Read Konyak Naga ISAIA 42 Bible Online

ISAIA 42 - Konyak Naga bible

ISAIA 42

¹“Hatüome ü-shaoshanpa ngohnang, ao Taowe wongnangne tam, ao Taowe le, ao phei Taowe monghah nang. Taowe Ite ü-yahawe maatam nang, hüyange Iye jatlan üsheite ütingpa yahpei lak.

²Iye üng yewünlak yejema-a I ngao ngaine yetamlak, yejema-a chingyang me ngaoyong ngaone yetamlak.

³Iye khuhtawe ngohpu ngeihyan ja nehoi yephak lak; yejema-a phihmah phihmah she ngohpu vüntük meine yetamlak. Iye moilante üküm yenangpu ütingpa ngaophünpu yah peilak.

⁴Iye monghümpu hüyange hoonglipu yemahlak Iye kahtoknyu me ngaotingpa linglak. Kahmük üjai me ngohpalan-e Iye nyüopute lahnyike jailak.”

⁵Kahwang Youngwanpawe hanghe i hatüo- I aowe wangdanglan lingengai hüyange iman lannetam; Iye kahtoknyu üyin shinne hüyange tüome ngohpu üyinlan ling; Iye tüopa mepu kahta lilite üyin hüyange lüo pha.

⁶“Tao, Youngwanpawe kahtoknyu me ngaotingpa-a lingyashi leilak jingne nangte nyik hüyange nangte ünganwong phayangki. Nang kaiye Taowe kahta lili phei jiengjeppu linglak; nang kaiye taowe jatlan tangte wangngai yahpeilak.

⁷Mükmüopalan mük eppe tamlak, hüyange aoyin wangnyak küpnok me shotte ngohnang lantamlak.”

⁸“Nang Kahwang Youngwanpa-a Tao Ü-shaha ngoh nang. Ülao kahwang aowe-o ü-müktishiwa phei jamne ye-ok; Üte yihlupu hem lokpu Taowe peshaolante phane yetamlak.

⁹Taowe itte angpu toishaolan sha-a üting me peinang. Sha-a Taowe numante toishao ülapa jeng iman ngaine man-o-wante muh iphalak.”

¹⁰Youngwanpate hem üla ja loktüoh; Ite yihlupu hem loktüoh, kahtoknyu üshuk ngoiye! Yengching me yatte kempalan numan, Ite yihlu tüoh; yengching me ngohpu mokh-halan, Ite yihlu tüoh! Kahmük üjai me hüyange tüome nyoipalan üshei, hemlok tüoh!

¹¹Wanwüng jeng me nyoipalan hüyange tüopa jila mepu lan-e Kahwangte yihlu tüoh; Kedar kahtalan-e Ite yihlu ne tamtüoh! Sela chingnyu me aoyin ngoh iman-e mongmei puwe kahtang shedaopu mepu üngwün tüoh!

¹²Aoyin kahmük üjai me nyoi iman-e Youngwanpate müktishiwa hüyange yihlupu phatüoh!

¹³Naomeipa kih-e hoklak jingne Youngwanpa tainang; I tümteki hüyange shapju jingne lahnyik nang. Iye shapnyik nang, shapju üngwün nang; Iye yoi wepalan te yoi üngan wong hüonang.

¹⁴“Hipak laolünge Tao jünge ngoh yangki; Taowe ü-kahtalante yejan. Hüpoi sha-a toi linglak hipak peiteki; sheko moipai wantepu kih-e Taowe üngwün nang.

¹⁵Taowe kahmüoh kahtang menge tamlak hüyange phümha hüyange phao wantam lak. Yengyin kahjeelan Taowe pheih kahtok ne linge tamlak hüyange yengnunglan mepu yeng jüpmah ne tamlak.

¹⁶Taowe ü-kahta mükmüopalan iman aope-o mankempu lamnyu me woilak. Taowe iman wangnyak-a wangngai ne lingtamlak, hüyange iman sheshao me üyin yeshinpu kahmük-a nyeleh linge tamlak, Tüolan-a Taowe janyangpulan, hüyange Taowe imante yeshaipe phalak.

¹⁷Aoyinne peshaolante ütinglak, aoyinne mienglante iman kahwanglan she nyik, khongkümpu lüpyene tamlak hüyange wüotüo tamlak.”

¹⁸“Jaitüoh, numan napanpu kahtalan! Owe leitüoh, numan mükmüopalan!

¹⁹Aohe mükmüo, hüpoi ü-shaoshanpa, hüyange taowe shonpu ü-shongshonpa kih-e napan? Üte phünphapupa kihpu aohe mükmüo yejema-a Youngwanpa shaoshanpa kih-e mükmüopu aohe ngohnangki?

²⁰Nange ülam maawe nge, hüpoi hatüowe nangte hanghe ne mengpu? Tüophei jailak jingne nang me na ngohnang, hüpoi nange ütingpa me hanghe jaipu?”

²¹Youngwanpa-a Kahwang aowe khakshupupa jingne lahnyik; tüokhei Iye yoi ngaokhüm hüyange nyüopu nowe in hüyange Iye yoi kahtalan-e tüopate yihnoonne tamhu nang.

²²Hüpoi sha-a I kahtalan-a nyieyah ne tamteki; iman-a kahmong küpnok me hüyange küpnok me lo ne tam. “Iman yinne ao-o yepeilak ne iman-a kuhleih ne hüyange nyieyah ne tam!”

²³Hüma-a numan yomepu ütam-e tüopate jailak a? Sha-a me peiye numan-e kentingpu phei jaining ya?

²⁴Aowe Jacob-a kuhleih-e, hüyange Israel nyieyahpute ngoiye phapu? Hatüowa Youngwanpa Iye muh, ao phei tüi-e teman-e ünu om! Iye ngohne tamhupu kih-e teman yengoh yejema-a Iye temante nyüopu phapu ngao üya.

²⁵Tüokhei I mongshih ngaipu teman-e shinge minpeitene ling hüyange yakphei lükpu wehok phei shaoshi. Vün kih-e I mongshih ngaipuwe Israel nopute hahtam; hüpoi hanghe ngaiyapeih teman-e aope-o yeshing; tüopa mepu teman-e hango shinge yeyah.