Read Konyak Naga ISAIA 5 Bible Online

ISAIA 5 - Konyak Naga bible

ISAIA 5

¹Taowe kenpupa jingne I jing wuwüngkah jeng taowe kenpu hem ja loklak. Ü-mongkenpawe yeonge üyao pheipu kahmüoh me wuwüngkah ja ngoh nang.

²Iye kahyao shaowe ngai hüyange tüopa mepu long lüoh-e win; Iye shemeipupa wuwüngwu shom. Tüolan yomlak jingne Iye daonok we, wuwünglick ngütlak nyoine kahkook shao. Wuwünglick yimkülak she Iye tan, hüpoi wuwünglick khongküm üshi ne mengemah.

³Tüokhei sha-a, numan kahtalan aoyin Jerusalem hüyange Judah me nyoinang, numan-e ü-wuwüngkah hei tomnipa me ngao phün pha.

⁴Hatüo me taowe yeling okpe tüohpu ütam ngoh nangkü a? Hüma-a taowe teihpu kih-e wuwünglick ümei yengaipe hangne hatüowe wuwünglick üshi ngaitampu?

⁵Taowe ü-wuwüngkahte hüke linglak; tüopa neikonne ngohpu pelak taowe yahteilak, tüopate jongwanpu jantpe menge winlak, hüyange phao yinmoklan-e tüopa-a minhah shih hüyange yalokke mintam shih.

⁶Taowe tüopa-a hüng loonge ngaine tamlak. Wuwüngwu taowe yüoyephaklak yejema-a kahtok yepheklak; tüo nanleiye huhwu pheipu üphaolan-e maawe tamlak. Tüopa tangme wai yeyüt tamlak jingne wangphom te nehoi taowe tientamlak.

⁷Israel-a Ütahpa Youngwanpa jing wuwüngkah; Judah kahtalan-a Iye shompu wuwüngwu. Hanghe shemeipupa iman-e tüopa lingkülak she Iye monghüm; hüpoi tüopa nanleiye iman-e toilange ünu om. Hanghe shunang iman-e tüopa lingkülak she Iye monghüm, hüpoi iman-e püoh pienyangpuwe ngaotingpa ngaophünpu yamme üngwün nang.

⁸Numan mahnang! Hangshin numan me ngohyapeih tüo tokte paone, numan-e nok hei kah ünyei shakke wangnang. Mamshe ao-o ümeken me-o yenyoi oklak hipak peilak, hüyange kahmük me nang shaha nyoine ngai külak.

⁹Ütahpa Youngwanpawe ngaopu taowe jaiyangki: “Tüolan yongpu, shemeiyaomapu noklan khongküm ükeng me mengkümlak.

¹⁰Kah ükam pen me ngaipu wuwüngwu me wuwüngti taksheng tet hei ngailak. Üli taksheng gho ja me detet deipu me ülick taksheng pen metet hei ngailak.”

¹¹Numan mahnang! Numan-e yinglak jingne napning shonge lüonang, hüyange numan-e jokne tam-e phayange ngohnang.

¹²Numan motappu me numan-e kongki ümtük, phemkao hüyange vewo hüyange wuwüngti she angnang. Hüpoi Youngwanpawe hanghe lingnang numan-e yeshing ok;

¹³tüokhei numan-a küpnok me angne phowe teilak. Numanjing woipalan-a hahhu-yinghuwe lilak, hüyange bangnyuha-a nyaoweleye lilak.

¹⁴Yimchinga iman hahhuwe seanyao nang, hüyange tüopawe yoi ju yeonge yonge ka nang. Tüopawe Jerusalem mepu üyih-üyonglan, langman loipu bangnyuhalan phei jamme hahtai nang.

¹⁵Kahta khongküm wüotüo tamlak, hüyange aoyin ota-nang moilan innyaine tamlak.

¹⁶Hüpoi Ütahpa Youngwanpawe hanghe ütingpa tüopa lingpu kaiye I kheyongpu hüonang, hüyange Iye yoi kahtalante ngaophünpu kaiye I üjaopa ütahte ngaiye tamnang.

¹⁷Heamme mengtepu chingnyulan me nyeehalan-e hüng hahlak hüyange younhalan-e iman hahnyoi tüolak.

¹⁸Numan mahnang! Numan ünulan mepu numan-e phünne yanpu ye-ok.

¹⁹Numan-e inang, “Youngwanpa hehne tamtüoh hüyange Iye hanghe linglakei she i, lingtamtüoh, hümme nakshih toman-e tüopa ngelak. Israel üjao Kahwange Iye tümpu linge tamtüoh; I kenmong me hanghe teih-e ngoh leihah.”

²⁰Numan mahnang! Numan-e ümengpate ümeipa she hüyange ümeipate ümengpa she nyik. Numan-e wangnyak-a wangngai ne hüyange wangngai-a wangnyak ne lüppe tam. Numan-e hanghe khah-e ngoh üwüngne, hüyange hanghe wüngwükke ngoh ükhah ne lingetam.

²¹Numan mahnang! Numan-e numan-a kentamongting nang she teih, tüokhei yeonge deitah.

²²Numan mahnang! Wuwüngti sheng tepu ütahlan! Aope tüopa nyütyange yingne peilakeih mongyong hüyange yenyam!

²³Yakjai jingne numan-e püohpupa kahta yinne tamnang, hüyange hang ümengo yenangpu kahtalan-e ngaoting ilak mepu numan-e tien.

²⁴Tüokhei sha-a, tahjan hüyange hüngwan noiyange hüyange vünte jakpu kih-e, nangjing yalah-a kuilak hüyange nang üpeng penge ngohpuwa wan mahlak hüyange puwe teilak, hangjingne ima-a nange hanghepa Ütahpa Youngwanpa Israel Üjao Kahwange tomante nyüowe tam yeyah.

²⁵Youngwanpa-a yoi kahtalante mongshih nang hüyange imante shaoshi phalak jingne Iye yoi yak no teki. Kahtanglan polak, hüyange aoyin liyapeih iman manga büanglampong me makwinpu kih-e tüohlak. Tüoyangpoi Youngwanpa mongshih ngaipuwa ükümne yejelak, hüpoi I yak-a shaoshi phalak jingne yelakpe honge nolak.

²⁶Üjai mepu jat jate nyiklak jingne Youngwanpawe füojai pha. Iman kahtoknyu üküm yemepu peilak jingne Iye iman jingne ngaopha. Hüyange hatüo me iman potange mamshe peinang!

²⁷Iman ao-o towe nyaipu yenang, ao-o yashah hüopu yenang. Iman ao-o mükngoih shongpu yejema-a shipu yenang. Shienghit ja nehoi yelan; yashom wuja nehoi yephün.

²⁸Iman lahhanlan-a pahnang, hüyange iman wenglah-a keplak jingne tümyange. Iman jing koiponglan yashoklan-a longlangyan shinne wan, hüyange iman pongtongtoi ya-a yüpnyeih shinne ponang.

²⁹Yengkong mailanglan-e yinmoklan toiyange iman mepu aowe-o nyieye yeyah oklakne yahtaiye waopu kih-e wetaipalan waonang.

³⁰Tüopa nyih me, iman-e Israel tang me yengnyu wüng shinne wenne waolak. Tüopa kahtokte leitüoh! Wangnyak hüyange shaoshipu! Wangngai-a wangnyakke lünge taiteiye ngelak.