Read Konyak Naga ISAIA 49 Bible Online

ISAIA 49 - Konyak Naga bible

ISAIA 49

¹Üte jaiyah, O yengnah me nyoipu jatlan, numan kahtalan aoyin üjai me nyoinang! Tao puhshao memuh, Youngwanpawe tao le; hüyange I shaoshanpa ne menglak jingne tao leyah.

²Iye ü-ju-a yanglow ja pahpu shinne nah ne tam. I yoi yakphei tao tükke ang. Iye tao lahhan kih-e, ünah phei hüyange jonlak jingne tümyange lingetam.

³Iye üte ngaowe i, “Israel, nanga ü-shaoshanpa; nang jingne kahtalan-e üte yihlupu phalak.”

⁴Taowe i, “Taowe lingyangki, hüpoi hatüo hangshin jajang japu ne meng! Taowe ü-wong kümme jon, hüpoi hango üshüo ngoiye ye-ok.” Tüoyangpoi ü-shangshih mepu tükke oklak nanjingne taowe Youngwanpate üting laklak; Taowe hanghe ling tüojingne Iye khintak yaphalak.

⁵Tao puhshao memuh, Youngwanpawe tao leye ang; Iye yoi kahtalan yah yelak jingne yoi shaoshanpa ne, Israel kahtalan kenphe me yanne ngohpu yah yelak jingne tao lingetam. Youngwanpawe üte yihnoonpu pha; I-a ü-wong tüojing ken.

⁶Youngwanpawe üte i, “Ü-shaoshanpa, Taowe nangjingne toinyu üyong ngohnang. Israel kahtalan aoyin yinyangki tüolan nange kheyongne linge tampu shaha yeje, hüpoi Taowe nanga jatlante wangngai ja ne linge tamlak, hümme nakshih kahtoknyu khongkümpu yinpu oklak.”

⁷Israel üjao Kahwang hüyange yinyepawe ao te yemeipe yaoweletam, ao te jatlan-e nuwe tam hüyange wanglam lampalan shaoshanpate inang: “Ahngpalan-e nang lantampu ngelak hüyange iman-e yihnoonpu hüolak jingne yonglak; ahnghalane-o tüopa ngelak, hüyange iman-e khuhtawe nangte yihnoonpu hüowe khümlak.” Tüopa-a ngailak, hangjingne Youngwanpawe yoi shaoshanpa leyah; Israel üjao Kahwange yoi-e janpulan angnang.

⁸Youngwanpawe yoi kahtalante inang, “Aope nang yinlak jingne hipak peilakeih, Taowe nangte monghahpu hüolak, hüyange jamlak jingne nange üngwünpute janlak. Taowe nang yomlak hüyange tükke anglak, hüyange nang kaiye kahta lili phei jiengjeppu linglak. Taowe nang sha-a hangne-o yemengpe winne angpu nangjing kahmük me nishe ngohne tamlak.

⁹Küpnok me ngohpalante Taowe ilak, ‘Hangko yeteihpe taitüoh!’ Hüyange aoyin wangnyak me ngoh, ‘Wangngaite ngaikei’ she ilak! Iman-a kahtang me heei hahpu nyee kih ngohlak;

¹⁰iman aope-o sea yenyaolak yejema-a yeng yelelak. Wanghe hüyange pheihsheam üsheam-e imante hangko yesheilak, hangjingne ima-a iman-a aowe imante ken Iye woinang. Iye iman-a yengyin yeng üngangte woilak.

¹¹Taowe ükahkenglan khongküm tongkenglam ne linglak hüyange ü-kahtalan kemmeyonglak jingne lamnyu ja tümlak.

¹²Leihuyah, Ü-kahtalan-a üjai mepu, apyekao hüyange henyip yemepu, hüyange heyekao Aswan mepu peilak.”

¹³Wangdanglan, loktüoh! Kahtoknyu, mongongpuwe üngwüntüoh! Kahkenglan-e hemlokpuwe phüptam tüoh! Youngwanpawe yoi kahtalan toloimei tamlak; Iye shaoshi pongpu yoi kahtalante yayenge teihlak.

¹⁴Hüpoi Zion kahtalan-e i, “Youngwanpawe toman winne tüoh! Iye toman peteki.”

¹⁵Tüokhei Youngwanpawe jan, “Sheko jawe yoiha petüohlak hüyange yoi puhpu ha te yekenlak a? Inyuwe yoiha pemeiyange ngohyah poi, Taowe nang aope-o yepelak.

¹⁶Leihuyah, taowe nang aope-o pe ne ye-ok! Taowe nang min-a ü-yakpha mongme nyanteki.

¹⁷Aoyinne nang linge yelakei tüolan mamshe peiküki, hüyange aoyinne nang mahtam iman-e nyoijing shenglak.

¹⁸Neikonne leitüoh hüyange hanghe ngainangki leiyah! Nang kahtalan jemnang, iman nokte yenang! Üting tingha me tao üyin Kahwangne ngohpu kih-e, nanga nang kahtalan jingne, nyemnyanyuwe yoi juyükte otapu shinne otalak.

¹⁹“Nang kahmük-a heamme tam hüyange ükengne mengetam, hüpoi sha-a aoyin tüopa me nyoilak jingne peinang, iman jingne jamloi nyoihüt teiye ngohlak. Hüyange aoyinne nang heamteiye tüoh, tüolan-a nangmepu shejai she yahteilak.

²⁰Nang kahtalan aoyin phowe teiye ngohwante puh, nyih ja nangte ilak, ‘Hatüo kahmük-a jamloi shoinangki, tüopa me ngohlak jingne nyoijing üne-o wongpong yang!’

²¹Hüwante nange nang nying nyingke nangte ilak, ‘Aowe tüolan nahalan khongkümpu üte puhtampu? Taowe ü-hayim mahküm hüyange shaaji yenang. Taowa phoweteiye ngoh hüyange jange tei; aowe tüolan nahalan jonge tampu? Taowa ü-shaha tüohpu, ümeken mepu tüolan nahalan peipu?’ ”

²²Okkeshangpu Youngwanpawe yoi kahtalante inang: “Taowe jatlante yak nowe hüolak, hüyange iman-e nang hayim jakuh me küoyange hüyange nangjing yhalalan-a phaktang me paiyange nokte yah yelak.

²³Ahngpalan-a nangjingne payonglan kih-e ngohlak; ahngyha lan-a nyuyonglan kih-e ngohlak. Iman-e nang sheshao me khuhtawe khümlak hüyange nangte yihnoonlak; iman-e innyaipu phei nangte iman-e wangshüm hüolak. Hüwante Taowa Youngwanpa yang she nange shinglak, ü-mepu jampu yamme tanne ngohpalan ao-o mongmeng tüopu ye-ngelak.”

²⁴Wetaipalan-e nyieyahpu nange yah teilak a? Nange shaoshi tamme wanglam lampa küpnok mepu yintam lak a?

²⁵Hüpoi Youngwanpawe janne yenang, “Hanghe ngailak ne ngoh tüopa khakshuwe ngohlak. Wetaipalan phowe angpu yah teilak, hüyange shaoshi tamme wanglam lampalan-e nyieyahpu tükke anglak. Aowe nang phei hoklakei tüokaiye Taowe hoklak; hüyange nang hayim Taowe yinne tamlak.

²⁶Nangte shaoshi yateng tampalante iman nying nyingke yoi mei hahlak ne Taowe lingtam lak; wuwüngti-e jokpu kih-e iman yoi iy-e joklak. Hüwante kahtanyuha üsheiye Taowa Youngwanpa, aowe nang yinne hüyange lanne tam she shinglak. Iman-e taowa Israel jing wongnangpu Kahwang she shinglak.”