Read Konyak Naga ISAIA 38 Bible Online

ISAIA 38 - Konyak Naga bible

ISAIA 38

¹Tüopa nyih hipak me Ahngpa Hezekia dak hüyange pali she ngoh. Amoz üha hipa Isaia I phei ponglak jingne pei hüyange Ite i, “Youngwanpawe nangte hüke inang, nange sheminlamphe üyin shinne tümme angtüoh hangjingne nanga yemei oklak. Lilak jingne tümyah.”

²Hüwante Hezekia yoi sheta jant yekaote lüp hüyange Youngwanpate yop:

³“Youngwanpa, teih tüopha, taowe nangte mong phünne phawe hüyange iyeshepu phei shaoshan yangki, hüyange hipak phe me nange üte hanghe lingne tamhu linglak jingne ngang yangki.” Hüyange I yeonge khah-e shaplak jingne wang.

⁴Hüwante Youngwanpawe Isaiate ngaowe i,

⁵Hezekia tangte leih yetüoh hüyange Ite hüke itüoh, “Tao, Youngwanpa, numan pajeiyong David Kahwange nange yoppu jaiteki hüyange nang mükphi ngeteki; Taowe nanga üne-o wangpeng pen me nga ngohne tamlak.

⁶Taowe nang hüyange Jerusalem chingnyu Assyria ahngpa yak mepu yinlak, hüyange Taowe yelakpe chingnyuwa yinne anglak.”

⁷Isaiawe jan, “Iye janpu Iye anglak she hüolak nanjingne Youngwanpawe nangte yepinlakpa ja yahphalak.

⁸Ahngpa Ahaz-e wepu yafünlam te Youngwanpawe yashüm-a ya-kai pen leih yelak jingne linglak.” Hüyange yashüm-a ya-kai pen shinne leihye.

⁹Judah Ahngpa Hezekia I dakpu mepu meiphei me, Iye hatüo yihlupu hem nyan:

¹⁰Taowe teih, teehepu üyin hipak me taowa yimchingte tainang; ü-üyin shaaji aope-o yengohlak.

¹¹Taowe teih, hatüo üyin nyoipu kahtoknyu me taowe shaaji aope-o nishe Youngwanpa yejema-a üyin pheipu kahta ao-o yengelak.

¹²Ü-üyin-a lange win hüyange üküm ngoiye tam, Nyeenok khokke yahpu kih-e nyesüo mepu inkhek wette yahpu kih-e; Taowe teih Kahwange shaaji ü-üyin-a üküm ngoine tamyangki.

¹³Jeih dakteiye wangnyak phapan tao üngwün, yengkong mailange ü-waan phakke tampu yangma she taowe teih Kahwange ü-üyin üküm ngoiye tamnang.

¹⁴Ü-ngaowünga yenangpe hüyange longlieng pak-o kih-e wao. Hüyange taowa awshu yoongpu kih-e hüm. Wangdangte leipuwe ü-mük yoonge mah. Youngwanpa, tüolan shaoshi üshei mepu tao yinpha.

¹⁵Hüpoi taowe hanghe ilak? Youngwanpawe tüopa linge tam. Ümongjanga khah nang, hüyange tao shipu ye-ok.

¹⁶O Youngwanpa, taowa nangjing ne üyin ngohlak, nang shaha jingne ngohlak. Tao meitam pha hüyange tao üyin me ngohning.

¹⁷Ütingme tao khah-e shangyangpuwa chingmei ne menglak. Nange ü-üyin ütuh lili mepu yinne tam; Ü-ünulan khongkümpu nange üte winne tam.

¹⁸Aowe-o lipu yimching me nangte yihlupu yepha oklak; Lipuwe nang ngaotingpate ütinglak ne ye-ok.

¹⁹Aoyinne nangte yihlunang tüolan-a üyin me ngohpalan; sha-a taowe nangte yihlupu kih-e. Nanga hangshin monghümlakpa payonglan-e iman hayimlante ngaowe tamnang.

²⁰Youngwanpa, nange tao meiye tam. Toman-e kongki ümtük loklak hüyange nangte yihlupu hem loklak. Toman üyin me ngohpu mongme, nang khümjing me yihlupu hem loklak.

²¹Sha-a Isaiawe ahngpate “Phuklick phei nyütpu an yahpuwe I jing tanti te neamtüoh, hüyange I meilak,” she i.

²²Hüwante Ahngpa Hezekiawe tong, “Tao Youngwanpa khümjingte taipu oklak üja she hüolak jingne hanghe füo ngohlak shi?”