Read Konyak Naga ISAIA 47 Bible Online

ISAIA 47 - Konyak Naga bible

ISAIA 47

¹Youngwanpawe inang, Babilon, nang ahngpa shotjing mepu yukei; hüyange kahmak me kahtokte shot tüoh. Hipak ja me nanga wangngoipu naoyha kih-e. Yehah okpu chingnyu ja ne ngohyangki; hüpoi shaaji nanga wongyenang hüyange khainang! Sha-a nanga rha!

²Shamshu longte yüptüoh! Hahying ngüttüoh! Shanglümkhek yah angtüoh! Shemeipupa nang jing nyemo khoktüoh! Yengyin kailak jingne nang shiengnung nüppe intüoh!

³Kahtalan-e nang pümkeng me ngelak, iman-e nanga innyaiteiye hüyange wüoteiye ngelak. Taowe phuh hahlak, hüyange aowe-o üte tien ne ye-oklak.

⁴Israel Üjao Kahwange toman lantam, I minna Ütahpa Youngwanpa.

⁵“Wangnyak me hüyange yelangmanpe shottüoh; O Chaldea yhalalan; hangjingne shaaji nangte jatlan ahngpa she yenyiklak!

⁶Tao ü-kahtalan phei mongshihpu ngoh; taowe shaaji iman-a üjing yeje pukih jon. Taowe iman-a nang wong phang me ang, hüyange nange imante shüpshe yehüo; wupalan te nehoi nange shu-ngüm.

⁷Nange nanga hipak lep iye ahngyha ne hei ngohlak she teih, hüyange nange tüolan toishao nang mongjang me ye-ang yejema-a tüolan khongkümpu hangke üküm ngoikülak yeteihtüo.

⁸Tüopate jaiyah, iymei mongmei pute kenpu nang, Nange nanga yinne hüyange yintampu okke ngohnang she teih; Nange nanga Kahwang shinne kheyong nang she hüke nang kihpu ao-o yenang she ngao. Nange teih nanga aope-o wamnyu ja ne yemenglak yejema-a nang hayimlan mahteiye shaoshipu ye-ngelak.

⁹Hüpoi ütenjapu mongme, nyih ja mongme tüolan jamshe ngailak. Nange jonpu yepahipa toishaolan khongkümpu ngohyange-o, nange nang netanpa hüyange hayimlan mahlak.”

¹⁰Nange nang nying nyingke nang ümengpa toishaote ütingpa she monghüm; nange teih aowe-o nang ye-nge oklak. Nang konjong hüyange manlam manpuwe nang ünyong yete woi, hüyange nange nang nying nyingte, “Taowa Kahwang, Ü-kihpu ao-o yenang” she i:

¹¹Hüpoi yatuhshao ümeng nang tangte ngoilak, hüyange nangjing yepahipa aowe-o tüopa yetien oklak. Nang tangme heam-mahlakpa mokhshe, nange mangme nehoi yeteih tüopu heam-mahpu peilak!

¹²“Nangjing yepahipa toishao hüyange ngeingatpu khongkümpu nange nang tangshim wante muh jonne peipulan me wongnange yongtüoh. Aoweshing tüolan-e nangte ütam jamne ok; aoweshing nange nang wepalan nyamme tampu oklak.

¹³Nange hengpu tüoyange-o nanga shaaji wong yenang. Nangjing shanha-itpalan sheshao yete peiye nang yinne tamtüoh. Kahtalan aoyinne shanhalan jeng yamnang, aoyinne wangdang kahmüklan itte sheamnang, hüyange nangte hanghe ngailak ne ngoh, lekeng ja phei me ja she nangte i tam nang.”

¹⁴“Iman-a jüngoong kih-e ngohlak, hüyange vünne iman-a hahtamlak! Iman yoi nying nyingke nehoi yinpu ye-oklak, iman jingne vünloonga jamloi sheamlak, iman nying nyingke vünlüm meilak nyaishümpu vünne yejelak.

¹⁵Nang üyin jin kümme nange monghümme yihnoonne angpu shanha-itpa lan-e, nangte mei linge okpu khongkümpu ne tüolan hei menglak. Iman khongkümpuwe nang tüoh phalak hüyange iman yoi lamte yante phalak, hüyange nang yintamlak jingne ao-o yetüohlak.”