Read Konyak Naga ISAIA 36 Bible Online

ISAIA 36 - Konyak Naga bible

ISAIA 36

¹Judah me Hezekia wangpeng penme peli shepupa ahngpu hipak me, Assyria ahngpa Sennacherib-e meipe latyang phei Judah chingnyulan chinghah hüyange iman om.

²Tüophei me Iye yoijing woipate nyahponglan üngang yahyange Lachish mepu Jerusalemte taiye Ahngpa Hezekiate I phangte ongkei she kangtüoh she ngaopha. Woipawe ümeken me inkhek takpalan-e toi ling, ütokpa yengnung mepu yeng taipu yenglam lamnyu pong me yong.

³Judahlan naoshe lüm Iphei hüolak jingne yu; ahngnok woipalantepu yakjongpa Hilkiah üha Eliakim, gho yaknyanpa Shebna, hüyange nyanne angpu nyanpatepu yakjongpa, Asaph üha Joah.

⁴Rabshakeh-e imante hüke i, “Hangheye ahngpa Hezekia-a teshinne monghümne tampu ahngpawe shinghupu yang!”

⁵Iye hüke kange i, “Ngao shahawe nyahponglan wong hüyange okkeshangpu nanleipu oklak she numan-e teihnangkü a? Assyria phei tüi-e hokke wepute numante jamkülak she numan-e ao te teih nangki?

⁶Numan-e Egyptlan-e numante jamkülak she monghüm nang, hüpoi tüopa-a shengshaoh ne ngeihyan jonpu kih-e hei ngoh külak, tüopa-a paikülak hüyange nang yak kolak. Aope ütamme Ite monghümlakei Egypt ahngpa-a tüokih-e ngoh nang.”

⁷Assyrialan woipawe yelakpe hüke i, “Yejema-a numan Kahwang Youngwanpate monghüm nangki she numan-e üte itehu? Aope Iye Judah hüyange Jerusalem kahtalante wümjong ja shingha me khümlak jingne ngaoyapeih Hezekiawe Youngwanpa Üjao Khümjing hüyange wümjonglan mengewin.

⁸Taowe ahngpa min me numan phei teingaopu ja linglak. Numan-e hi tüopa tangme ongpu oklak kahtalan tüolak ne mengma-a taowe numante koipong haja ni phalak.

⁹Numan-a Assyrialan woipa üjoiha ja phei nehoi yephün oklak, tüoyangpoi numan-e Egyptlan-e numante pongtongtoi hei koiponglan shon phalak she monghüm nang.

¹⁰Tüotokte Youngwanpawe yejampute taowe numan chinghah-e hüyange mahtam phalak she numan-e teihnang kü a? Youngwanpawe Iye chinghahlak jingne hüyange mahtamlak jingne üte ngaoyangki.”

¹¹Hüwante Eliakim, Shebna, hüyange Joahlan-e Rabshekeh te ngao, “Tomante Aramaic me ngaopha. Toman-e tüopa jaiye oknang. Hebrew me tahngaokei; jantpe tangme ngohpu kahta liliye jaiye ngoh.”

¹²Hüpoi Rabshakeh jan, “Numan hüyange ahngpa shahate ngaowe tamlak jingne ahngpawe tao shon she numan-e teih nangkü a? Yeje, taowe aoyin jantpe tangme shotte ngoh tüolan kahtalan phei-o aoyinne iman-e püttewinpu ih hahlak hüyange iman-e shokpu sea yinglak ngohnang hüke numan-e yah-hupu kih-e ngaonang.”

¹³Tüophei me Rabshakeh yong hüyange Hebrew me üngwün, “Assyria ahngpawe numante hanghe inang jaitüoh!

¹⁴Iye numante Hezekiawe numan lowe lamne tahtam she deingao phanang. Hezekiawe numan yintampu ye-oklak.

¹⁵Hüyange numan-e Youngwanpate monghümme tamlak ne Iye numan yohne tahtam. Youngwanpawe numan yinphalak she hüyange Iye toman Assyrialan nyahponglan-e numan chingnyu omlak mepu lakne tamkülak she tahteih.

¹⁶Hezekiate tahjai! Assyria ahngpawe numante chingnyu mepu lüowe ngaiye I phangte ongyah she ngao pha nang. Numan lilite numan jing wuwüngwu mepu wulick hüyange numan jing pee mepu phuklick hahlak jingne, hüyange numan jing yengnung mepu yeng yinglak jingne tamlak.

¹⁷Ahngpawe numan ümeken me wuwüngti phalak jingne wuwüngkah hüyange sheiwong jingne tah lickpu sha-a numan ngohpu kahmük mei mei kihpu me mannyoitam mannyoitam hahyingne tamlak.

¹⁸Youngwanpawe numan yinne tamphalak üja she teihne tamme Hezekia te numan woopa ne tahmengtam. Assyria ahngpa mepu jatlan kahwanglan-e iman jat yintam yashi?

¹⁹Hamath hüyange Arpad Kahwanglan, sha-a iman ümeken me ngohnangki? Sepharvaim Kahwanglan-a üpu? Ütam jawe Samaria yintampu a?

²⁰Tüolan jatlan Kahwanglan jawe nehoi aope-o toman ahngpa mepu iman jatlan yeyin ok? Hüma-a Youngwanpawe Jerusalem yintam phalak she hangheye numante teihne tampu?”

²¹Hüpoi Ahngpa Hezekiawe imante hüke ngohlak jingne ngaowe tampu meimei kih-e, kahtalan-e ngao yengaipe ngoh; iman-e ngao pha ja nehoi yejan.

²²Tüophei me mongmengpu phei Eliakim, Shebna, hüyange Joah lan-e imanjing inkhek hit hüyange leihye hüyange Rabshakehwe hanghe i ahngpate ngaolan pha.