Read Konyak Naga ISAIA 55 Bible Online

ISAIA 55 - Konyak Naga bible

ISAIA 55

¹“Peikei, aoyin yeng lenangki, yeng-a hatüo me! Peikei! Numan aoyin ngin yenang, hahlak shakyah, hüyange hahtüoh! Peikei! Wuwüngti hüyange düamyeng shakyah, hatüowe nangte ümee hango yeyulak!

²Hanghepawe monghune yetam tüopate hangne ngin winhümpu? Hangne nang nanmah yange yelakpe muh seanyaopu? Üte jaiyah hüyange Taowe hanghe i lingtüoh, hüyange nange shemeipupa hahying phei mongmeilak.

³Sha-a na shongyange jaiyah, ü-kahtalan, hüyange ü-tangte peikei; Ü-tangte peikei, hüyange nange üyin tüolak! Taowe nang phei yemenglak jiengjeppu linglak hüyange Taowe Davidte janpu moiman nangte phalak.

⁴Leihuyah Taowe I lamwoipa hüyange jatlan woipa ja ne lingetam, hüyange I kaiye Taowe imante ü-ünganwong hüowetam.

⁵Leihuyah, sha-a nange kahheng jatlante nyiklak; hipak ja me iman-e nang yeshingpe ngoh, hüpoi sha-a iman nang tangte jamlak jingne phette peikülak, Tao, nang Kahwang Youngwanpawe, Israel Üjao Kahwange, tüolan khongkümpu ngailak jingne linglak, Taowe nangte yihnoonpu hüyange müktishiwa phalak.”

⁶“I yampute tüolak ne ngohwante Youngwanpa yamtüoh, aope I ü-o me ngohyapeih hüwante Ite nyiktüoh.

⁷Ümengpalan-e iman ümengpa lamnyu tüohne tamtüoh hüyange iman-e yeshupe teihpu lam mepu jeileitüoh. Iman teman Kahwang Youngwanpa tangte lüpne tamtüoh; I-a yayeng shüpshe phei hüyange ünu winlak jingne mamnang.

⁸Hangjingne Ü-juteihlan-a numan juteih kih-e yenang, hüyange ü-lamnyulan-a numan lamnyu phei yoi yoi, she Youngwanpawe inang.

⁹Hüke wangdanglan-a kahtoknyu phei shedao she ngohpu kih-e, tüokih-e ü-lamnyulan-a nangjing lamnyulan phei shedao hüyange ü-juteih-a nang juteih phei shelu.”

¹⁰“Hangjingne wangdang mepu kahtoknyute yeng pha ne peipu wai hüyange yi kih-e ü-ngaowa ngohnang. Iman-e deihaliha jongne tamnang hüyange deilak jingne üli hüyange hahlak jingne hahying phanang.

¹¹Tüokih-e Taowe ngaopu ngaowa ngohlak. Taowe hanghe jingne tümyangki tüopa mepu yelanlak; tüopa linglak jingne Taowe shonne tampu khongkümpu linglak.”

¹²“Hangjingne numan mongmei shei-e ngailak, hüyange chingmei me woi teilak; Kahmüoh kahtanglan-e numan sheshao me hem lok-e üngwünne ngailak, hüyange kahko mepu peelan-e iman yakpha khoklak.

¹³Sha-a ümeken me huhpeelan ngohnang tüoken me Cypress pee ngailak; Ühuh ngohpu nyoime myrtlepe ngailak. Hatüowa jin jinte ngohlak füo ja ne ngohlak, Tao, Youngwanpawe hanghe lingyangki tüopa teih tüotampu ja ne menglak.”