Read Konyak Naga ISAIA 29 Bible Online

ISAIA 29 - Konyak Naga bible

ISAIA 29

¹Ariel, Ariel, Onyukei, ümeken me David-e chingnyu ling! Wangpeng te wangpeng püotüoh; iman-e momopu einan me peine tamtüoh.

²Tüoyangpoi taowe Ariel mongmengne tamlak, hüyange tüo me shappu hüyange mangshappu ngohlak. Tüoyangpoi Jerusalem ü-sheshao me Ariel ne muh ngohlak.

³Hüyange taowe nangte neikonne dodolak, hüyange nangte yomtep-e neikonlak; hüyange nangte taowe penyu pelak.

⁴Hüwante üphang me taiyange, nange kahtok mepu ngaolak; kahmak üphangpa mepu nang ngaowüng jailak; nang ngaowüng kahtok mepu mieng kihpu ngaowüng kih-e ngailak; hüyange kahmak mepu nang üngsho ngai-e ngailak.

⁵Hüpoi ükhong üyong kahhenglan aoyinne nangte shümnang, kahmak kih-e puwe teilak, hüyange yeonge nyam nyamshepu imanjing nyahponglan-a tahphan kih-e puwe teilak. Mokhshe hüyange yeteihtüope ngohwante,

⁶Ütahpa Youngwanpawe wangkhong wangkhahpu ümeng hüyange minweleipu phei numan yinlak. Iye waishihwangkhah hüyange yemeipu vün shonlak.

⁷Hüwante Kahwangpa wümjong chingnyu shümpu jatlan nyahpong üli, imanjing yonglah hüyange tümme tapu khongküm, sheminlamphe-a shinmang ja leye, wangnyak me ülam ja teihpu kih-e mah tailak.

⁸Zion kahtangte shümme peipu jatlan-a hahhu-yinghuwe shangpu kahta aowe shinmang me I-a hahyinge nge; hüyange seanyaowe muh shinlüopu, yejema-a yengleye nyaipu kahta ja, aowe I-a moh-e yingnang she teih nang hüyange shinlüo shaome I üngsa ea mahteiye ngohpu lenang.

⁹Hüke jakemtüoh hüyange woopa ne mengtüoh! Hüke jakemtüoh hüyange mükmüopa ne mengyah! Wuwüngti hango yenangpe jokyah! Üjom ja nehoi yeyingpute pala tüoh!

¹⁰Hangjingne Youngwanpawe nanga shihu ne, nyaiye shi ne tamnang. Hipalan-a kahtalan jing mükne menglak wongpong, hüpoi Kahwange iman mükmüone hüyange hipalan shang lüm ne tam.

¹¹Hipalan himang leppu ngao lili numan mepu lowe anglak; hatüowa füosang tüpyang phei laitee kih-e ngohlak. Aowe hatüo hangke ilak shingpu kahta ütamte numan-e yah peiye nangte iye minhüo küne tongwante, Iye ilak, Iye ye-oklak yang; hangjingne hatüowa füosang tüpyangki.

¹²Nange kahta ütam aowe tüopa ipu ye-ok Ite phatüohma-a, hüyange hatüo nangte iye tampha she tongtüohma-a, Iye janlak hangke ilak taowe yeshing.

¹³Youngwanpawe i: “Tüolan kahtawe üte yoppe khümnangpu ne jutok me i, hüpoi iman-e ngaopuwa jajang ja, hüyange iman mongjanga ülao ken nyoi ja me angnang. Iman mengpu wanglam hango üje hüpoi kahtawe lingpu ngaokeng hüyange ngaowe angpu hanghepa iman-e mongme shinge ang tüopa hei ngohnang.

¹⁴Tüokhei taowe imante yeteihtüopu hangki yih ja phei me jawe nyamne tamlak. Aoyin kentamongtingpa ne menge ngoh iman üngapa ne lüppe kümlak, hüyange iman deitahpu lili-a jajang japu ne menglak.”

¹⁵Aoyinne iman-e tümtapulan Youngwanpa mepu lo ne ngangnang iman mahnang! Iman-e itte shempulan lowe lingnang hüyange inang, “Aowe teman ngelak? Aowe shinglak?”

¹⁶Iman-e sheminlamphe leihkheih tamnang. Aohipa ünyei wongpong ne menglak! Tük yaopa heiya tük? Kahta jawe linge ngaipu ülam jawe Ite. “Nange tao linge tampu ne yeje” she iye oklak a? Yejema-a Ite “Nange hanghe ling nange yeshing ja” she ilak a?

¹⁷Shohkü nohpu hipak mongme Lebanon üyao pheipu kah ne menglak, hüyange hamme ngohpu kahtok-a phao ne menge yelak.

¹⁸Tüopa nyih me, napanpawe laitee mepu ngao ipu jaipu oklak, hüyange mükmüopa aoyin wangnyak me ngohyangki, iman mük eplak hüyange ngelak.

¹⁹Toinan hüyange innenyaipu kahtalan-e Youngwanpa, Israel Üjao Kahwange hanghepa mongmei pha, ni she tüolak.

²⁰Hatüowa aoyinne eihate shaoshi yateng pha hüyange Kahwangte ye-i-yeshepu hüo, tüolan jingne ükümpa ne menglak. Ünulan lili mahtamlak.

²¹Aoyinne eiha mayah tamlak ngao ngao, aoyinne kahta toipalante shaoshi phalak mepu tien, hüyange aoyinne ütingpa kahtalan-e ngaoting ilak mepu tükke tahleih i, khongküm Kahwange mah tamlak.

²²Tüokhei sha-a, Israel Kahwang Youngwanpa, aowe Abraham shangpu mepu yinnetam, inang: “Ü-Kahtalan, numan shaaji mongshang mongmengpu yengohlak, hüyange numan sheta shaaji wüopuwe kuimahpu yengohlak.

²³Aope numan-e Taowe phapu hayimlan ngelakei, hüwante numan-e Taowa Israel Üjao Kahwang she minyong phalak. Numan-e üte yihnoonlak hüyange üte yashanyalipuwe yonglak.

²⁴Kahta üngapalan-e shinge yahpu ngohlak, hüyange aoyin hipak phe me mongyehahpe ngu-nga imante nyüowe tamlak jingne mongmeilak.”