtamlak jingne Taowe hatüo wangnyak wangngai yom.

⁴Shaaji wuwüng peshate Taowe mongshih ngaipu hango yenang. Iman phei hoklak ne huh hüyange phao jupeng ngohpu ne mengma-a, hümma-a Taowe iman-a lanshe jakke mahtamlak.

⁵Hüpoi ü-kahtalan tepu wepalan-e Taowe imante jongwanne tamhupu ne mengma-a, iman-e ü-phei chingmei lingne tamtüoh. Üting, iman-e ü-phei chingmei lingne tamtüoh.”

⁶Ngoikülak hipak me Israel kahtalan, Jacob huhayimlan-e pee kih-e üya yulak, hüyange iman penglak hüyange üyoi ngailak; kahtoknyuwa iman me ngaipu ülickke maalak.

⁷Iman jing wepalante tampu kih-e Youngwanpawe Israel te yemeipe shangne yetam, yejema-a kahtalan mahne yetam.

⁸Youngwanpawe yoi kahtalante ülao kahmükte wa-e teine tampu kaiye hei shangne tam yangki. Iye iman-a heong ye mepu wangyang ümeng phei yah teiyangki.

⁹Hüpoi Israellan ünuwa aope ülao jat wümjonglan shunkhoih kih-e aope kahtokte khoih tamlakei, hüyange shaaji sünyet wümjong yenanglak yejema-a Asherah kahyaklan leppu angpu tüohyangki she iküme nakshih winlak.

¹⁰Meipe latyang phei chingnyuwa heamteiye shüppe ngohnang. Hatüowa hango yenangpu wanwüngjeng kih-e ükengne mengetam. Hatüowa mahulan heeijong ümeken me iman toloimei hüyange hahying tüopa nyoi ne mengteki.

¹¹Aope ükuilan-a kuimah hüyange phakke küm, hüyange shekolan-e han ne moiyah. Hangjingne ima-a kahtalan-e hango shinge yeyah ok, iman lingengaipa Kahwange imante yeyahyenglak yejema-a shüpshe hango yehüolak.

¹²Tüopa nyih me, Euphrates mepu Egypt yikeng ngoiye Youngwanpawe yoi kahtalan ja phei me ja japhei me ja she, ütam jawe wheat tah mepu üphan lepu kih-e nyik-e jemlak.

¹³Aope tüopa nyih peilakeih, Assyria hüyange Egypt mepu Israellan khongkümpu aoyin tüoyekao me chingtaiye ngoh nyiklak jingne nyawong wünglak. Iman peilak hüyange I jing üjao kahtang Jerusalem me Youngwanpate khümlak.