Read Konyak Naga ISAIA 3 Bible Online

ISAIA 3 - Konyak Naga bible

ISAIA 3

¹Sha-a Youngwanpa, Ütahpa Youngwanpawe, Jerusalem hei Judah mepu sheminlamphe hüyange hanghe me kahtalan-e monghüm-e ngoh, khongkümpu shaaji yah teilak ne ngohnang. Iye iman hahying hüyange imanjing yeng;

²nyahpong hei naomei, kahpa hei hipa, phongyengpa hei lwngmei,

³denga woipa hei bangha, nyüoleipa, lwngwangmanpa hüyange lampheli tük okpu yepahipalan yahteilak.

⁴Hüyange taowe iman ahngpa ne naoshehalan lingtamlak; hüyange nahalan-e iman tang me wanglam lamlak.

⁵Kahta liliye shejawe sheja te khahkolak. Naolilan-e iman jeiyonglante wangshüm hüopu yenanglak, hüyange angsa kahtalan-e iman phei shetokpulante wangshüm hüopu yenanglak.

⁶Iman nokphong kahtalan-e iman yo mepu sheja lelak hüyange Ite ilak; “Nangme jü-inlak ütam ngohnang, tüokhei tüopa shangshih hipak me nang teman woipa ne mengkei”.

⁷Hüpoi Iye janlak, “Taowa tah! Taowe numante jampu ye-oklak yang. Üme hahying yejema-a nyemo hango yenang. Numan woipa ne tao tahling tam!”

⁸Ütingme Jerusalem mahnang! Judah jeetanang! Iman-e ngaopu hüyange lingpu sheminlam phe-a Youngwanpa phei tüi-e, iman-e ütahte ngaiye Kahwang Ite tee-nang.

⁹Iman-e yemeipe teihpuwe iman phei tüi-e yonglak. Iman-e Sodom kahtalan-e lingpu kih-e üko me ünu om. Iman mahnang, hüyange tüopa-a iman-e yoi nying nyingke yah pei.

¹⁰Khakshupu kahtalante itüoh, iman toishaowa hangshin mei. Hanghe jingne iman-e lingyangki tüopa me iman mongmeilak.

¹¹Hüpoi ümeng kahtalan-a mahnang; iman-e eihate hanghe lingyangki tüowe sha-a imante linge yelak.

¹²Ü-kahtalan jingne imante shaoshi phapalan-a nahalan ngohlak, hüyange shekolan-e iman tangme wanglam lamlak. Ü-kahtalan! Numan woipalan-e numan ünyong yete woinang, tüojingne numan woine tampu lam jiengpei tam nang.

¹³Youngwanpawe I ngao phalak jingne tümyange ngohnang, Iye yoi kahtalante ngaophünlak jingne tümteki.

¹⁴Youngwanpawe jeiyonglan hüyange I kahta woipalan ngaophünlak jingne yah peinang. Iye tüopa ümeng yahpei nang: “Numan-e wuwüngkah nyieyah, hüyange numan nok-a toihalan mepu hanghe numan-e yah tüowe maa ngoh nang.

¹⁵Numan-e ü-kahtalante shünge tailak, hüyange toihalante yemeipe linglak shupu yeje.” Tao, Sheyongpupa Ütahpa Youngwanpawe ngaoyangki.

¹⁶Youngwanpawe i: Leihuyah Jerusalem shekolan hangshin otapu! Iman nateang wangte nganyange kemnang. Iman nyakkenpu hipak phe me ngohnang. Iman-e ya jünge kainang, hüyange iman ya-üngme lüngha langyange yawüng jaine tamnang.

¹⁷Tüokhei Youngwanpawe imante shaoshi phalak, Iye iman shanglinne tamlak hüyange iman shangkone linge tamlak.

¹⁸Nyih ja peiküki aope Youngwanpawe Jerusalem shekolan mepu hanghe me iman ota-nang sheminlam phe, iman ya-üng me langpu, iman shangme yahpu, iman üng me yükpu juyük,

¹⁹hüyange iman yak-üngme yahpu yahteilak. Iye imanjing shanglümkhek,

²⁰hüyange iman shaoshaoh yahteilak; iman-e iman yak-üng me hüyange shieng me yahpu shiengnyeih yahteilak;

²¹yaklan hei nateang me yahpu shüptet;

²²shemeipupa phakshaoh ülaolan, sheko phakshaoh ülao, phakwai, hüyange ngin-nyekhoklan;

²³iman-e ngaiye inpu nyemolan, lümphutkhek ükhailan hüyange iman shiengnyeih nye hüyange shanglümkheklan yah teilak.

²⁴Üpe ümei yahhah shepu nanleiye iman seanamlak; shienghit ümei nanleiye iman-e wu ümeng yahlak; shemeiyaomapu shangmin nanleiye iman shangkolak; khek ümei nanleiye iman-e monnye inlak; iman shemeiyaoma hahshepu nanleiye wüotüolak!

²⁵Chingnyu mepu kahtalan, üting, wong shenangpupa kahtalan nehoi wehok me toilak.

²⁶Chingnyu peten lan-e shapyoonglak hüyange üngwünlak, hüyange chingnyuwa sheko ja pümkeng me kahtok me englüm yam-e shotpu kih-e ngohlak.