Read Konyak Naga ISAIA 32 Bible Online

ISAIA 32 - Konyak Naga bible

ISAIA 32

¹Leihuyah, ahngpa jawe khakshupu phei wanglam lamlak, hüyange kahmük me wanglam lampa lan-e ngaotingpa phei wanglam lamlak.

²Iman lili wangyang mepu lojing kih-e hüyange waishihwangkhah mepu lojing nyoi kih-e ngohlak. Iman-a wanwüng jeng me yünne tapu yengpeiwo kih-e ngohlak; hango yenangpu towe nyaipu kahmük mepu longkhaonyu yashüm kih-e ngohlak.

³Hüwante aoyinne ngenang iman mük shaaji büange ye-anglak; hüyange aoyin me jai oklak na ngohnang iman-e jailak.

⁴Iman shaaji yenün okpu yengohlak, hüpoi iman-e üpong tüopu yee phei toi linglak hüyange iman-e hanghe jingne teih ilak.

⁵Aowe-o ngayounpa-a yihnoonlakpa she yeteihlak yejema-a ühakyekohpu kahta-a tingkhakke ngohnang she yeteihlak.

⁶Üngapawe ngayounne ngaolak hüyange ümengpa linglak jingne teihlak. Iye hanghe ling hüyange Iye hanghe ngao tüolan-a Youngwanpate yaolepune hei mengnang, hüyange Iye aope-o seanyaopate uhyingpu yenang, yejema-a yenglepalan te yinglak hango yephatam.

⁷Woopa kahta-a ümengpa hüyange toimeng lingnang; Iye toihalan ngaoleih iye menge lowelamme tamnang hüyange iman tinge ngohpu mepu tien nang.

⁸Hüpoi meimapu kahtawe yepüohyepinpe lingnang hüyange hanghepa üting tüojingne mongjüonge yongnang.

⁹Numan shekolan aoyin nyaishümpu üyin, mongshang mongmeng yenangpe nyoi, taowe hanghe i jaiyah.

¹⁰Numan sha-a mongme huwe ngohne ok, hüpoi hakih tingme ngaiwanga numan mongshang mongmenglak; hangjingne numan jingne yahlak wuwünglick yengohlak.

¹¹Numan nyaishümpu üyin, mongshang mongmeng yenangpe nyoiyangki; hüpoi sha-a, nyampu phei nintüoh! Numan jing nyemo khoktüoh hüyange numan shiengshüm me monnye hittüoh.

¹²Mongmeng puphei numan düamte tüptüoh hangjingne üyao pheipu kah hüyange wuwüngkahlan menge tamteki;

¹³hüyange ü-kahtalan kahmük me huhpee hüyange phao jupeng ngaiteki. Ümeken me kahtalan mongmei tüolan nok üshei me, hüyange mongmeipu üyin ne maayangpu chingnyu jingne shaptüoh.

¹⁴Ahngnok nehoi tüohlak hüyange ahngjong chingnyu-a lanshe wüngmakke linge tamlak. Imante yomhümpu noklan hüyange yomteplan jin jintepu jingne heamme mahlak. Tüoken me phao gadolan kemmeyonglak, hüyange nyeelan-e tüoken me hahnyoi tüolak.

¹⁵Ütang yemepu teman tangme yaha shokke mantam mantam; hüyange wanwüng jeng-a ülick licktampu kahne manmengtam manmengtam, hüyange ülick lickpu kah-a wanwüngjeng she man i man i hatüo hüke ngohlak.

¹⁶Hüwante wanwüng jeng me ngaotingpa linglak, hüyange ülick lickpu kah me khakshupu ngohlak.

¹⁷Khakshupupa ülick-a chingmei ngohlak; khakshupupawe ngailakpa-a ümok-hümme hüyange monghahpu jinte ngohlak.

¹⁸Ü-kahtalan mongshang mongmeng mepu yanne ngohlak, hüyange iman noksalan chingmei hüyange yintampu ngohlak.

¹⁹Phao me yilong yüt yapoi, hüyange chingnyu-a shaohshin yapoi;

²⁰deiha liha jingne yeng üngang phei hüyange gado hei mahulan jingne hahnyoi kenphe me wangmanne! Numan hangshin mongmeilak.