Read Konyak Naga ISAIA 31 Bible Online

ISAIA 31 - Konyak Naga bible

ISAIA 31

¹Aoyin Egypt mepu jamlak yamme tai iman onyukei! Iman-e peamlange wongnangpu Egypt nyahponglan, koiponglan, pongtongtoilan, hüyange wetaipalante monghüm. Hüpoi iman-e Israel Üjao Kahwang, Youngwanpate mong yehüm yejema-a jamlak jingne Ite yetong.

²Tüoyangpoi Iye hanghe ling Iye shingnang! Iye mahlakpa shontam nang. Ümeng kahtalante shaoshi phalak jingne hüyange aoyinne iman yinne angtam nang imante Iye nyamshaopu peitam nang.

³Egyptlan-a kahwanglan-e yeje, iman-a kahtanyuha hei. Iman jing koiponglan-a iymei, hüyange yaha ne yeje. Aope Youngwanpawe toi linglakei, wongnangpu jat nyamme ninlak, hüyange tüopate jampu wongyenangpu jat leam talak. Iman moilan mahtamlak.

⁴Youngwanpawe üte i, Yengkong mailange yoi-e toipu yinmok tangme ngohyange hüyange jaja shinne nyeeyompalan I phei tüi-e wenneka-e nyikyapoi, imante hangko yeteih, yejema-a iman ngaowüngte mong yephapu kih-e, hanghe-o Ütahpa Youngwanpa Zion kahtang mepu tükke angne ye-ok.

⁵Wang awhalan-e ülüp mepu ühalan wangme puwe yompu kih-e, tüo kih-e, Tao, Youngwanpawe Jerusalem jongwanne hüyange yomme anglak.

⁶Youngwanpawe inang, “Israel kahtalan, numan-e ünu ling hüyange ü-phei tüi-e yong. Hüpoi sha-a, ü-tangte leih yekei!

⁷Hipak ja peiküki aope numan khongkümpuwe numan ünu toishao numan-e lingpu hon hei khüm peshaolan winne kümlak!

⁸“Assyria-a wehok me mahlak, hüpoi kahta wonge yeje. Assyrialan shapju mepu phette tailak, hüyange iman naoshelan-a rha ne linge tamlak.

⁹Iman ahngpa-a yeonge nyampu phei phette tailak, hüyange woipalan-a jamloi nyampuwe iman jing shapju keiphong tüohlak.” Youngwanpawe ngaoteki, Youngwanpa ao te Jerusalem me yoppe khümnang hüyange tüoken me ao jing toidopu vün jaktam nang.