Read Konyak Naga ISAIA 52 Bible Online

ISAIA 52 - Konyak Naga bible

ISAIA 52

¹Lüotüoh, lüotüoh, nang wongnangyah O Zion, Kahwang üjao chingnyu, nang nying nyingke phihlangpu phei otüoh! Hangjingne üsho yekhüppu hüyange yejaopulan nang petenlan kaiye shaaji aope-o ye-onglak.

²Nang nying nyingke neakne yetampe kongwintüoh, Jerusalem! Kahmak mepu lüotüoh hüyange nang ahngpa shotjing me shottüoh! Phowe angpu Zion kahtalan nangme phünpu yankeilei lantüoh!

³Youngwanpawe yoi kahtalante inang, “Aope numan rha mengyapeih, numan jingne ngin yepha; tüokih-e muh numan lantamlak jingne hango yephalak.

⁴Aope numan Egypt me kahheng ne menge ngohlak jingne tai, numan-e numan nying nyingke monge ling; tüoyangpoi Assyrialan-e numan-a kange yahtei hüyange numan jingne hango yepha.

⁵Hüyange sha-a Babilon me jakihpu yatuhshao ngainang; numan phowe tei, hüyange numan jingne hango yepha. Aoyinne numan tang me wanglam lamnang iman yongelüonang ota-nang hüyange üte yemeipe ngaopu yelakpe hüonang.

⁶Tüokhei ngoikülak hipak me numan-e hüke Taowa Kahwang hüyange hüke Taowe numante ngaoyangki she shinge peilak.”

⁷Ngaolan kipa ja kahkenglan kaiye ngaolan ümei chingmei ngaolan yahyange peipu tüopa ya te leilak hangshin shemei yaomapu! Iye okpupa ngaolan ponge tamnang hüyange Zionte inang, “Nang Kahwange wanglam lamnang!”

⁸Aoyinne chingnyu yomnang iman-e üngwün nang, mongmeipuwe jamshe üngwün nang! Zionte Youngwanpa leih yepu iman yoi mükke iman-e ngenang!

⁹Mongmei üngwünpuwe phüptam tüoh, numan heamtepu Jerusalem! Youngwanpawe yoi chingnyu yinlak hüyange yoi kahtalan toloimei tamlak.

¹⁰Youngwanpawe yoijing ünganwong jonlak; Iye yoi kahtalan yinlak, hüyange kahtoknyu khongkümpuwe tüopa yinyetampu ngelak.

¹¹Yantüoh, yantüoh, tüomepu yayongtüoh! Yejaoyeshapu toinan hanghete-o tahlet! I mepu numan yantaitüoh; numan jaoshe-e ngohyah, numan aoyinne Youngwanpa wanhashengha kinang.

¹²Hüpoi tüopa ünme numan heh-e yayonglak ne yeje; numan yinlak jingne yenganglak. Youngwanpa numan Kahwange numan woilak, hüyange ülam lili me numan jongwanlak.

¹³Youngwanpa inang, “Ü-shaoshanpawe I toishao me okpu ngelak; Ite ütahpa me yihnoonlak.

¹⁴Aope iman-e I ngeyapeih kahtalan üngang yeonge mokh; I jamloi üshe-meng tüoh-e I kahta üha yang she leilak wanne ngoh.

¹⁵Hüpoi sha-a jatlan üngang Ite yashanlak, hüyange yashanpuwe ahngpalan-e ngao yengailak. Iman-e aope-o yeshingpu ülamja iman-e ngelak hüyange shinge yahlak.”