Read Konyak Naga ISAIA 40 Bible Online

ISAIA 40 - Konyak Naga bible

ISAIA 40

¹“Toloimei tüoh, toloimeitam tüoh Ü-kahtalan,” she numan Kahwange inang.

²“Jerusalem kahtalante henge tamtüoh. Iman hipak nangjange laowe shangyangki she imante itüoh, hüyange sha-a iman ünulan-a wintamteki. Iman ünu khongkümpu jingne Taowe khakwange shangne tamyangki.”

³Ngaowüng jawe üngwün nang, “Wanwüng jeng me Youngwanpa jingne lamnyu tümtüoh! Pheih kahtok me teman Kahwang jingne lam tingkhakke lingtüoh!

⁴Kahjee lili maatamtüoh; kahtang lili shienne tamtüoh. Kahmüoh-a üjee ne menglak, Hüyange hungepookpu kahmük-a nyeleh linglak.

⁵Hüwante Youngwanpa müktishiwa ütahte ngailak, hüyange kahtanyuha üsheiye tüopa ngelak. Youngwanpa Iye tüopa janyangki.”

⁶Ngaowüng jawe üngwün nang, “Ngaolan pongtüoh!” Taowe tong, “Hanghe ngaolan taowe ponglak?” “Kahtanyuha üshei hüng kih-e, iman phao jupenglan shinne nehoi laowe yengoh ok she pongtüoh.

⁷Hüng kuinang hüyange jupenglan hase mahnang; aope Youngwanpawe wangyang shonne iman tangme leiyapeih; Kahtalan hüng phei nyeiye hango yenang.

⁸Üting, hüng kuinang hüyange jupenglan hase mahnang, hüpoi teman Kahwang ngao jinte ngohnang.”

⁹Jerusalem, kahtang shedaopute ongtüoh hüyange ngaolan ümei pongtüoh! Üngwünpu phei nyik-e tamtüoh, Zion; ngaolan ümei shingne tamtüoh! Ngao ngaitüoh hüyange tahnyam. Judah chingnyulante iman Kahwang peiküki she i tamtüoh!

¹⁰Okkeshangpu Youngwanpa-a ünganwong phei wanglam lamlak jingne peinang; Iye yinne tampu kahtalan I phei jamme yah peinang;

¹¹Iye yoijing nyee ükhonga nyeeyompa kih-e paowetüklak; Iye nyeehalan jamshe woijemlak hüyange iman-a yoi phaktang me pailak; Iye iman ünyulan-a jünge woilak.

¹²Ütamjawe yengchinga yakpha mongme, yejema-a wangdanga I yak me tokke leipu oklak a? Ütamjawe kahtoknyu kah ü-oun-a wan ja me yejema-a kahmüoh kahtanglan toklak me tokpu oklak a?

¹³Ütamjawe Youngwanpawe hanghe linglak, ipu oklak a? Aowe Ite nyüowe tamlak yejema-a Ite hengpu phalak?

¹⁴Shinge yahlak jingne hüyange üpong tüolak jingne hüyange toishaowa hangke linglak iman-e yahlak jingne Kahwange ao phei teitongpu?

¹⁵Youngwanpate jatlan-a hangne-o yeje, yeng ü-oun ja shehpu shinne nehoi yeje; dikhotlan-a kahmak tanpu shinne tan.

¹⁶Lebanon phao mepu yinmoklan khongkümpuwa teman Kahwangte toidopu phalak jingne yewang, hüyange tüopa mepu peelan khongkümpu hanne jakyapoi yewanglak.

¹⁷Jatlan khongkümpuwa I jingne hangne-o yemeng; iman-a Iye hang wongpongo üje she hüyange üshei phei sheshoipu she itnang.

¹⁸Ao phei hüma-a Kahwang-a phinlak? I-a hanghe le-nangja she numan-e hangke khoih ilak?

¹⁹I-a yak ai jonpawe lingpu peshao kih-e yele, yan ai jonpawe honne lümyange hüyange yajenth ne khümme lingpu kih yeje.

²⁰Hon hei khümme lingpu üshak okpu kahtalan-e makke yetailak pee phei lingpu le nang. Iye toiye yetape ange oklak mieng linge okpu okkeshangpu pa ai jonpa tüonang.

²¹Numan-e yeshingpu a? Numan-e yejaipu a? Ükong wangwante muh numante yengaotam a? Kahtok linge wangwante muh numan-e yeshinga?

²²Hatüowa aowe kahtok ütang me hüyange wang kaiye taiye ahngpa shotjing me shot Iye ling. Üphang me ngohpu kahtalante tewo shinne shoiye lei. Iye wanga jhotnye nopu kih-e hüyange nyenok hanghe phangme ngohlak, tüo kih-e no.

²³Iye wongnangpu wanglam lampalan shuwe yeinang, hüyange iman hangne-o yemengpe mahtam nang.

²⁴Iman-a üphao ükhoih lan kih-e, sha-a meimei shom hüyange üya manyu ok. Aope Youngwanpawe wangyang shon, iman wanne mah hüyange tahjan kih-e puwe tei.

²⁵Aophei numan-e Tao phinlak? Yejema-a ü-phei jakihpu-a ao? she Üjaopawe inang.

²⁶Wangyete leitüoh! Numan-e ngepu shanhalan aowe linge ngaipu? Aowe iman-a nyahponglan kih-e woitei, iman hangshin ngoh Iye shingnang; hüyange ja ja heiye min me nyiknang! I ünganwong jamloi yongnang, iman ja nehoi aope-o yemah!

²⁷O Jacob, hüyange O Israel, hüma-a hangne numan-e Youngwanpawe numan shangshih yeshing ja she yejema-a ütingpa ye-ipu me numan shangwante yeleija she ngao ngaipu?

²⁸Numan-e yeshing a? Numan-e yejai a? Youngwanpa-a üküm yenangpu Kahwang; Iye kahtoknyu khongkümpu lingengai. I aope-o yetoyenyai yejema-a nyaikhaiye yengoh. Iye teihpu aowe-o shinge ye-ok.

²⁹Aoyin wong yenang hüyange towenyai Iye wongnangne tamnang.

³⁰Aoyin tangshim ne ngohnang iman nehoi wong yenanglak; shelalan nyaimah teiye toitalak.

³¹Hüpoi aoyinne jamphalak yamme Youngwanpate ütinglak iman-e wong üla tüolak. Iman awlan kih-e yangteng phei yonglak; iman phetlak hüyange nyaikhaipu yengohlak, iman kemlak hüyange wong yenangpe yengohlak.