Read Konyak Naga ISAIA 41 Bible Online

ISAIA 41 - Konyak Naga bible

ISAIA 41

¹Ü-sheshao me jünge ngohtüoh, numan O dikhot kahtalan. Kahtalan-e iman wong üla ne tüone tamtüoh! Iman tümme yonge hüyange ngao ne tamtüoh; Ghonyoi me teman jamshe jemhah.

²“Heong yemepu chinghah-e yah-e peipu hüyange ümeken yete I tai Ite okpu ngene tampuwa ao? Ahngpalan hüyange jatlan tangme okpu ngelak Ite aowe phapu? Iman-a kahmak ja leye Ijing yanglow-e iman khoih-e tainang. Wangyang sheshao mepu tahjan kih-e iman sheshao me I jing lahhanlan yeinang.

³Iye jange woinang hüyange yemahpe kemnang, jamloi phetpuwe kahtokte nehoi pa shah she phet!

⁴Hatüo hüke linge ngaitampuwa ao shi? Ao pungao anglak jengme teih tüopu shi? Tao, Youngwanpa, üwangne muh tüoken me ngoh, hüyange Tao, Youngwanpa, ükümne-o tüoken me ngohlak.”

⁵Dikhot kahmüklan me ngohpu kahtalan Taowe hanghe ling ngeyangki; iman nyampu phei nyamme ninnang. Tüokhei iman khongküm jem hüyange peinang.

⁶Iman moilan-e yoi yupipate jam; hüyange moilan-e yoi jeiheinaote i, “wongnang yah!”

⁷Pee ai jonpawe yantep pate i, “Meiye lingteki!” Ao kahtawe peshao shitte phowe ling, yanlag-e takke khappe khange lingpate hengpu pha. Iman-e i, “Phaktang ngaipuwa meinangki”, hüyange iman-e peshao-a yanlag-e takke mongetam.

⁸Hüpoi nang, O Israel ü-shaoshanpa Jacob, nanga Taowe leyangpu kahta ü-shümpa Abraham huhayimlan ngoh nang.

⁹Taowe nang kahtoknyu üküm yemepu yahpei; Taowe nang shejaipu ünuk mepu nyik, hüyange nangte i, “Nanga ü-shaoshanpa” Taowe nang yewintüoh, hüpoi nang leyangki.

¹⁰Nyamme tahngoh, Tao nang phei ngohnang! Taowa nang Kahwang, hanghe-o nang nyamne tahtam! Taowe nang wongnang ne tamlak hüyange nangte jamlak; Taowe nang jongwanne anglak hüyange nang yintam lak;

¹¹Leihuyah, aoyin nang phei tüi mongshih ngainang, ye-ok teiye wüotüopu ngelak. Aoyinne nang phei hoknang iman hangne-o üjelak hüyange mahlak.

¹²Nange nangtepu wepalan jingne yamleiyapoi, nange iman yetüolak. Aoyinne nang phei tüi-e hoknang hangne-o üjepe mahlak.

¹³Taowa nang Kahwang hüyange Youngwanpa; Taowe nang yakjah yeme jon hüyange i, “Nyamme tahngoh; Taowe nangte paolak.”

¹⁴Nyam tahteih, O Jacob yongyat, O Israel üjoiha; hangjingne taowe nangte jamlak, Taowa nang yintampa, Israel üjaopa she Youngwanpawe inang.

¹⁵Leihuyah, Taowe nanga ünah pheipu üfa üla nyimyang phei tahnoijing longkhao kih-e linge tamlak. Nange kahtanglan noilak hüyange iman menge tamlak; kahmüohlan-a kahmak ne khoih mahlak.

¹⁶Nange iman-a wangte toonlak; wangyange iman-a puwe teilak; hüyange iman-a waishihwangkhah-e shaiye tamlak. Hüwante nang mongmeilak, hangjingne Taowa nang Kahwang; nange Israel üjao Kahwang, üte yihlupu phalak.

¹⁷“Aope ü-kahtalan-e iman wongpong me yeng yamlakei, aope iman üngsa yengleye ea-mahlakei, hüwante Tao, Youngwanpawe iman-e yoppute janlak; Tao, Israel Kahwange aope-o iman winne yetüohlak.

¹⁸Taowe kahmüoh ükenglan me yengyin yünne tamlak, hüyange yengpeiwo üngang kahjee me yünne ngaine tamlak. Taowe wanwüng jeng-a yengpheipu yengnunglan ne, hüyange kahwan kahtok-a yengpeiwo ngaijing ne linge tamlak.

¹⁹Taowe wanwüng jengme cedar, hei acacia hüyange myrtle hei olive peelan jongne tamlak. Kahtok üko me phao ngailak, yankhek pee hei juniper hüyange cypress phao ngailak.

²⁰Kahtalan-e tüopa ngelak hüyange Tao, Youngwanpawe tüopa lingyangki she shinglak. Israel Üjao Kahwange tüopa ngailak jingne linge tam she iman-e shinge peilak.”

²¹“Numan jeng ngaolak tümtüoh she Youngwanpawe inang; numan-e teilalak tümtüoh, she Jacob Kahwange inang.

²²Tüome peikei hüyange hanghe ngailak it-tehu, hümme nakshih tüopa aope ngailakei toman-e shinglak. Ghonyoi me lintepu hipak me ngaipu khoih-e itüoh, hüyange tüolan-a hanghete leppu tomante ipha.

²³Ngoikülak hipak me hanghe ngailak ngohnangki tomante itüoh, hümme nakshih toman-e numan-a kahwanglan she shinglak! Meipu ülam ja lingtüoh yejema-a limahpu ütam peitam tüoh; nyamme winpuwe toman maatam pha!

²⁴Hüpoi numan hüyange numan-e lingpu khongkümpuwa hangne-o yeje; aoyinne numante yoppekhüm iman-a nulakpa!”

²⁵“Heongye me ao nyoi kahta ja Taowe leyangki; apyekao mepu I chinghahlak jingne Taowe yahpeilak. Iman-a shamnyüt pu kih-e wanglam lampalan Iye nyüt tamlak, tük yaopawe kümp toiloipu kih-e tamlak.

²⁶Hatüo ngaikülak üja she numan-e hangheyin itpu phalak, hüwante toman-e numan-a ütingyang she ilak! Tüopa jeng numan sheja nehoi yengao; aowe-o numan-e ipu ngao ja nehoi yejai!

²⁷Zionte üwangne ngaolan ipa, Tao, Youngwanpa; Taowe Jerusalemte ngaolan kipa hüke ine shon; ‘Nang kahtalan peiküki! Iman nokte yeküki!’

²⁸Hüpoi aope Taowe kahwanglan yo me lei, iman yo me aowe-o ngao ilak yenang; Taowe tongpute sheja nehoi yejan.

²⁹Tüolan kahwanglan khongküm jajang ja; iman-e linge oklak hango yenang, peshao tüolanme wong yenang hüyange hango ye-oklak.”