Read Konyak Naga ISAIA 48 Bible Online

ISAIA 48 - Konyak Naga bible

ISAIA 48

¹Tüopate jaiyah, O Jacob nokphong, aoyin te Israel min me nyik, hüyange aoyin Judah yeng mepu ngai; aowe Youngwanpa min me jiengjep, hüyange Israel Kahwangte nyik, hüpoi ütingpa me yejema-a khakshupu me yeje.

²Tüoyangpoi numan-e otapu phei numan Üjao chingnyu chingpuhulan she inang, hüyange numan-e Israel Kahwang Ütahpa Youngwanpa min me monghüm nang.

³Youngwanpawe Israel te inang, “Üshong wantemuh hanghepa ngailak, Taowe itte ngaoyangki; tüophei me mokhshe Taowe tüopa ngaone tamnang.

⁴Hangjingne nang woopa ne menge hüolak yan kih-e monge hüyange shakphan yan kih-e ütingpa ne yejepe linglak Taowe shing.

⁵Tüokhei nange tüolan-a nangjing peshaolan hei mienglan-e tüolan ngaitamlak jingne ling she nange ilak mepu tienlak jingne iman ngaishao memuh Taowe nangjing ngoikülak yatuhshao itte ngaowe tam.”

⁶“Taowe ngaowe angpu lili sha-a ngainang; Taowe itte angpuwa üting she nange ilak wongpong. Sha-a üshongpe Taowe ngaiye yetampu, toi üla ngailak Taowe numante ilak.

⁷Sha-a nakshih tüolan ngaitamlak jingne Taowe lingnang; üshong wante tüopa lepu me hango yengai. Hatüo ngaiteiye ngohshihma-a, tüopa jeng khongküm shingnangki she numan-e ngohhah shepu.”

⁸Nange jai-o yejai, shingo yeshingpe ngohyangki, üshongwante muh nang na-a ye-eppe ngohyangki; hangjingne nange yeonge lolam-e jon hüyange nang puh nap memuh nangte hok-wepa she nyik ngoh.

⁹“Kahtalan-e ü-min yonge tamlak jingne, Taowe ü-mongshih tükke angnang; hüyange ü-minyong ngampai jingne, taowe nang lange yewinlak, taowe nang jingne tükke angnang.

¹⁰Leihuyah Taowe nanga jakpu vün me khüm tokke leipu kih-e, shaoshipu vün me tokke leiyangki. Hüpoi nangme ühak yekoh she Taowe ngeteki.

¹¹Taowe hanghe lingyangki hatüowa ü-min jingne Taowe ling, Taowe ü-min-a ye-i-yeshepe linge yetamlak; yejema-a müktishiwapu me ütam omne yetamlak hatüowa üjing hüyange ü-shaha jingne menglak.”

¹²Youngwanpawe inang, “Üte jaiyah, O Jacob hüyange Israel, Taowe nyikyangpu kahtalan! Taowa Kahwang, üwang hüyange üküm, jashingha Kahwang!

¹³Kahtoknyu nokjing üyakke ling, hüyange wangdanglan lanne tam. Aope taowe kahtoknyu hei wangdangte nyik, iman mamshe peinang hüyange iman nying nyingke hüonang.”

¹⁴“Numan khongkümpu jemtüoh hüyange jaitüoh! Kahwanglan aowe-o hüke Taowe leyangpu kahtawe Babilon chinghahlak she itpu ye-oklak; Taowe Ite hanghe lingne tamhu Iye linglak. Hüyange I yak-a Chaldealan phei tüi-e ngohlak.

¹⁵Aowe ngaowetam hüyange Ite nyik hatüowa Tao ngoh nang; Taowe I taine tam hüyange Ite okpu pha.”

¹⁶“Sha-a ü-shongte owe peikei hüyange Taowe hanghe i jaitüoh. Üwangne muh Taowe ngaiye ngaoyangki, hüyange ü-ngaowa jinte ütingpa me ngaine tamnang.” Sha-a wongnangpu Youngwanpawe yoi ünganwong üte pha yangki hüyange Iye tao shon.

¹⁷Israel üjao Kahwang, Youngwanpa aowe nang yin, inang: “Taowa numan Youngwanpa Kahwang, aowe numan meilak jingne nyüowe tamhunang hüyange numan tailakpa lam hüowe tamnang.”

¹⁸“Numannehi ü-ngaokenglan jaima-a! Hüma-a aope-o yejüppu yengyin kih-e numan jingne moiman yüt hahshepu! Okpupa-a yengching ya yungpu kih-e numan tangte peihah shepu!

¹⁹Numan jing huhayimlan-a pheih shinne pange, hüyange Taowe iman-a aope-o yemahlak ne ütingpa me lingtam hahshepu.”

²⁰Babilon mepu taitüoh, phette taitüoh! Mongmeipu phei ngaolan üngwüntüoh; üken phe me tüopa jeng shingne tamtüoh. “Youngwanpawe yoi shaoshanpa Jacob yintamteki!”

²¹Aope Youngwanpawe yoi kahtalan üsheam hüyange wanwüng jeng kaiye woiyapeih, yengleye iman shao yeshi. Iye iman jingne longnyu mepu yeng ngaine tam; Iye longnyu phüpne tam, hüyange yeng yünne ngaitam.

²²“Ünulan jingne yinlak ken yenang she,” Youngwanpawe inang.