Read Konyak Naga ISAIA 51 Bible Online

ISAIA 51 - Konyak Naga bible

ISAIA 51

¹Youngwanpawe inang, “Üte jaiyah, numan khakshupupa phei te woipalan, numan Ü-tangte jamlak yamme peipalan. Hanghepa longnyu mepu numan ngai, hanghepa long yo mepu numan shaowe yah teih tüoh.

²Numan pajeiyong Abraham, hüyange Sarah, ao mepu numan yu teihtüoh. Aope Taowe Abraham nyik, I ha-nao yenangpe ngoh, hüpoi taowe Ite moiman tam hüyange Ite hayim pha; Taowe I huhayimlan üngang linge tam.

³Youngwanpawe Zionte, yha nyoi heamtepu me aoyin ngoh, khongkümpute yayeng shüpshe hüolak. Yha jing kahmük wanwüng jengne mengyapoi, Youngwanpawe tüopa-a pesha ja ne linglak, Eden me ngaitampu pesha kih-e, mongmei hei hoongli mongongpu tüoken me ngohlak, hüyange yihlupu hem hei üte minyong phapu ngohlak.”

⁴“Üte jaiyah, ü-kahtalan, Taowe hanghe i tüote jaiyah: Taowe jatlante Taowe nyüopu pha nang; ü-ngaokhüm-e imante wangngai yahpeilak.

⁵Tao mamshe peilak hüyange iman yintamlak; Taowe okpu ngelak hipak owe peinang. Taowe ü-nying nyingke jatlan tangme wanglam lamlak. Kahmük üjai me ngohpalan-e Tao peiye tamlak jingne tan; iman-e monghüm puphei Taowe iman yinne tamlak jingne tan.

⁶Wangyete nganne leitüoh, kahtokte leitüoh! Wangdanglan-a vünkhuh kih-e ye-ngepe mahlak; Kahtoknyuwa nyemo ülang kih-e lange mahlak, hüyange tüopa mepu kahta lili hooi kih-e lilak. Hüpoi Taowe yahpeipu yinne tamlakpa-a jin jinte ngohlak, Taowe okpu ngepuwe ükümpa ne mengtamlak.

⁷“Üte jaiyah, numan khakshupu shingpalan; aoyinne taowe nyüopu numan mongjang me angnang. Aope kahtalan-e numante khah-e hüyange teetam phalakei nyamme tahteih.

⁸Iman-a mütte hahpu nyemo kih-e mahtailak! Hüpoi Taowe yahpeipu yinyetampuwa jinte ngohlak; Taowe okpu ngepuwa jinte yelakpe ngohlak.”

⁹Lüotüoh, Youngwanpa; hüyange tomante jampha! Nang ünganwong jontüoh hüyange toman yinpha; üshongwantepu hipak me nange lingpu kih-e tüopa jontüoh. Hatüowa nang aowe yengching yinmok Rahab khoih nyaiye mette tam.

¹⁰Hatüowa nang aowe yengching jüp ne tam, hüyange yeng kaiye lamnyu ngaiye tam; tüokaiye aoyin nange yinne tamyangki kaipu ok.

¹¹Aoyin nange yinne tam, mongong monglepu phei hemlokke hüyange üngwünne Zion ngoilak. Iman jinjintepu jingne mongmeilak, mongmeng hüyange mongshangpu mepu jintepu jingne lanlak.

¹²Youngwanpawe inang, “Aowe nang wong nangne tamnang, hatüowa Tao ngohnang. Ao hüng ja shinne nehoi yengoh oklakpa kahta lihha nang hangne nyampu?

¹³Aowe nang lingengai tüopa Youngwanpa, aowe wangdanglan lanne tam hüyange kahtoknyu nokjing ling, nange pemeipu a? Aoyinne nangte mongshih ümeng ngaiye shangne tam, aoyinne nang mahtamlak jingne tüm, tüolan shaote nang hangne yelakpe nyamme nyoilak shi? Iman mongshih ümenge nangte shaaji yeshah lak.

¹⁴Aoyin küpnok me ngohyangki mamshe lanlak; iman jin laowe ngohlak hüyange iman-e wongpongne mengpu hahying khongküm tüolak.

¹⁵Taowa Youngwanpa nang Kahwang; Taowe yengching pone tamnang, hüyange yengya yungpu wüng ngaone tamnang. Ü-min-a Ütahpa Youngwanpa!

¹⁶Taowe wangdanglan lanne tam hüyange kahtoknyu nokjing lingetam; Taowe Zionte i, ‘Nanga ü-kahta!’ Taowe nangte Taowe nyüopu phayangki, hüyange ü-yakke taowe nangtükke ang.”

¹⁷O Jerusalem, lüotüoh; lüotüoh! Nang nying nyingke mengha yah hüyange yongtüoh! Youngwanpa I mongshih ngaipu me nangte yinglak jingne phapu shaoshitampu wanne nang jokteki; hatüo nange yinge tai, hüyange tüowe nang pala ne tamnang.

¹⁸Nang woilak jingne ao-o yenang, nang yak me shuwe yahlak jingne numan kahtalan yo me ao-o yenang.

¹⁹Mahshupu üphongni nang tangme yütteki. Wehok kaiye nang kahmük-a wüngmakke linge tam, hüyange nang kahtalan seanyao yengle nang. Nangte yayeng hüolak ja nehoi yenang.

²⁰Chingkeng lamnyu ünuk phe me wong yenangpuwe nang kahtalan toi tawe ngoh nang; iman-a meitoipalan shaan me phopu meishi kih-e ngoh nang. Kahwangpa mongshih ngaipu me iman yütte ngohnang.

²¹Tüokhei tüopa jaiyah, numan aoyin mayah aoyin jokyangki, hüpoi wuwüngti-e yeje;

²²Youngwanpa nang Kahwange nang tükke angnang hüyange inang, “Tao mongshih ngaipu me nangte Taowe phapu wan yah teinang. Hangheye nang pala ne tamnang tüopa wuwüngti shaaji yeyinglak.

²³Taowe tüopa-a aoyinne nangte shaoshine tam imante phalak, aoyinne nang chingkeng lamnyu me lamne tam, hüyange nanga yejaopu ülam ja kih nang tangme yalokke tam.”