Read Konyak Naga ISAIA 33 Bible Online

ISAIA 33 - Konyak Naga bible

ISAIA 33

¹O mahtampupa nang jingne onyukei. Aowe-o nangte yakphei lükke nyieyahne yetam yejema-a lowe yetamyapoi, nange lükke nyieyah hüyange lowelam. Hüpoi nange nyielak hüyange lowetamlak hipak üküm ngoilak, hüyange nang yoi nying nyingke nyieyahne tamme hüyange lowetampalan yak me onglak.

²O Youngwanpa, tomante shüpshe pha. Toman-e toman monghümpu nang me angyangki. Nyih jeih she toman jongwanne angpha hüyange shangpu hipak me toman yinpha.

³Aope nange toman jingne hokyapeih, jatlan shapju ngaowüng mepu phette yanne kümnang.

⁴Nyaodukh-e shaijempu kih-e, nyeiyahpalan-e shaijem; nyaodukh-e khüppu kih iman-e tüopa-a khüp-e küm.

⁵Youngwanpa hangshin kheyongpu; Iye khongkümpu tangme wanglam lam nang. Iye Zion-a ütingpa hüyange jaowe shapuwe maatamlak,

⁶hüyange jat üyin shinne angetamlak. Iye hipak phe me yoi kahtalan yinne angnang hüyange imante konjong hei shingemanpu pha nang. Iman-e Kahwangpate nyamlepuwa Zion jingne shengngin sheyongpupa.

⁷Leihuyah, mongyongpu kahtalan-e jamlak yamme chingkeng lamnyu me üngwün nang. Lampulan aoyinne chingmei yahpeilak jingne ngang iman yeonge khah-e shapnang.

⁸Tongkeng lamnyulan-a jamloi ütuh ne menge mahteiye tüolan me ao-o yekem. Teijanpu lili menge küm hüyange tümmetayangpu lili püohpinteki. Shaaji ao te-o wangshüm teiphapu yenang.

⁹Kahmük-a mangshapnang hüyange wüngmakke ngohnang. Lebanon phao kuimah, kahyao pheipu Sharon kahjee-a pheih kahtok kih-e, hüyange Bashan me hüyange Carmel kahtang me peyaklan pee mepu yeinang.

¹⁰Youngwanpawe jatlante inang, “Sha-a taowe toilinglak. Taowe taowa hangshin wongnangpu hüolak.

¹¹Numan-e üfan deilak, numan-e jüngoong hei ngaitam lak. Numan lüohepu-a numan hahshulak vün ne meng.

¹²Kahtalan-a shun ne jakpu longnyu kih-e shuwe khoihlak, ühuh kahmakne menge jakpu kih-e jaklak.”

¹³Kahta lili ü-o me hüyange üjai me ngohpalan-e Taowe hanghe ling jaiyah, hüyange ü-ünganwong shing yah.

¹⁴Zion mepu ünu kahtalan nyampu phei nin nang. Iman-e inang, “Kahwangpawe ngaophünpuwa jin jinte pah-e ngohpu vün kih-e ngoh nang. Teman yo me ütam hükih-e vün long me üyin ngoh oklak a?”

¹⁵Hanghepa üting tüopa linge hüyange ngaoma-a nanga üyin ngoh ne ok. Toinanpalan lowe tamlak jingne nang wong tahjon hüyange yakjai tahyah. Aoyinne kahta toilak jingne tümnang tüolan phei, yejema-a ülao ünu toi linglak tümpalan phei tah om.

¹⁶Hümme nakshih numan yinlak; wongnangpu yomtep me ngohyange numan yinpu ja leye numan yinpu okke ngohlak. Numan-e hahlak jingne nük, yinglak jingne yeng tüolak.

¹⁷Numan mük-e ahngpa ja-a üne-o müktishiwa puphei kahmük üshei yeme yak noyange wanglam lampu ngelak.

¹⁸Lintepu nyam nyam shepu mokhlakpa tang me nang mongjange teihnyüolak: “Aoheye iyeleinang I üme ngohnangki? Aoheye kahngin yah nang I üme ngohnangki? Aoheye longnok tok-hei leinang, I üme ngohnangki?”

¹⁹Numan-e shaaji aoyin numan-e yeshing okpu ngao ngaoyange jamloipoipu kahhenglan-a ao-o ye-ngelak.

²⁰Zionte leitüoh, ümeken chingnyu me teman-e teman mengpu wanglam momo. Jerusalemte leitüoh! Nyoilak jingne hangshin meipu nyoi ne menglak! Hatüowa aope-o yepopu nyenok, hanghe jing hanlag aope-o yehuk hüyange ao jing wu aope-o yephün, tüo kih-e ngohlak.

²¹Youngwanpawe temante yoi müktishiwa hüo phalak. Teman yengyin ükhao hüyange yengyin nah yinme nyoilak. Hüpoi wepalan yenglin tüolan me yatte yekemlak.

²²Hangjingne Youngwanpa yoi nying nyingke teman ahngpa ne menglak; Iye teman tangme wanglam lamlak hüyange Iye teman jongwanne anglak.

²³Tüolan yenglin me kinkange jhotpu lili jajang ja; yatte taipu ye-oklak! Teman-e wepa nyahponglan jing moth khongküm nyieyahlak. Hüyange tüopa-a jamloi she ngohlak tüokaiye yafaipalan-e nehoi meitam tüolak.

²⁴Teman kahmük me nyoipu aowe-o shaaji daktinpu ngaolan yepeilak, hüyange ünu khongküm ümeng wintamlak.