Read Konyak Naga ISAIA 43 Bible Online

ISAIA 43 - Konyak Naga bible

ISAIA 43

¹Hüpoi O Jacob, Youngwanpa aowe nang linge ngaiyangki, aoheye nang ükongwang O Israel inang, “Nyam-e tahteih, Taowe nang yinlak. Taowe nangte min me nyik-e nyik, nanga üjing.

²Aope nang yeng ülu kaiye tailakei, Tao nang phei ngohlak; hüyange aope nang yengyinlan kaiye tailakei, nang phonge yeteilak. Aope nang vün kaiye tailakei, nanga vünne yehahlak; vünloonge nang yeshutamlak.

³Hangjingne taowa nang Kahwang Youngwanpa, Israel üjao Kahwang, aowe nang yinne tam. Nang lantamlak jingne Taowe Egypt tüohlak; Taowe Ethiopia hei Seba tüohlak.

⁴Nang üyin yinlak nanjingne Taowe jatlan nopu tüohlak, hangjingne nanga üjingne toinyu hüyange Taowe nangte ken hüyange nange yihnoonpu pha.”

⁵Nyam-e tahteih, tao nang phei ngoh nang! “Heongye kahmük üjai mepu hüyange henyipye üjai mepu, taowe numan kahta nokte yah yelak.

⁶Iman taine tamtüoh she Taowe apyekaote ilak, hüyange iman tükke yeyelak jingne heyete Taowe ilak. Ü-kahtalan kahmük üjailan mepu leih yene tamtüoh, kahtoknyu üshei yekao mepu!

⁷Aowe ü-min me nyik moilan, Taowe aohe ü-müktishiwalak jingne lingengai, Taowe aohe ükongwang hüyange ling.”

⁸Kahwange i, “Ghonyoi me jemkei she ü-kahtalan nyiktüoh. Iman me mük ngohnang, hüpoi iman mük müonang; iman me na ngohnang, hüpoi iman napan nang!

⁹Jatlan khongkümpu jamshe shüpjemne tamtüoh. Iman kahwanglan yo me aowe ngoikülak juwan itlak? Iman yo me aowe sha-a hanghe ngai ipu oklak? Tüolan kahwanglan-e iman-a üting she iman saki ne menge iman ngaowa ütingpa she hüowe tamlak jingne peitam tüoh.”

¹⁰“Youngwanpawe inang, numan ü-sakilan; Ü-shaoshanpa ne mengne Taowe numan le, tüo kaiye numan-e Tao shinglak hüyange üte ütinglak lak hüyange ü-shaha Kahwang she shinge yahlak. Ü-tokte ülao kahwang ao-o yenang; aope-o mannang hüyange aope-o yengohlak.”

¹¹“Tao jashing Youngwanpa, ü-tokte numan yinlakpa ao-o yenang.

¹²Hanghe ngailak Taowe itpu pha, hüyange tüophei me numante jamne Tao pei. Kahheng kahwang aowe-o aope-o tüopa ke yeling; numan-a ü-sakipalan.

¹³Taowa Kahwang hüyange jinte hüke ngohlak. Ü-ünganwong mepu aowe-o yinpu ye-oklak; Taowe hanghe lingyangki, aowe-o jeileine ye-oklak.”

¹⁴Israel üjao Kahwang, Youngwanpa aowe numan yintam nang, inang, “Numan yinlak jingne, Taowe Babilon phei tüi-e nyahponglan shonlak. Chingnyu petenlan Taowe menge tamlak, hüyange I kahtalan üngwünpuwa shappu ne menge tamlak.

¹⁵Taowa numan üjao Kahwang Youngwanpa. Taowe nang Israel lingengai; hüyange Taowa numan Ahngpa.”

¹⁶Youngwanpawe inang, aowe üshong wante muh yengching kaiye lamnyu ling, wongnangpu yeng kaiye lam ja lin,

¹⁷aowe wongnangpu nyahponglan mahpute woi, koiponglan hüyange pongtongtoilan pheipu nyahponglan. Aowe-o lüowe ye-oklakne, üphangpa me iman lammeta, pahwangpu vün meipu kih-e!

¹⁸Hüpoi “Lintepu me ngaiyangpu tahteih yejema-a üshongwante hanghe ngaiyangki mong tahpha.

¹⁹Taowe lingkülak toishao üla ja te leitüoh. Hatüowa ngaiye lantepu, numan-e Tüopa-a sha-a ngelak! Taowe wanwüngjeng kaiye lamnyu linglak, hüyange tüoken me numante yengyin ngaiye yeng phalak.

²⁰Phao yinmoklan nehoi üte yihnoonlak; aope Taowe lepu ü-kahtalante yeng phalak jingne, wanwüng jengme Taowe yengyin yünne tamlakei, hiyan hüyange yengmom awnyulan-e üte yihlupu phalak.

²¹Taowe ü-jingne lingngaipu-a tüolan kahta, hüyange iman-e üte yihlupu hem loklak!”

²²Tüoyangpoi nange Üte yenyik, O Jacob; hüpoi nange Üte eange mah, O Israel!

²³Nange üte jakke dopu nyee yah yepei; nange toidowe üte yihnoonpu yepha. Nangte toidopu yuwe Taowe nangte hangki yih yetam yejema-a sünyet jakke lingpha she mongshangne yetam.

²⁴Nange ü-jingne üpeameipulan yepeitam, yejema-a nangjing yinmoklan üyaowe ümong hahne yetam. Tüonanleiye nange nang ünulan kaiye üte hangki yihtam? Nange püohpinne ompuwe üte mongshang ne tam.

²⁵“Tüoyangpoi, aowe nang ünulan wintam nang Kahwangpa Tao, hüyange Tao ao, tüokhei Taowe tüopa lingnang. Hüyange Taowe nang ünulan yeteih tüolak.”

²⁶“Nange ümengne teihpulan yah peikei, ghonyoite teman taihah! Nang tingkhakke ngoh nangki she iye oklak nang ngao yahkei!

²⁷Nangjing üwangye pajeiyonge ünu om, numan woipalan-e ü-phei tüi-e ünu ling.

²⁸Tüokhei Ü-üjao nyoi yejao yeshape linge tam. Tüokhei Taowe Israel tangme mahtamlakpa yahpeinang; Taowe ü-yoi kahtalante tien-e tamlak.”