Read Konyak Naga ISAIA 44 Bible Online

ISAIA 44 - Konyak Naga bible

ISAIA 44

¹“Hüpoi Israel, ü-shaoshanpa, Taowe lepu kahtalan, Jacob huhayimlan, sha-a jaitüoh.

²Tao Youngwanpa aowe nang lingengai; nang puhpu hipak memuh, Taowe nangte paoyangki. Nyamme tahteih, O Jacob ü-shaoshanpa; Jeshurun ao taowe le.

³Hangjingne yenglepu kahmükte Taowe yeng phalak hüyange kahwan kahtok me yengyin ngaine tamlak. Taowe ü-ünganwong numan hayimlan tangme hüyange ü-mepu moiman numan huyimlan tangme shoktam lak.

⁴Iman wangmanne yeng shokke tampu hüng kih-e, yünne ngohpu yengnah mepu aophang phangshit kih-e wongnange jonglak.”

⁵“Japhei me ja she kahtalan-e ilak, ‘Taowa Youngwanpa jing.’ Iman Israel kahtalan phei omlak jingne peilak. Moilan-e yoi yoi phaktang me Youngwanpa min nyanlak hüyange yoi nying nyingke Kahwang kahtalan yo me ja she nyiklak.”

⁶Youngwanpa aowe Israelte, wanglam lam hüyange tükke-ang, Ütahpa Youngwanpawe hatüo ilak ngohnang: “Tao üwangpa, hüyange ükümpa Kahwang; Ü-tokte kaiye ülao Kahwang ao-o yenang.

⁷Aohepa tao lepu me ngoh? Iye tüopa pongtam tüoh, Iye hatüo shingne tamtüoh hüyange ü-sheshao me angtamtüoh. Üshongwante muh ngoikülak jeng aoheye shingne tam? Üne-o hanghe ne mengkülakeih imante ngaone tamtüoh.

⁸Nyamme tahngoh, ü-kahtalan! Numan-e shingnang üshongwantepu mepu sha-ate ngoiye tüolan khongkümpu ngailak Taowe itte tam, numan-a ü-sakilan ngohnang. Ülao kahwang üne-o ngohnangkü a? Yeje, ülao longnyu ao-o yenang; Taowe ja nehoi yeshing.”

⁹Aoyinne peshao lingnang iman khongkümpuwa angsa, hüyange iman-e teshinne pheeiwanpu kahwanglan-a jajang japu. Aoyinne tüolan kahwang-lante yoppekhüm iman-a mükmüo hüyange üpong yetüopulan hüyange iman-a mongmenglak.

¹⁰Aohe-e Kahwang ja leye khümlak jingne yanmeng lingngai yemei!

¹¹Aoyinne tüopate yoppekhüm moilan khai ne tamlak. Kahtalan aoyinne peshao lingnang iman-a kahtanyuha hüyange iman me hang ünyei-o yenang. Iman peine tamtüoh hüyange ngaophünne tamtüoh; iman nyamme ninlak hüyange mongmengpuwe shaoshilak.

¹²Yanteppawe yansho ja yahnang hüyange vün me jak yange tüopa phei toi lingnang. I wongnangpu yakke yansho linge ngailak jingne yanmee-e met nang. Iye hüke toi lingwante, I seanyao nang, yengle nang, hüyange towe nyainang.

¹³Pee ai jonpawe peshüm ja sheam-e yah nang. Nyanlak ja phei Iye sheam-e ümee hüowe lingnang, tüopa-a yoi nyit-ha hei, yang phei yaowe lingnang, hüyange tüopa-a wangngoipu shemeiyaomapu kahta ja lepu me, yoi noksa me anglak jingne lingnang.

¹⁴Tüopa ne linglak jingne Iye cedar yejema-a longkhampee, yejema-a phao mepu cypress pee akke yahne ok. Yejema-a Iye shaopanpe deiyange, waikeiye tüopa jongne tamlak jingne tanne ok.

¹⁵Kahta jawe pee ja mepu tammeshonge jaklak hanne hüyange tamme shonge peshao linglak jingne jonnang. Ükao jawe I vünlüm meilak jingne hüyange an linglak jingne jaknang. Hüyange ükao jawe Iye tüopa phei kahyak ne lingnang hüyange tüopate khümnang.

¹⁶Tüopa han ütam phei Iye vün jaknang; Iye mei yangnang, tüopa hahnang, hüyange mongme hunang. Iye yoi nying nyingke vünlüm mei yange inang, “Hangshin sheam hüyange meipu! Hangshin meipu vün!”

¹⁷Tüopa pheipu han ütam Iye peshao ne ling, hüyange I khuhta hüyange tüopate yoppe khümnang. Tüopate Iye yopyange hüke inang, “Nanga ü-Kahwang, tao yinpha!”

¹⁸Tüokihpu kahtalan-a iman-e hanghe ling tüopa shinglak jingne jamloi ngayounpalan ne mengnang. Iman-e ütingpate iman mük hüyange iman kenmong ye-eptam.

¹⁹Peshao lingpa me hüke ilak juteih mongjang yenang, “Han ütam taowe jakyangki. Tüopa vün üshem me taowe an ling hüyange mei yang hüyange tüopa hah. Hüyange towe ngohpu han phei taowe peshao ling. Hatüome taowe peshao ja te ümme khümnang!”

²⁰I-a kahmak hah-e uhying nang. I yoi üngapa juteih-e jamloi woiyange I-a ümei ne menglak lanshe man-o. I yak me jonyange ngohpu peshao-a kahwangne yeje she I yoi nying nyingke teih-e ye ok.

²¹Youngwanpawe inang, “O Jacob hüyange Israel, tüopa teihtüoyah; teih tüoya nanga ü-shaoshanpa. Taowe nanga ü-shaoshanpa ne linge ngaiyangki, O Israel; Hüyange Taowe nang aope-o yepelak.

²²Nang ünulan-a wangphom hüyange yimphom kih-e Taowe moiye teiyangki. Ü-tangte leih yekei, aowe nang yinne tam hatüowa Tao ngohnang.”

²³Üngwüntüoh, mongonge numan wangdanglan! Hangjingne Youngwanpawe tüopa ling; Üngwüntüoh, kahtoknyu ümonglan! Üngwüntüoh mongonge, kahtanglan, hüyange phümyak weangyong liliye! Hangjingne yoi kahta Jacob yinne tampuwe Youngwanpawe yoi kheyongpu hüoteki.

²⁴“Taowa Youngwanpa, nang yinyepa; aowe nang linge ngai tüopa-a Tao ngohnang, she Youngwanpawe inang: Taowa Youngwanpa, khongkümpu linge ngaipa. Ü-shahawe wangdanglan lanne tam; aope Taowe kahtoknyu ling, aowe-o üte yejam.

²⁵Yaknyan leipalan Taowe üngapa ne linge tam, hüyange shanha-itpalan-e itpu angsa ne mengetam. Üdeipalan ngao Taowe lannetam hüyange iman konjong ngayounpa ngao she hüo.

²⁶Hüpoi aope ü-shaoshanpawe itpu phalakei, aope Taowe tümpu ütahte ngaitamlak jingne shongshonpa ja Taowe shonyapeih, Taowe tüolan tümpu hüyange itpulan ütingme peine tam. Taowe Jerusalemte i, tüoken me kahtalan üne-o nyoilak; hüyange Judah chingnyulan iman-e linge yelak, tüolan chingnyu heamtepu mepu yonglak.

²⁷Aowe shelupupa yengte i, ‘Jüpmahtüoh, nang me ngohpu yengyinlan taowe jüptamlak.’”

²⁸Aowe Cyrus jeng i, “I-a ü-nyeeyompa, hüyange taowe lingne teihpu khongküm Iye linglak.” Hüyange Iye Jerusalem jeng me hüke i, “Tüopa-a linge yelak,” hüyange “Khümjing linglak.”