Read Konyak Naga ISAIA 30 Bible Online

ISAIA 30 - Konyak Naga bible

ISAIA 30

¹“Hokke wepu hayimlan onyukei” she, Youngwanpawe inang, “Taowe yelingpu taitam me iman woi, hüyange ünu ja tang me ja she shünge angyange Taowe yemongpute chingmei linge teinyan.

²Üte yetongpe iman jamlak yamme Egyptte tai. Iman-e Egypt kaiye iman yinne tamhu, tüokhei iman-e ütinglakpu Egypt ahngpate ang.

³Hüpoi imante jamlak jingne Pharaoh wong yenanglak, hüyange Egypt kaiye yinne angpuwa mahshümpu me üküm ngoilak.

⁴Iman lampulan Egypt chingnyulan Zoan hüyange Hanes ngoiteiye ngohyapoi,

⁵Judah kahtalan-e mong yehüm oklak jat, aope iman-e wongpong ne mengyapeih, hüwante yejam okpu jat ja te monghümme ngohyah puyang she mongmenge wüowe teihlak.”

⁶Hatüowa henyipye wanwüng jeng mepu yinmoklan ju-itwanshem ngaolan: “Lampulan, ümeken me yengkong mailang nyoi hüyange ümeken me soihüng pheipu pulan ngoh hüyange üyang pheipu pulan ngoh, tüopa ütuh pheipu kahmük kaiye kemnang. Iman-e imante hang jampu-o yepha oklak jat jingne yeonge pheeiwanpu hünghaolan phei gado hei udhlan me ki.

⁷Egypt jampu phapuwa jajang japu. Tüokhei Taowe yhate minphe nyikpu ngohnang, ‘Wong pong yenanglak üyang pheipu pu.’”

⁸Kahwange kahtalan hanghe leye ngoh laitep ja me nyanlak jingne üte i, hümme nakshih, iman hangshin ünu me ngohyangki jinjintepu jingne nyanne angpu ngohlak.

⁹Iman-e hipak phe me Kahwang phei tüi-e yong, hipak phe me Youngwanpawe nyüopulan yeyah.

¹⁰Iman-e hipalante jünge ngohlak jingne i. Iman-e i, “Hanghepa üting tüopa jeng toman phei tahngao pha. Toman-e hanghe jaihu tüopa tomante ipha. Toman-e lowelamme tampu toman-e anglakei.

¹¹Toman tailak mepu shengtüoh hüyange toman lam tienpu laktüoh. Toman-e numan Üjao Israel Kahwang jeng yejaihu.”

¹²Tüokhei üjao Israel Kahwange ipu hatüo ngohnang: “Taowe hanghe i tüote numan-e ye-i-yeshepe ling hüyange yakphei lükpalan hüyange lowelampalan te monghüm.

¹³Tüowe numan-e püohnang. Numan-a phüppu ümee ngaite phei jan üdao kih-e mokhshe numan toitalak.

¹⁴Numan-a kümptük kih-e paikhoihlak, jamloi menge paikhoihpu kaiye vün pheipu vünhan hoklak üne üphinha ja nehoi yeto yejema-a yengtük mepu yeng shaolakne üphinhaja nehoi yetolak.”

¹⁵Okkeshangpu Youngwanpa, Israel Üjao Kahwange kahtalante inang, “Leihyekei hüyange jünge üte ütinglak yah. Hümme nakshih numan wanlak hüyange yinpu oklak.” Hüpoi numan-e tüopake yeling!

¹⁶Tüo nanleiye, numan-e numan wepalan mepu shephetpupa koiponglan me shotyange yinlak tüm. Hatüowa shushihpu, numan-e linglak ne-a yinne nganglakpa! Numan koiponglan phet nang she numan-e teih, hüpoi aoyinne numante jangnang imanpa shephet she ngohlak!

¹⁷Aope numan-e wetaipu wepa ja ngelakei numan haja phette tailak, hüyange numan khongkümpu phette taitamlakne wetaipalan naoshe nga ngohphei ma-a wangpu. Kahmüoh üshang me keiphong lieng shaha tüohyange numan nyahponglan yankümlak!

¹⁸Tüoyangpoi numante yayeng shüpshelak jingne, Youngwanpawe tannang. Iye numante shüpshelak jingne tüm yange ngohnang hangjingne ima-a Iye jinte hanghe ütingpa tüo hei lingnang. Aoyinne Youngwanpate ütinglakpu ang iman mongmeilak.

¹⁹Jerusalem me ngohpu Zion kahtalan shaaji shappu yenanglak. Youngwanpa-a shüpsheye teihpu phei, hüyange jamlak jingne aope numan-e Ite üngwünlakei, Iye numante janlak.

²⁰Youngwanpawe numante shewanpu yatuhshao me pongne-o tamlak, hüpoi numante nyüowe tamlak jingne I yoi nying nyingke tüoken me ngohlak; hüyange shaaji numan-e I yamlak wongpong ne yejelak.

²¹Numan lam pomme taiye yaknya yakjah ye me waa-e ngohma-a; numan-e numan phin me I ngaowüng hüke ipu jailak, “Lamnyuwa tüome, tüote woitüoh.”

²²Numan-e khüm phei lingpu peshaolan hüyange hon phei yaopu peshaolan yah ngailak, hüyange tüolan-a mak ja winpu kih-e hüke üngwünne winlak, “Ü-mepu yantepha!”

²³Hangkihting me numan-e numan jing üli deilakei, tüolan jonge tamlak jingne Youngwanpawe wai shonlak, hüyange numante tahlick üngang yahphalak, hüyange numan mahulan-e heeijong üngang tüolak.

²⁴Numan kah hokpu mahu üpong hüyange gadolan-e shemeipupa hüyange yowe angpu heei hahlak.

²⁵Aope nyih numan wepalan jing yomteplan omlakei hüyange iman kahtalan toilakei, kahmüoh kahtang lili mepu yengpeiwo ngaiye yeng yünne talak.

²⁶Linnyuwa wanghe shinne teelak, hüyange wanghe-e wangpangpute ngohpu phei üphong nyit nyeiye teelak, nyih nyit me helak shinne nyih ja me helak. Tüolan khongkümpuwa aope Youngwanpawe Iye yoi kahtalante phapu ma kote sha tamme hüyange meiye tampu ngailakei hüwante ngailak.

²⁷Leihuyah, Youngwanpa üjai mepu peinang. Vün hei vünkhuh-e I mongshih ngaipuwa hüonang. Iye ngaonang, hüyange I ngaopuwa vün kih-e hahnang.

²⁸I sheshao me Iye shemin lamphe wükpanne teipu muleampu kih-e wangyang shonnang. Hatüo moipuwe jatlan mahtamnang hüyange iman-e ümengpa tümpu üküm ngoine tamnang.

²⁹Hüpoi numan Kahwangpa kahtalan-a, mongmeilak hüyange üjao mo mowante yaning me numan-e lokpu kih-e loklak. Numan-a, aoyin Israel yintampa, Youngwanpa khümjingte taiwante vewo hemwüng phei taiyapeih tüo kih-e mongmeilak.

³⁰Youngwanpawe kahta lilite I okkeshangpu ngaowüng jaine tamlak hüyange I mongshih ngaipu wong shingne tamlak. Vünloong, wangphom ünyak, yilong, hüyange akshengyeng wai üngang ngohlak.

³¹Aope iman-e Youngwanpa ngaowüng jailakei hüyange I mepu shangne tampu wong shinge peilakeih Assyrialan nyamme mahlak.

³²Youngwanpawe imante üne-o shet üne-o shet wante, I yoi kahtalan-e kongki ümtük hei pheam wüng phei hem lok khan loklak. Kahwang Iye Assyrialan phei hoklak.

³³Hipak nangjange taiteki ümeken me Assyria ahngpa jaklak vün üyong nyoijing ja tümteki. Hatüowa yeonge lu hüyange khao, hüyange hatüowa peshüoh shinne dao. Youngwanpawe tüopa me vün pah tamlak jingne yengyin vünloong lüohetamlak.