Read Konyak Naga ISAIA 50 Bible Online

ISAIA 50 - Konyak Naga bible

ISAIA 50

¹Youngwanpawe inang, “Yoi shekonyu jange teipu kahta ja kih-e Taowe ü-kahtalan jange tei she numan-e teihnang kü a? Üpu, hüma-a jange teipu me nyanpu lailan na? Kahta jawe yoi hayim rha ne yüopu kih-e Taowe numan phowe teilakte yüowe tampu she numan-e teih nangkü a? Yeje, numan ünu jingne numan phowe teipu me taimah; numan-e iy shaiyangpu jingne numan ünyu-o yah teiyangki.”

²“Aope Tao iman tangte iman yintamlak jingne peiyapeih hangne ü-kahtalan-e yejanpu? Aope Taowe nyikyapeih hangne iman-e yejanpu? Iman yinlak jingne üme jamloi wong yenangpu a? Ngaokeng phayange Taowe yengching jüppe tampu oklak, hüyange yengyinlan pheih kahtok ne linge tamlak; tüokaiye tüolan me ngohpu nyah yeng yenangteiye lilak.

³Taowe wangdanglante ünyak-e o tamnang, hüyange iman-e inlak jingne monye lingnang.”

⁴Okkeshangpu Youngwanpawe ü-yeete nyüowe tam; tüowe mongshangpu mepu tao wongnanglak. Napjeih she Iye üte hanghe nyüolak ngohyapeih jailak jingne na lahnyik mongko ne tamnang.

⁵Youngwanpawe üte üpong tüowe oklak na eptam, hüyange taowe teelapu yengai yejema-a I mepu lüppe yetai.

⁶Aoyinne üte shet tüolante taowe ü-tok shan. Aope iman-e üte yaoleyapeih taowe imante lakne yetam; aope iman-e ü-juminte shuwe bheiyapeih, hüyange ü-shetate iyphao phao yapeih taowe shan.

⁷Hüpoi iman-e yaowelepuwe üte maa yepha, hangjingne okkeshangpu Youngwanpawe üte jampu pha. Iman phei shienge oklak jingne ü-nying nyingke mongnang. Tao mongshang mongmengpu yengohlak she taowe shingnang;

⁸hangjingne Kahwang ü-o me, hüyange üme hang ümengo yenang she Iye linge tamlak. Kahta ütam-e ü-phei tüi-e ümengpa yah peipu oklak a? Ghonyoite teman jamshe taihah! Iye ümeng phapulan Iye yah peine tamtüoh!

⁹Okkeshangpu Youngwanpa Iye tao tükke angnang, hüma-a, aowe tao yeshu ja she iye oklak? Üte ümeng phapalan khongkümpu ye-ngepe taikümlak; iman-a mütte inkhek hahpu kih-e mah shonlak.

¹⁰Youngwanpate yihnoonpu numan khongküm, hüyange I shaoshanpa ngaolan jaipalan, numan kempu lam wangnyak me ngohne ok, hüpoi Youngwanpate ütinglak tüoh, nang Kahwangte monghüm tüoh.

¹¹Hüpoi sha-a, numan khongküm vün jakpalan hüyange numan nying nyingke vüntong ne mengpalan, numan vünloong me hüyange numan-e jakyapu vün me numan kemtüoh. Hatüowa ü-yak mepu numan-e tüolak; numan mongshih ngaipu me lamyange ngohlak.