Read Konyak Naga ISAIA 37 Bible Online

ISAIA 37 - Konyak Naga bible

ISAIA 37

¹Aope Ahngpa Hezekiawe iman mepu ngaolan jai, mongmeng puphei Iye yoi inkhek hit, monnye in, hüyange Youngwanpa khümjing te tai.

²Iye ahngnok woipalan yakjongpa Eliakim, gho yaknyanpa Shebna hüyange ngengpa shelwngmeipu Amoz üha hipa Isaia tangte shon. Imane-o monnye inyangki.

³Isaiate phawe tamlak jingne Iye imante ngaowe tampu ngaolan-a tüone ngohyangki: “Tenyih-a shangpu nyih yang; tomante shaoshiyateng ne tamteki hüyange mongmengpu phei ngoh nang. Toman-a sheko ja aowe moipai ne oteiye, hüpoi moipaiye tamlak jingne jamloi wong yenangpu kih-e ngohnang.

⁴Assyrialan ahngpawe üyin Kahwangte yaowele tamlak jingne yoi woipa ütahpa shonyangki. Youngwanpa nang Kahwange tüopa yaowelepu jaishih hüyange aoyinne imante ngaowe tam imante shaoshine tamshih. Tüokhei jetohapu kahtalan jingne nange yoppha.”

⁵Aope Isaiawe ahngpa Hezekia mepu ngaolan tüo,

⁶Iye tüopa janne yepu shonne ye: “Youngwanpawe nangte inang Assyrialan-e Iye nang yintampu min ok ja she ngaowe nyamshaopu me nang tahnyam.

⁷Taowe Ite ngaowoong jai ne tamlak yaha phalak, tüokaiye I yoi kahmükte leih yene ngailak, hüyange tüoken yoi kahtok me yanglow phei Taowe I yahlak.”

⁸Rabshakeh leihye, hüwante ahngpa-a Lachish mepu yayongteki hüyange Libnah phin mepu chingnyulan phei hoknangki she jai; tüokhei Iphei üpong tüolak jingne I tüokente tai.

⁹Ethiopia ahngpa Tirhakahwe woiyange Egypt nyahponglan, iman chinghahlak jingne peiküki shepu ngao Assyrialante ngoi. Aope ahngpawe tüopa jai, Iye Judah Ahngpa Hezekiate nyanpu lai phei Ite tüopa ngao ilak jingne shon;

¹⁰“Nange ütinglakpu Kahwange nanga ü-yak me minyeija she nangte iyangki, hüpoi tüopawe nang lo ne tahtam.

¹¹Iye mahtamne she tümyangpu jatlante Assyrialan ahngpawe hanghe lingyangki nange jaiyangki. Nang yinne oklak she nange teihnang kü a?

¹²Ü-pajeiyonglan-e Gozan, Haran, hüyange Rezeph chingnyulan mahtam, hüyange Betheden kahtalan aoyin Telassar me nyoi toiküm, hüyange iman kahwanglan aowe-o iman yintampu ye-ok.

¹³Hamath, Arpad, Sepharvaim, Hena, hüyange Ivvah chingnyu ahngpalan ümeken me ngohnangki?”

¹⁴Ahngpa Hezekiawe ngaolan kipa mepu nyanpulai tüo hüyange tüopa iye lei. Tüophei me I khümjingte ong, Youngwanpa sheshao me nyanpulai-a ang,

¹⁵hüyange Hezekiawe Youngwanpate hüke yop,

¹⁶“Ütahpa Youngwanpa, Israel Kahwang, nang shotjing Cherubim tangme shotpupa, kahtoknyu ahngchinglan khongkümpu tangme wanglam lampu, nang jashing Kahwang. Nange kahtoknyu hüyange wangdang lingengai yangki.

¹⁷Sha-a, Youngwanpa, tomante jaipha hüyange tomante hanghe ngainangki leipha. Nang üyin Kahwang yaowelelak jingne, Sennacherib-e ngaopu khongkümpute jaitüoh!

¹⁸Toman khongkümpuwe shingnang, Youngwanpa, Assyria ahngpawe jatlan maawe mah tamyangki, iman kahtok ükengne menge tamyangki,

¹⁹hüyange iman kahwanglan jakke tamyangki, hangheyin kahwanglan ne yeje, hüpoi kahta yakke lingpu pee hüyange long peshaolan.

²⁰Sha-a, toman Kahwang Youngwanpa, Assyrialan mepu toman yintampha, hümme nakshih kahtoknyu jatlan nopuwe nang shaha Kahwang she shinglak.”

²¹Hüwante Isaiawe ahngpa Hezekiate ngaolan kipa ja shonne ahngpawe yoppute Youngwanpawe hüke jannang she i,

²²hatüowa Iphei tüipu jingne Youngwanpawe ngaotampu ngao: “Wangngoipu Zion yhalawe nangte phoiwüm-e yaole nang. Jerusalem yhalalan-e nang lüowe taipute ngüm shengnang.

²³“ ‘Aote nange yaowele hüyange phoiwüm? Aophei tüi-e nange ngao ngai hüyange otapu mük-e nganlei? Israel Üjaopa phei tüi-e!

²⁴Nange nang shaoshanpalan üte yongelüowe hüolak jingne shon, hüke nangjing pongtongtoi khongkümpuwe shedaopupa Lebanon kahtang ommeyah. Tüoken me nange shedaopupa cedar hüyange shemeipupa cypress pee akke win she, hüyange shelupupa phaonyu nange yüoyangki she nang yongelüo yangki.

²⁵Nange kahheng kahtok me yengnung shao hüyange yeng ying she, hüyange numan kahta wetaipalan-e yalokpuwe Nile yengyin ea-mahtam she nang yongelüo.

²⁶“ ‘Hatüolan Taowe üshongwante muh tümme ang she nange aope-o yejaipe ngoh a? Hüyange sha-a Taowe hatüo linge tainang. Meipe latyangphei chingnyulan, heamme mahpu longkhoih ne menge tamlak wong Taowe nangte pha.

²⁷Kahtalan aoyin tüolan me nyoi wong yenang; iman nyam hüyange toiloi tai. Iman-a kahko mepu hüng kih-e yejema-a noktok me nyimpu phümha kih-e aope heongye wangyang lei iman puwe tei.

²⁸“ ‘Hüpoi, nange hanghe ling hüyange nang ümekente tai, Taowe nang jeng khongkümpu shingnang. Nange ü-phei tüi-e hangke mongshih ümeng ngai Taowe shingnang.

²⁹Tüopa mongshih ümeng ü-phei tüi-e ngaipu ngaolan hüyange nang otayangpu, Taowe tüo, hüyange sha-a taowe nang nateang lüowe yankeilei phinlak hüyange nang ju me yanha küoyange hüyange nang hanghe lamme pei tüopa memuh nang leih yene tamlak.’ ”

³⁰Tüophei me Isaiawe ahngpa Hezekiate i, “Hanghe ngailak yepinlakpa hüke ngohlak. Tening hüyange ünepupa wang nange phao me ngaipu ülick hei hahlak, hüpoi tüophei wangme peiye nange nangjing üli deipu oklak hüyange tüopa wetlak; hüyange wuwüngwu shomlak hüyange wuwünglick hahlak.

³¹Aoyin Judah me jetoha (üjeam) ngoh üya luwe kahtokte yupu pephao hüyange ülick ngaiye tampu kih-e jaalunpu ngohlak.

³²Jerusalem me hüyange Zion kahtang me jetoha ngohpu kahtalan ngohlak, hangjingne ima-a Ütahpa Youngwanpawe tüopake ngaitamlak monge teihyangki.”

³³“Tüokhei Assyrialan ahngpa jingne Youngwanpawe hanghe i hatüo ngoh nang: I tüopa chingnyute ye-onglak yejema-a tüopa te lahhan ja nehoi yekeplak. Wetaipalan aowe-o ree phei tüopa chingnyu shongte yewenlak, hüyange tüopa neikonne doyukonlaipu hango yelinglak.

³⁴Chingnyute ye-ongpe, I hanghepa lamme pei tüopa lam memuh leih yelak. Tao Youngwanpawe ngaoyangki.

³⁵Ü-min jingne hüyange ü-shaoshanpa David te Taowe janyangpu jingne, Taowe tüopa chingnyu yinlak hüyange tüopa tükke anglak.”

³⁶Hüwante Youngwanpa shongmokpa ja Assyrialan lakjingte tai hüyange wetaipalan ghoja detet me nga haja (185,000) toi. Üne nyih wangngai wante tüoken me iman khongküm liteiye ngoh!

³⁷Tüokhei Assyria ahngpa Sennacherib lan-e ye hüyange Ninevehte leihye.

³⁸Nyih ja aope I yoi kahwang Nisrochte khümjing me yoppe khümme ngoh, I ha ni, Adrammelech hei Sharezer niye iman yanglow-e Itoi hüyange Ararat kahmükte lojing yamme phette tai; I hayimlan yo mepu ja, Esarhaddon I nanleiye ahngne meng.