Read Konyak Naga ISAIA 35 Bible Online

ISAIA 35 - Konyak Naga bible

ISAIA 35

¹Pheih kahtok-e mongong monglelak, hüyange wanwüng kahtok me jupenglan penglak.

²Pheih kahtok-e hem loklak hüyange mongmeipuwe üngwünlak; hatüowa Lebanon kahtang shemei yaomapu shinne shemei yaomalak; hüyange Carmel hei Sharon kahyao ngaipu shinne kahyao ngohlak. Youngwanpa müktishiwapu moilanne ngelak, I kheyongpu hüyange ünganwong moilanne ngelak.

³Wong yenangpu yakte wong, hüyange wong yenangpe ninpu yatuhte wong phalak.

⁴Aoyin mong toitainang moilante itüoh; “Wong nangyah hüyange tahnyam! Kahwang-a numan yinlak jingne peinang, numan wepalante shaoshi phane peinang.”

⁵Hüwante mükmüopalan-e ngepu oklak, hüyange napan palan-e jailak.

⁶Yafaipawe hoomlak hüyange polok lak, hüyange aoyinne yengao okpe ngoh (yee shohpa) mongmei puwe üngwünlak. Pheih kahtok kaiye yengyinlan mepu yeng yünlak;

⁷sheampu pheih-a yengtung ne menglak, hüyange kahtok üwan-a yengpeiwo-e maalak. Ümeken me hiyanlan nyoi ngoh, tüoken me hüngneam hüyange ngeihyan jonglak.

⁸Tüoken me tongkeng lamnyu, “Üjaopa Lamnyu” she nyikpu ngohlak. Ünulan ao-o tüopa lamnyu me yekemlak; üngapalan aowe-o tüopa lamme kempalan ünyong yete yewoilak.

⁹Tüoken me yengkong mailang hango yenanglak; nyam nyam shepu yinmoklan hango tüopa lamte yekailak. Aoyin Youngwanpawe yinyangki tüolan hei yoi nokte tailinne tüopa lamte kemlak.

¹⁰Mongmeipu jingne hem lokke hüyange üngwünne hoongli mongong puphei iman-e Zion ngoilak. Iman jinjintepu jingne mongmeilak, mongshang mongmengpu mepu jinte yanne ngohlak.