Read Konyak Naga ISAIA 39 Bible Online

ISAIA 39 - Konyak Naga bible

ISAIA 39

¹Tüopa nyih hipak me, Babilonia ahngpa, Baladan üha Merodach Baladan-e Ahngpa Hezekia dakyangki hüyange meiteki she jai, tüokhei Iye I tangte nyanpulai hüyange hünghao shon.

²Hezekiawe ngaolan kipalan mongmeiye yah hüyange imante yoijing moth, yoijing hon hei khüm, yoijing üpepelak hei üpeameipulan, hüyange hokwelak yonglah khongkümpu hüowe tam. I jing toinan ahngpu nyoi yejema-a I ahngching me Iye imante yehüotampu hango yenangpe ngoh.

³Hüwante hipa Isaia Ahngpa Hezekia tangte pei hüyange tong, “Tüolan kahta ümeken mepu pei hüyange iman-e nangte hang i ei?” Hezekiawe jan, “Iman yeonge jaipu kahmük, Babilon mepu pei.”

⁴“Ahngnok me iman-e hangheyin nge pu?” Hezekiawe jan, “Iman-e sheminlam phe ngepu üja. Toinan angpu nyoi mepu taowe imante yehüotampu hango yenangja.”

⁵Hüwante Isaiawe ahngpate i, “Ütahpa Youngwanpawe hatüo inang.

⁶Hipak ja peiküki aope nang ahngching mepu shemin lamphe numan pajeiyonglan mepu tüopa nyihte ngoiye yo angpu shemin lamphe, Babilonte kiye taimahlak. Hango towe yetüohlak, Youngwanpawe ngaoyangki.

⁷Nang mepu ütingpa nanghunangha lan-o ütam yahteilak hüyange Babilonia ahngnok me ahngpa shaoshanlak jingne moiko ne linge tamlak.”

⁸Tüote leppuwa I hipak pama-a chingmei hüyange ütuh yenangpe ngohlak yang she ahngpa Hezekiawe shinge pei; tüokhei Iye Isaiate hüke jan, “Nange üte phapu Youngwanpa mepu ngaolan-a meinangki.”