Read Konyak Naga ISAIA 34 Bible Online

ISAIA 34 - Konyak Naga bible

ISAIA 34

¹Owe jemkei, jatlan mepu kahtalan üshei! Neikonne jemtüoh hüyange jaitüoh. Kahtoknyu nopu hüyange tüopa me nyoipu lili tüome peine tamtüoh hüyange jaitüoh.

²Youngwanpa-a jatlan üsheite hüyange imanjing nyahponglan khongkümpute mongshih ngainang, Iye iman-a mahtamlak jingne ümeng phateki.

³Imanjing manga yemulak, hüpoi tüoken me seanamme shüpyange ngohlak; hüyange kahtanglan-a iy phei taakke ngohlak.

⁴Wangdang me ngohpulan khongküm kahmak ne menge khoihlak. Wangdanga laitee lüppu kih-e teeyange ye-ngepe mahlak, hüyange shanhalan-a wuwüngwu yejema-a phukpee mepu üyaklan yeipu kih-e yeilak.

⁵Youngwanpawe wangdang me yoi yanglow tümteki, hüyange aoyin kahtalante Iye mahtamlak jingne yeitam, sha-a tüopawe Edomte metlak.

⁶I jing yanglow-a toido wantepu nyeeha hüyange younlan iy hei üyao kih-e, iman iy hei üyaowe maalak. Youngwanpawe tüopa toidopuwa Bozrah chingnyu me phalak. Iye hatüowa Edom kahmük me toipu üyong ne linglak.

⁷Kahtalan-a pongwa hüyange mahu üpong ühalan kih-e langlak, hüyange kahmük-a iye taakke hüyange üyaowe maayange ngohlak.

⁸Hangjingne tüopa-a Youngwanpawe Zion yinyange hüyange yhatepu wepalante phuh hahpu hipak ne menglak.

⁹Edom yengyinlan-a wüalüng ne menge mahlak, hüyange kahtoklan-a kahnyan ne menge mahlak. Kahmük noshepu wüalüng kih-e hahshulak.

¹⁰Hatüowa wangnyak wangngai pah-e ngohlak; hüyange tüopa mepu vünkhuh jin jintepu jingne ngaiye ngohlak. Kahmük-a jintok te jin winne ngohlak, hüyange tüopa kaiye aowe-o nishe yekemlak.

¹¹Awkhuh hüyange khawang lanne kahmük-a yomlak. Tüopa linge ngaishao me ngohyangpu kih-e Youngwanpawe tüopa-a nishe winne tüohpu ükeng kahmük ne linge tamlak.

¹²Kahmük wanglam lamlak jingne ahngpa yenanglak, hüyange woipalan khongkümpu yenangpe ngohlak.

¹³Ahngnok hüyange meipe latyangpu chingnyulan khongkümpu me huh hüyange phao ümeng nyimlak, hüyange tüoken me hiyan hei awkhuhlan ne nyoijing linglak.

¹⁴Phao yinmoklan tüoken me lüngleilak, hüyange laalan-e (mieng) teinyikpu ngohlak. Toloimeilak nyoi yamme laanyulan tüokente peilak.

¹⁵Awkhuh lan-e imanjing ülüp linglak, ükek keklak, iman ühalan ümlak hüyange tüoken me iman jingne paowetüklak. Pongkonlan tüoken me ja phei me ja, ja phei me ja she jemlak.

¹⁶Youngwanpa laitep mepu üyin yinmoklan jingne yamtüoh hüyange hatüowe hanghe inang itüoh. Tüolan yinmok mokh-halan ja nehoi pe-e yetüohlak, hüyange ja nehoi üpi üpong yenangpe yengohlak. Hüke ngailak jingne Youngwanpawe ngaopha yangki. Iye yoiye muh iman jamme jemne tamlak.

¹⁷Hatüowa Youngwanpa aowe kahmük-a iman yo me tamlak hüyange iman moilante yoi yoi meitam phalak. Kahmük me iman jin tokte jin nyoilak, hüyange hatüowa jinjinte iman jingne menglak.