Read Konyak Naga ISAIA 54 Bible Online

ISAIA 54 - Konyak Naga bible

ISAIA 54

¹Loktüoh Oh heelangnyu, nanga ha-nao yenangpu sheko ja kih-e ngohyangki; hüpoi sha-a nange mongmei puwe hem lokke üngwüntüoh. Sha-a netanpawe aope-o yetüohpe ngohpu shekonyu ja phei shenyei she nange hayimlan tüolak she Youngwanpawe inang!

²Nang ngohpu nyenok khaowe tamtüoh; tüopa tepu wu lüowe tamtüoh hüyange lag wongnangne tamtüoh!

³Hangjingne nange nangjing yikenglan yaknya-yakjah me ompu oklak; Sha-a ülao jatlan-e yah-e ngohpu kahtok nang kahtalan-e leih-e yah yelak; Sha-a wanwüng jengne tüohpu chingnyu me kahtalan-e maalak.

⁴Nyamme tahteih, nanga nishe mongmengpu yenanglak; nangte ye-i-yeshepe yeling tamlak. Nang nyuyong üla ne menge mong yehüm yangpu, hüyange nang wamnyu ja ne nang shaha monghümpu üshei mahpu nange pemeilak.

⁵Nang linge ngaipa-a nang netanpa ja leye ngohlak, Ütahpa Youngwanpa-a I min; Israel Üjao Kahwange nang yinlak, I-a kahtoknyu üshei tepu wanglam lampa.

⁶Nanga yha netanpawe winne tüohpu hüyange yeonge mongmeng yangpu, nyuyong üla kih-e ngohnang. Hüpoi Youngwanpawe nangte nyik-e ye hüyange i:

⁷“Hipak ütenjapu jingne Taowe nang tüohyangki; yeonge kenpu phei taowe nang yah yelak.

⁸Hipak ütenjapu jingne mongshih ngaiye lüpyangki, hüpoi Taowe nangte jin jintepu jingne kenpu hüolak.” Hüke Youngwanpa aowe nang yinne ang ngaoyangki.

⁹“Noah hipak me kahtoknyute nishe muleam yepeilak jingne Taowe janyangki. Sha-a nang phei nishe mongshih yengailak jingne Taowe jan nang; Taowe nangte menge yeteelak yejema-a nangte shaoshi yetamlak.

¹⁰Kahmüoh hüyange kahtanglan phüpne ok, hüpoi Taowe nangte kenpu aope-o üküm yenanglak; taowe janpu chingmei jinjinte taowe anglak.” Hüke Youngwanpa aowe nangte kennang, inang.

¹¹O üko-hütyangpupa, shangpu nang, wong yenangpu chingnyu, nang toloimeiye tamlak ao-o yenangpupa, Taowe toinyu long phei nang nokjinga linge yelak.

¹²Taowe nangjing daonoklan-a yüknyu phei, nangjing petenlan-a vün kih-e phihlangpu long phei, hüyange nang neikonpu jantpe-a phutti phei welak.

¹³Taowe ü-nying nyingke nang kahtalante nyüolak, hüyange imante jalunpu hüyange chingmei phalak.

¹⁴Khakshupupa hüyange ütingpawe nang wongnangne tamlak. Shaoshine tampu hüyange nyam nyamshepu ütuh mepu nang yinlak.

¹⁵Ütamjawe nangte shümma-a, Taowe yemongpute hatüowa Iye lingnang; aoyinne nang phei hokwelakei toitalak.

¹⁶“Leihuyah yanteppalan, aoyinne vün jakke yo hüyange yonglah linge ngai Taowe ling. Taowe üne-o wetaipalan, aoyinne toilak jingne yonglah jonnang linge ngai.

¹⁷Hüpoi yonglah hanghe-o nangte maaphapu ye-oklak; aoyinne nang phei teilawe ngainang tüolan khongküm puphei nange janne yepu oklak. Taowe ü-shaoshanpalan yinne anglak, hüyange imante okpupa phalak.” Youngwanpawe ngaoyangki.