Read Konyak Naga ISAIA 28 Bible Online

ISAIA 28 - Konyak Naga bible

ISAIA 28

¹Jokngatei-e otapu Ephraim onyukei! Itepu müktishiwa-a yu jokyangphei woipalan shangmepu jupeng shaoshaoh kih-e mah-e tainang. Otapu iman shanga üpe ümei phei yeonge meiye phoyange, hüpoi tüoken me iman jokke liteiye toitanang.

²Leihuyah, Youngwanpawe imante shümlak jingne wong pheipu hüyange wongnangpu ütam tümyange ngohnang, ütam ao yilong kih-e peilak, akshengyeng wai kih-e, shungpu kih-e, muleampu tangme, hüyange kahmük lanshe omlak.

³Ephraim jokyangpu woipalan otamaohepu shaoshaoh-a yamai me lokke tamlak.

⁴Otapu woipalan müktishiwa jupeng ümei mahtaipuwa, juhei hipak me üwangne ngaipu phuklick, iman yümpu phei jam she khai hüyange hahwinpu kih-e ye-ngepe mahlak.

⁵Tüopa nyih me Ütahpa Youngwanpa-a yoi kahtalan aoyin yinyapeih tüolan jingne müktishiwapu ahngpa shaoshaoh kih-e ngohlak.

⁶Hüyange aoyinne kahphünpalan toi lingnang imante ngaotingpa ilak juteih, hüyange aoyinne chingnyu peten chinghahlak mepu tienne ok imante okkeshangpupa wong phalak.

⁷Hüpoi hipalan hüyange ngengpalan nehoi jamloi jokpu jingne iman pala nang. Iman jamloi she wuwüngti hüyange yuwe jokteiye iman nüngneipu phei yashah hüonang. Hipalan-a Kahwange shonpu himang yeshing oklakne jamloi jok, hüyange ngengpalan-a iman tangte yahpeipu ngao yephün oklak ne jamloi jok.

⁸Iman ümeken me shotyapeih tüopa khao-a faipuwe maa, hüyange jaoshepu nyoi üjingha nehoi yetüoh.

⁹“Hatüo kahtawe ao te nyüonang she Iye teihpu? Ijing ngaolan-a ao jingne wongpong? Hatüowa sha-a meimei heeikhon uh wangpu naotak-halan jingne hei meilak!

¹⁰Iye, temante aikek japhei me aikek ja, üleng ja phei me üleng ja, ütüp ja phei me ütüp ja she nyüone ngangnang.”

¹¹Hüma-a numante ütüp nyüowe tamlak jingne Kahwange kahhenglan ngao yashanlakpa ne ngaopu ngaowüng jonlak.

¹²Iye numan khongkümpute toloimei hüyange nyailüm meipu pha, hüpoi numan-e Ite jailak yemong.

¹³Tüojingne Youngwanpawe, numante aikek ja phei me aikek ja, üleng ja phei me üleng ja, ütüp ja phei me ütüp ja she nyüophalak. Hüwante numan-e kaipu ya-kai lili me yashah hüolak. Numan mayahlak, tün me yütlak, hüyange phowe teilak.

¹⁴Sha-a numan jamloipu kahtalan aoyinne tüolan kahtalan tangte Jerusalem me wanglam lam nang, Youngwanpawe hanghe inang jaiyah.

¹⁵Numan otapalan hüke, “Numan-e lipupa phei jiengpu ja yah, hüyange yimching mepulan phei teijanpu ang. Mahlakpa nyih peiwante numan yinpu oklak she numan-e shing, hangjingne numan-e tahleih te mong hüm, hüyange numan yinne angnang” she teih.

¹⁶Sha-a hatüo, Ütahpa Youngwanpawe hanghe inang: “Taowe Zion me mongjüonge hüyange wongnangpu nokjing ja angtam nang. Tüopa me taowe khakshuwe nokjing long ja angnang, hanghe me tüopa ngao nyanne ngoh nang: ‘Aowe ütinglak mokhmengpu yengohlak.’

¹⁷Hüyange ngaotingpa-a sheampuwu ne menglak, hüyange Khakshupuwa tüopatepu wuting ne menglak. Numan monghümpu tahleih khongkümpuwa yilonge poiye teilak, hüyange numan tükke anghah shepuwa muleampuwe menge winlak.”

¹⁸Hüwante litepulan phei numan-e chingmei lingpuwa yahteilak, hüyange yimching phei numan-e janpu yahpuwa yeyahlakne winlak. Aope mahtampupawe moiye kinne teilakei, numan tangme naowe tamphalak.

¹⁹Tüopawe numante napjeih she yelakpe hangphalak. Numan-e tüopa-a wangnyak wangngai nünne shanlakne ngailak. Kahwang mepu ngao üla peipu lep iye nyam nyamshepu üla yahpeilak!

²⁰Hangjingne aowe ya-le-ne yemeipu jamloi shohpu shinleng me shi ne ngang, Ite ye-ompu jamloi shoh-tipu inkhek inne ngangpu kih-e ngohlak.

²¹Iye Perazim kahtang me hüyange Gibeon kahjee me lingpu kih-e; Iye hanghe linglak jingne teih tüopa linglak jingne Youngwanpawe hoklak I toishao yelepe linglak. Iye yoi toishao yashanyalipu toishao sholak.

²²Taowe numante phapu deingaote tahnyi! Numan-e hüke lingma-a, hatüowa numan yinlak jingne ünyei shewan she ngohlak. Kahtoknyu nopu mahtamlak jingne Ütahpa Youngwanpawe tümme shopu taowe jaiyangki.

²³Jaiyah, hüyange taowe numante hanghe i tüopate mong phayah.

²⁴Kah hampa aowe-o yoi kah yelakpe hokke, hüyange üli deilak jingne tüolan tümyange yengoh.

²⁵Ja me Iye deilak nyoi tümyang phei me, Iye hoilai üli hüke longpheng hüyange hoinge deinang. Iye wheat tah hei barley tah üleng üleng deinang, hüyange I kah ja me shüp neiye ülao ülick deinang.

²⁶Iye yoi toi hangke linglak shingnang, hangjingne ima-a Kahwange Ite nyüowe tam.

²⁷Iye longpheng yejema-a hoinge üli konglak jingne aope-o peshüm yejon; tüo nanleiye Iye shetanpu khakshupu hansho jonnang.

²⁸Tüopa te yelakpe noipuwe Iye wheat tah yemengtam; hüyange ülick yekhoihtampe hangke tüopa tangme tongtoi kemne tamme noilak Iye shingnang.

²⁹Tüolan konjong khongkümpu Ütahpa Youngwanpa mepu peinang. Kahwange tümme tapulan-a deitahpu phei, hüyange tüolan-a hipak phe me okpu ngenang!