Read Konyak Naga ISAIA 45 Bible Online

ISAIA 45 - Konyak Naga bible

ISAIA 45

¹Youngwanpawe yoi-e lepupa Cyrus te inang! Jatlan ching hahlak jingne Iye I letam; ahngpalan iman mepu wong khokke tamlak jingne Iye I shon; Youngwanpawe I jingne chingnyulan peten eppe tamlak, hüyange petenlan yeküppe ngohlak.

²“Taowe ü-nying nyingke kahmüoh kahtang shinsheih-e nang jingne lam tümlak. Taowe shakphan yan petenlan menglak hüyange iman yan wenaolan pünne winlak.

³Taowe nangte wangnyak nyoime lowe angpu shengngin phalak; hüwante nange Taowa Youngwanpa she, hüyange Israel Kahwange nangte min toonne nyik she shinglak.

⁴Taowe nanga ü-shaoshanpa Jacob hei Israel, Taowe lepu kahtalante jamlak jingne lenang. Nange Tao yeshing yapoi, Taowe nangte yihnoonpu üyong phayangki.

⁵Taowa Youngwanpa, Ü-tokte ülao Kahwang ao-o yenang. Nange Tao yeshingyapoi, nange wongpongne mengpu wong Taowe nangte phalak.

⁶Taowe hatüo lingnang hümme nakshih kahtoknyu jaye ükümye mepu jaye ükümye ngoiye moilan-e Taowa Youngwanpa she, hüyange ülao Kahwang ao-o yenang she shinglak.

⁷Taowe wangnyak hei wangngai moini ling; Taowe moiman hei mahshupu moini yahpei. Tao, Youngwanpawe tüolan khongkümpu ling.

⁸“Taowe waikeipu kih-e wang mepu okpupa shonlak, kahtoknyuwe tüopa yahlak jingne eplak; hüyange lantampu hüyange ngaotingpa phei üpeng kih-e penglak. Tao, Youngwanpawe, tüopa ngaitamlak jingne linglak.”

⁹“Nang linge ngaipa phei teelapu nang jingne onyukei, kümptükjawe muh, tüopa kümptük yaopa phei mongyonge tokteiye oklak a? Küm oun jawe tükyaopate Iye hang lingpu she tonglak a? Küm tükke I yaopa me wong yenang ja she ngao ngailak a?

¹⁰Aohepawe yoipate, ‘Nanga hang yuyaipu?’ Yejema-a yoinyute, ‘Hangheye nang naopaine shaoshipu?’ she ilakeih, I onyukei!”

¹¹Youngwanpa, Israel üjao Kahwang, aowe ngoikülak linge tan, Iye inang: “Ü-hayimlan jingne nange üte ngao tonglak, yejema-a Taowe hanghe linglak wongpong üte ilak wongpong ne yeje!

¹²Kahtoknyu aowe ling hatüowa Tao ngohnang, hüyange tüopa me nyoilak jingne kahtanyuha lingengai. Ü-ünganwong kaiye Taowe wangdanglan lanne tam; Taowe wanghe, linnyu, hüyange shanhalan woinang.

¹³Taowe Cyrus khakshupu me ngai ne tamyangki, hüyange I kempu lamnyu lili Taowe wongnangne tamlak. Iye ü-chingnyu, Jerusalem linge yelak, hüyange phoweteiye angpu ü-kahtalan lanne tamlak. Tüopa linglak jingne aowe-o I-a nan yepheng yejema-a yakjai yepha.” Ütahpa Youngwanpawe ngaoyangki.

¹⁴Youngwanpawe Israelte inang: “Egypt hüyange Ethiopia moth-a nang jingne menglak, hüyange jindaopu Sabea kahtalan-a nang jing rhalan ne menglak; iman nang pheite yan langyange woilak. Iman-e nangte khuhtawe hüyange ümeng janne ilak; ‘Kahwang-a nang phei ngohnang, I ja shing Kahwang, ülao Kahwang ao-o yenang.’

¹⁵Israel Kahwang; aowe yoi kahtalan yin, I-a Kahwang aowe yoi nying nyingke lowe ang.

¹⁶Aoyinne peshao lingnang khongkümpu wüotüolak; iman khongküm loishe mongmeng lak.

¹⁷Hüpoi Israel-a Youngwanpawe yinnang; hüyange yhawe okpu ngepuwa jin jinte ngohlak. Yha kahtalan aope-o mongmengpu yengohlak.”

¹⁸Youngwanpawe wangdanglan lingengai, ao Kahwangne ngoh hatüowa I ngoh nang! Iye kahtoknyu yaowe hüyange linge ngai, Iye hatüowa wongnange hüyange jinjintepu jingne ling. Iye hatüowa hango yenangpu jajang japu nyoine yeling, hüpoi kahtalan nyoilak nyoijing ja ne ling. Hatüowa I aowe hüke i, “Taowa Youngwanpa, hüyange ülao Kahwang ao-o yenang.

¹⁹Taowe lowe ngaopune yeje, yejema-a ü-juteih lowe angpune yeje. Taowe Israel kahtalante hango yenangpu jajang japu me Tao yamne tamlak wongpong ne yeje. Taowa Youngwanpa, hüyange Taowe ütingpa ngaonang; hanghe ütingpa Taowe shingne tamnang.”

²⁰Youngwanpawe inang, “Jamshe jemtüoh, jatli kahtalan, ahngching toitawante mahpu mepu aoyin yinyangki khongküm; nang nying nyingke ngaophünlak jingne phatam tüoh! Kahta aoyinne iman peelingpu peshaolan phei woikem hüyange iman yinne tampu ye-oklak kahwangte yop, Kahtalan aoyinne hango yeshing!

²¹Peikei hüyange numan jeng ghonyoi me peitüoh; yintamlak jingne ngangpalan-e iman pa me teingao ne tamtüoh. Hanghe ngailak üshongwante muh aowe itpu ngaowetam? Hatüowa Tao, Youngwanpa, Kahwang aowe yoi kahtalan yintampu yeje a? Ü-tokte ülao Kahwang, ao-o yenang.”

²²“Sha-a ü-tangte lüptüoh hüyange yinyah, kahtoknyu nopu mepu kahtalan! Ülao ao-o yenang, Kahwang-a ü-shaha.

²³Taowe janpuwa ütingpa, hüyange hatüowa yejeileilak. Tao hanghe tüo khongkümpuwe lahnyik mongkopu phei Taowe jannang. Ü-sheshao me moilan-e yatuh shünglak, hüyange yee üshei-e jiengjeplak.”

²⁴“Iman-e ilak Youngwanpa kaiye hei khakshupupa hüyange wong tüopu oklak; hüpoi aoyinne I phei tüi-e yong, khongkümpu mongshangpu phei shaoshilak.

²⁵Youngwanpame, Israel huhayimlan khongkümpu tingtamlak, hüyange müktishiwalak.”